«Mən Azərbaycanlıyam» milli intellektual bilik yarışmasının qalibləri mükafatlandırılmışlar

İyunun 13-də "Hilton" mehmanxanasında "Mən Azərbaycanlıyam" milli intellektual bilik yarışmasının üçüncü mövsümünün qaliblərinin mükafatlandırılması mərasimi keçirilmişdir.

AzərTAc xəbər verir ki, tədbirin əvvəlində "Mən Azərbaycanlıyam" mahnısının sədaları altında ulu öndər Heydər Əliyevdən bəhs edən videoçarx nümayiş olunmuşdur.

Gənclər və İdman, Rabitə və İnformasiya Texnologiyaları, Təhsil nazirliklərinin və "Azərbaycan Televiziya və Radio Verilişləri" Qapalı Səhmdar Cəmiyyətinin (AzTV) təşkilatçılığı ilə keçirilmiş "Mən Azərbaycanlıyam" televiziya yarışmasının üçüncü mövsümünün qaliblərinin mükafatlandırılması mərasimində gənclər və idman naziri Azad Rəhimov qalibləri təbrik etmişdir.

A.Rəhimov demişdir ki, milli bilik yarışması gənclərin vətənpərvərlik tərbiyəsində müstəsna əhəmiyyət kəsb edir. Nazir bu verilişə göstərilən xüsusi diqqət və qayğıya görə Azərbaycan Respublikasının Prezidenti Administrasiyasının rəhbəri, akademik Ramiz Mehdiyevə təşəkkürünü bildirmişdir.

Rabitə və İnformasiya Texnologiyaları (RİTN) naziri Əli Abbasov "Mən Azərbaycanlıyam" müsabiqəsinin iştirakçılarını təbrik edərək bildirmişdir ki, "İnformasiya-kommunikasiya texnologiyaları ili" çərçivəsində RİTN tərəfindən bu yarışmanın internet versiyası da istifadəyə verilmişdir. Nazir vurğulamışdır ki, televiziya müsabiqəsində 15-29 yaş həddi olsa da, internet müsabiqəsində yaş həddi yoxdur.

Bakı Dövlət Universitetinin (BDU) rektoru, Milli Məclisin deputatı, akademik Abel Məhərrəmov və AzTV-nin sədr müavini Faiq Hüsiyev müsabiqənin qaliblərini təbrik etmiş, layihəni yüksək qiymətləndirmişlər.

Sonra müsabiqənin birincisi adını qazanmış BDU-nun tələbəsi Fərahim Hüseynzadəyə, ikinci yerləri bölüşdürən Milli Aviasiya Akademiyasının tələbəsi Həmid Mehdiyevə və Qərb Universitetinin tələbəsi Naim Süleymanova, üçüncü yerin sahibi, Lənkəran Dövlət Universitetinin tələbəsi Nahid Bağırzadəyə fəxri diplomlar və mükafatlar təqdim olunmuşdur. Xatirə şəkli çəkdirildikdən sonra tədbir gənc müğənnilərin iştirak etdikləri konsert proqramı ilə təqdim olunmuşdur.

Azərbaycan.-2013.- 14 iyun.- S.4.