Əfqanıstan informasiya-kommunikasiya texnologiyaları sahəsində Azərbaycan ilə əməkdaşlığa maraq göstərir

BMT-nin İnkişaf Proqramının təşkilatçılığı ilə Əfqanıstan İslam Respublikasının rabitə və informasiya texnologiyaları naziri Əmirzai Sanginin başçılıq etdiyi nümayəndə heyətinin Bakıya səfəri çərçivəsində iyunun 10-da Rabitə və İnformasiya Texnologiyaları Nazirliyində görüş keçirilmişdir.

Rabitə və informasiya texnologiyaları naziri Əli Abbasov Azərbaycanda informasiya-kommunikasiya texnologiyaları (İKT) sektorunda görülmüş işlər və əldə olunan nəticələr barədə qonaqları məlumatlandırmışdır.

Bildirilmişdir ki, Azərbaycanın elektron-idarəçilik (e-idarəçilik) sahəsindəki nailiyyətləri bir çox ölkələr və beynəlxalq təşkilatlar tərəfindən yüksək qiymətləndirilir. Bu, ölkəmizin e-idarəçilik sahəsindəki potensialı və İKT sahəsindəki zəngin təcrübəsi ilə bilavasitə bağlıdır. İnkişaf etməkdə olan və keçid dövrünü yaşayan bir çox ölkələr Azərbaycanın uğurlu inkişaf modelini nəzərdən keçirir və onun təcrübəsindən yararlanmaq istəyirlər. Azərbaycanın Əfqanıstana dəstəyi özünü ən çox e-idarəçilik sahəsində büruzə verir. Dövlət başçısı İlham Əliyevin Əfqanıstana dəstək bəyanatlarından sonra Azərbaycan dost ölkə hökumətinin müvafiq qurumları ilə əməkdaşlığı daha da genişləndirmişdir.

Ə.Sangi qeyd etmişdir ki, Əfqanıstan hökuməti informasiya və kommunikasiya texnologiyaları sahəsində ölkəmiz ilə əməkdaşlığa böyük maraq göstərir. E-idarəçilik sahəsində nailiyyətləri nəzərə alınaraq, BMT-nin İnkişaf Proqramının ölkə üzrə nümayəndəlikləri bu istiqamətdə Azərbaycanın Əfqanıstana yardımına dəstək olmağa dair razılığa gəlmişlər.

Görüşdə Azərbaycanın İKT üzrə təcrübəsindən söhbət açılmış, iki ölkə arasında e-idarəçiliklə bağlı əməkdaşlığın perspektivləri müzakirə olunmuşdur.

AzərTAc

Azərbaycan.-2013.- 11 iyun.- S.6.