Azərbaycan Mətbuat Şurasının və «Vergilər» qəzetinin keçirdiyi fərdi jurnalist yazıları müsabiqəsinin qaliblərinin adları açıqlandı

Dünən Beynəlxalq Mətbuat Mərkəzində Azərbaycan Mətbuat Şurası və Azərbaycan Respublikası Vergilər Nazirliyinin "Vergilər" qəzetinin birgə elan etdiyi "Heydər Əliyev və Azərbaycanda vergi siyasəti" mövzusundakı müsabiqənin qaliblərinin mükafatlandırılması mərasimi keçirildi.

Tədbiri giriş sözü ilə açan Mətbuat Şurasının sədri Əflatun Amaşov bildirdi ki, Azərbaycanda müxtəlif istiqamətlərdə əldə olunan yüksək tərəqqi bilavasitə ümummilli lider Heydər Əliyevin müəyyənləşdirdiyi məqsədyönlü siyasi kursun nəticəsidir. Bu baxımdan onun rəhbərliyi altında aparılmış vergi siyasətini xüsusi vurğulamaq lazımdır: "Vergi islahatları özünün dinamizmi və beynəlxalq standartların tətbiqi ilə böyük uğur qazanıb və hazırda Azərbaycan çevik vergi modelinə malik ölkədir. Bu model sahəni tənzimləməyə imkan verir ki, mövcud prosesin idarə olunmasında Vergilər Nazirliyi özlüyündə olduqca effektiv sistem kimi çıxış edir. Nazirlik Heydər Əliyevin müəyyənləşdirdiyi xətti daim rəhbər tutaraq fəaliyyət göstərir. Bu gün burada toplaşmağımız da həmin xəttə sadiqliyin bir nümunəsidir. Nazirliyin "Vergilər" qəzeti Mətbuat Şurası ilə birgə fərdi jurnalist yazıları müsabiqəsi keçirib. Həmin müsabiqənin qaliblərinin adları məlumdur. Belə qərara gəlmişik ki, müsabiqəyə yazı verən hər kəs mükafatlandırılsın. Buna görə də mən hamını təbrik edirəm".

"Vergilər" qəzetinin baş redaktoru Anar Əliyev çıxışında müsabiqə ilə bağlı ətraflı məlumat verib. O bildirdi ki, həyata keçirilmiş təşəbbüsdə məqsəd Azərbaycanın müasir vergi sistemi ilə bağlı yenilikərin və məlumatların cəmiyyətə çatdırılmasında peşəkar jurnalist yaradıcılığını stimullaşdırmaqdan ibarətdir. A.Əliyev müsabiqəyə ümumilikdə 44 yazının təqdim olunduğunu vurğuladı.

Üç istiqamət üzrə birinci, ikinci və üçüncü yeri tutanlar mükafatlandırıldı. Sonra 35 jurnalist həvəsləndirici mükafata layiq görüldü. Qeyd edək ki, "Heydər Əliyev və Azərbaycanda vergi siyasəti" mövzusundakı müsabiqədə "Azərbaycan" qəzetinin "Parlament və Siyasət" şöbəsinin əməkdaşı Elnur Hacalıyev birinci yerə layiq görüldü.

Azərbaycan.-2013.- 11 iyun.- S.7.