Beynəlxalq Akkreditasiya Gününə həsr olunmuş seminar keçirilmişdir

İyunun 7-də Azərbaycan Respublikasının Standartlaşdırma, Metrologiya və Patent üzrə Dövlət Komitəsi (SMPDK) yanında Dövlət Akkreditasiya Xidmətinin təşkilatçılığı ilə Beynəlxalq Akkreditasiya Gününə həsr olunmuş seminar keçirilmişdir.

SMPDK yanında Dövlət Akkreditasiya Xidmətinin rəisi Ramin Babayev bu günün tarixi barədə məlumat vermişdir. Qeyd olunmuşdur ki, məqsəd akkreditasiyanın əhəmiyyətini, onun dünya iqtisadiyyatının inkişafında, keyfiyyətin idarə olunmasında, keyfiyyət infrastrukturunun formalaşmasındakı rolunu ictimaiyyətə çatdırmaqdır.

R.Babayev daxili bazarın təhlükəli məhsullardan qorunmasında, ticarətdə texniki maneələrin aradan qaldırılmasında və sahibkarlığın inkişaf etdirilməsində akkreditasiyanın mühüm rolu olduğunu qeyd etmişdir.

Məlumat verilmişdir ki, Dövlət Akkreditasiya Xidmətinin yaradılmasından keçən 1 il ərzində beynəlxalq standartların tələbləri əsasında 13 məhsul və xidmətlərin sertifikatlaşdırılmasını həyata keçirən orqan akkreditasiya edilmişdir. Son bir ildə ölkədə 10 idarəetmə sistemi, 3 personalın sertifikatlaşdırılmasını həyata keçirən orqan, 10 inspeksiya orqanı, o cümlədən 163 sınaq və 18 kalibrləmə laboratoriyası akkreditasiya olunmuşdur.

R.Babayev vurğulamışdır ki, bu sahədə əldə edilən uğurlardan biri xidmətin Laboratoriyaların Beynəlxalq Akkreditasiyası üzrə Əməkdaşlıq Təşkilatına (İLAC) müşahidəçi qismində üzv qəbul olunmasıdır.

Bu müddət ərzində komitə akkreditasiya sahəsində əməkdaşlıq üzrə İordaniya, Türkiyə, Türkmənistan, Tacikistan və digər ölkələrdə ikitərəfli sazişlər imzalamışdır.

Milli Məclisin İqtisadi siyasət komitəsinin sədri Ziyad Səmədzadə parlamentin növbədənkənar yaz sessiyasında "Ölçmələrin vəhdəti haqqında" qanun layihəsinin qəbul ediləcəyinin gözlənildiyini demişdir. O bildirmişdir ki, standartlaşma xidmətinin yaxşılaşması sahəsində mühüm addımlar atılacaqdır. Komitə sədri məhsulun keyfiyyətini artırmaq üçün yüksək standartlara malik laboratoriyaların yaradılmasının zəruriliyini vurğulamışdır.

Milli Məclisin deputatları Sabir Rüstəmxanlı və Zahid Oruc isə ekoloji standartların yaxşılaşdırılması, geni modifikasiya olunmuş məhsulların istehsalı ilə mübarizə istiqamətində daha geniş işlərin görülməli olduğunu bildirmişlər.

Tədbirdə akkreditasiya sahəsində səmərəli fəaliyyətinə görə Dövlət Akkreditasiya Xidmətinin bir qrup əməkdaşına fəxri fərman təqdim edilmişdir.

AzərTAc

Azərbaycan.-2013.- 8 iyun.- S.9.