Azərbaycan Prezidenti İlham Əliyev Malayziyanın xarici işlər nazirini qəbul etmişdir

Azərbaycan Respublikasının Prezidenti İlham Əliyev iyunun 11-də Malayziyanın xarici işlər naziri Anifah Amanı qəbul etmişdir.

Dövlət başçısı Malayziyanın xarici işlər naziri Anifah Amanın ölkəmizə səfərinin ikitərəfli əlaqələrin inkişafı ilə bağlı məsələlərin müzakirəsi üçün yaxşı fürsət yaradacağına ümidvar olduğunu bildirdi. Ölkələrimiz arasında siyasi əlaqələrin səviyyəsindən razılıq edən Prezident İlham Əliyev bu əlaqələrin iqtisadi sahədə də inkişaf etdirilməsi üçün yaxşı imkanların olduğunu dedi.

Malayziyanın xarici işlər naziri Anifah Aman Baş nazir Dato Sri Mohd Najibin salamlarını və ən xoş arzularını dövlət başçısına çatdırdı. O, səfəri çərçivəsində paytaxtımızda gedən böyük inkişaf proseslərinin şahidi olduğunu dedi.

Dövlət başçısı Malayziyanın Baş naziri Dato Sri Mohd Najibin salamlarına görə minnətdarlığını bildirdi, onun da salamlarını Malayziyanın Baş nazirinə çatdırmağı xahiş etdi.

AzərTAc

Azərbaycan.-2013.- 12 iyun.- S.1.