Tələbə Qəbulu üzrə Dövlət Komissiyasının sədri Şamaxıda vətəndaşları qəbul etmişdir

Prezident İlham Əliyevin mərkəzi icra hakimiyyəti orqanları rəhbərlərinin bölgələrdə vətəndaşların qəbulu ilə əlaqədar verdiyi tapşırıqlara müvafiq olaraq Tələbə Qəbulu üzrə Dövlət Komissiyasının (TQDK) sədri Məleykə Abbaszadə iyunun 7-də Şamaxı şəhərində vətəndaşları qəbul etmişdir.

AzərTAc xəbər verir ki, Heydər Əliyev Mərkəzində keçirilən qəbulda TQDK-nın sədri Şamaxıdan, habelə Qobustan və İsmayıllı rayonlarından olan vətəndaşların müraciət və təkliflərini dinləmişdir.

Komitə sədri Məleykə Abbaszadə bir sıra müraciətləri yerindəcə həll etmiş, bəzi məsələlərin araşdırılaraq mümkün variantlarının tapılması üçün lazımi tədbirlərin görüləcəyini və bu barədə vətəndaşlara ətraflı məlumat veriləcəyini bildirmişdir.

Qəbul zamanı aparılan müzakirələrdə TQDK-nın sədri ana dilinin daha mükəmməl öyrədilməsinin, xüsusilə riyazi biliklərin müasirləşdirilməsinin, bunun üçün proqramların sadələşdirilməsinin və istiqamətinin dəyişdirilməsinin zəruriliyini qeyd etmişdir. Bunun məktəblilərdə informasiya texnologiyalarının asanlıqla mənimsənilməsi üçün vacib olduğu diqqətə çatdırılmışdır.

Vətəndaşlar qəbula və habelə sərbəst fikir mübadiləsi üçün yaradılan şəraitə görə minnətdarlıqlarını bildirmişlər.

Azərbaycan.-2013.- 8 iyun.- S.8.