Uşaqların rifahı cəmiyyətin rifahının göstəricisidir

Azərbaycanda uşaqların müdafiəsi istiqamətində hüquqi baza təkmilləşdirilir

İyunun 11-də Milli Məclisin və Avropa Şurası Parlament Assambleyasının (AŞ PA) Sosial məsələlər, səhiyyə və davamlı inkişaf komitəsinin birgə təşkilatçılığı ilə "Uşaqların rifahı cəmiyyətin rifahının göstəricisidir" mövzusunda konfrans keçirilib. Tədbir Avropa Şurasının "Uşaqlara qarşı cinsi zorakılıqla mübarizədə parlamentlərin birliyi: "Hər beş uşaqdan biri" kampaniyası" çərçivəsində təşkil olunub.

Konfransda çıxış edən Milli Məclis Sədrinin müavini Bahar Muradova qeyd edib ki, Azərbaycanda uşaqlara qarşı zorakılığın aradan qaldırılması istiqamətində önəmli işlər görülür və ölkədə uşaq zorakılığı ilə mübarizə yüksək sosial status əldə edib. Uşaq zorakılığının yaranmasının əsas səbəbi uğursuz ailələrin sosial vəziyyətidir və bu səbəbdən maarifləndirmə işləri daha da genişləndirilməlidir. Bahar Muradovanın sözlərinə görə, uşaq hüquqlarının müdafiəsi, onlara yönəldilən kapital gələcəyin təməli deməkdir və Azərbaycan dövləti də bunu yaxşı anlayaraq uşaq hüquqlarının təminatı məsələsinə xüsusi əhəmiyyət verir: "Uşaq əməyinin istismarı, uşaqlara qarşı zorakılıq bizi çox narahat edir və bu sahədə Azərbaycan beynəlxalq konvensiyalara qoşulub, qanunverici bazanı təkmilləşdirib". Vitse-spiker bildirib ki, Azərbaycan müharibəyə cəlb olunmuş ölkədir və bu, milyondan artıq insanı qaçqın və məcburi köçkün vəziyyətinə salıb. Bu isə uşaqların rifahına olduqca mənfi təsir göstərir.

Parlamentin komitə sədrinin müavini, AŞ PA-nın Sosial məsələlər, səhiyyə və davamlı inkişaf komitəsinin üzvü Sevinc Fətəliyeva Azərbaycanda uşaq hüquqlarının müdafiəsi, dövlətimizin uşaqlara göstərdiyi qayğı barədə konfrans iştirakçılarına ətraflı məlumat verib, bu sahədə qarşıda duran vəzifələrdən danışıb.

Konfrans çərçivəsində AŞ PA-nın xüsusi Alt komitəsinin iclası, uşaqların cinsi zorakılıqdan qorunmaları üçün səmərəli tədbirlər, kiber mühitdə uşaqların təhlükəsizliyi, onlara qarşı zorakılıqla mübarizədə müxtəlif ölkələrin təcrübəsi mövzularında sessiyalar keçirilib.

AŞ PA-nın məruzəçisi Silvia Eloisa Bone Pero isə çıxışında AŞ PA-nın 2013-cü ilin aprel ayında keçirilmiş sessiyasında uşaqlara qarşı cinsi zorakılıqla mübarizədə parlamentlərin birliyi məsələsinin qaldırıldığını bildirib. Bu istiqamətdə "Hər beş uşaqdan biri" kampaniyasının gedişatı haqqında məlumat verən Bone Peronun sözlərinə görə, AŞ üzvü olan ölkələr insan hüquqları sahəsində yüksək göstəricilərə nail olmağa çalışmalıdırlar: "Uşaqlar cəmiyyətin zəif təbəqəsidir və hüquqların pozulması hallarına məruz qalırlar. Uşaqlar özlərini müdafiə edə bilmirlər, çünki onlar yaxınları tərəfindən zorakılığa məruz qalırlar".

Milli Məclisin Sosial siyasət komitəsinin sədri Hadi Rəcəbli çıxış edərək bildirib ki, Azərbaycanda uşaqlara qarşı zorakılıq hallarının aradan qaldırılması istiqamətində mübarizə tədbirlərinin artırılmasına ehtiyac var və bu çox vacibdir. O, bu məsələdə internetin, xüsusilə sosial şəbəkələrin mənfi rol oynadığını qeyd edib: "Ona görə də uşaqlar arasında internetə, sosial şəbəkələrdən istifadəyə müəyyən məhdudlaşdırmalar, qadağalar qoyulmalıdır. Bu, o demək deyil ki, Azərbaycanda internetə daxil olma məhdudlaşdırılır, sadəcə, uşaqlarla bağlı təhlükəli məqamlar bu addımın atılmasını zəruri edir".

Moldova parlamentinin deputatı, AŞ PA-nın Sosial məsələlər, səhiyyə və davamlı inkişaf komitəsi sədrinin müavini Valeriu Qiletçi isə bildirib ki, müxtəlif cinsi zorakılıq məsələsində məlumatlılığın artırılması, ən yüksək hüquq standartlarının təminatı əsas məsələdir. O, Bakıda keçirilən iclas çərçivəsində bu məsələlərin geniş şəkildə müzakirə edildiyini vurğulayıb.

"Uşaq hüquqlarının pozulması kimi faktlar bütün dünyada mövcuddur". Bunu isə Ailə, Qadın, Uşaq Problemləri üzrə Dövlət Komitəsinin sədr müavini Aynur Sofiyeva deyib: "Bu məsələdə əsas istiqamət dövlətin mövqeyidir. Bu gün də bu məsələ dövlətin prioritet istiqamətlərindəndir. Uşaq hüquqları haqqında çoxsaylı qanunlar qəbul olunsa da, cəmiyyətin bu məsələyə adekvat cavabını görməsək, uşaq hüquqlarının müdafiəsi üçün lazımi nəticə əldə edə bilməyəcəyik. Problemin aradan qaldırılması üçün gənc ailələrin maarifləndirilməsi lazımdır. Eləcə də, erkən nikahların bağlanması aradan qaldırılmalıdır".

"İl ərzində Azərbaycan Daxili İşlər Nazirliyinin "102 zəng xidməti"nə daxil olan 40 mindən artıq müraciətin 30 faizi ailə-məişət zəminində olan hüquqpozmalar ilə bağlıdır". Bu barədə Daxili İşlər Nazirliyinin Yetkinlik yaşına çatmayanlar arasında profilaktik işin təşkili şöbəsinin rəisi Kamal İmamverdiyev bildirib: "Bu ilin son 5 ayı ərzində ailə-məişət zəminində uşaqların məruz qaldığı hüquqpozmalar ilə bağlı 22 fakt qeydə alınıb. Buraya uşaqların döyülməsi, incidilməsi, işgəncəyə məruz qalması və sair daxildir. Bu faktlardan hər altısından birində uşaqların özü tərəfindən polisə məlumat daxil olub ki, bu da uşaqların hüquqlarını bilməsi, müdafiəsi baxımından bir yenilikdir. Statistik rəqəmlərə görə, il ərzində uşaqlara qarşı törədilən və müvafiq qaydada qeydiyyatdan keçərək istintaqı tamamlanmış cinayətlərin sayı təxminən 500-550-dir. Ailə-məişət zəminində uşaqların məruz qaldığı cinayətlər təxminən 7 faiz təşkil edir. Bu da təqribən 40-50 cinayət faktı deməkdir və təbii ki, digər MDB dövlətləri ilə müqayisədə böyük göstərici deyil".

Konfransın davamında Milli Məclis deputatlarının, xarici və yerli QHT nümayəndələrinin iştirakı ilə fikir mübadiləsi aparılıb.

Elgün MƏNSİMOV

Azərbaycan.-2013.- 12 iyun.- S.7.