Misirin «Əş-Şuruq» qəzetində ulu öndər Heydər Əliyevin müdrik rəhbərliyindən bəhs edən məqalə dərc edilmişdir

Məqaləsinə "Susdurma və istibdadın ağrılarından inildəyən və sərvətləri talan olunan xalqlarda qurtulmaq istəyi və bu yöndə hərəkəti özünü qabarıq şəkildə büruzə verir. Ancaq həmin xalqlar onları önə aparacaq, təşkilatlandıracaq və azadlığa doğru yönəldəcək lideri gözləyirlər" sözləri ilə başlayan Əhməd Tarabik SSRİ-nin süqutundan sonra xüsusən də Bakıda müxtəlif partiyalar arasında hakimiyyət uğrunda amansız mübarizənin ölkədaxili siyasi və sosial-iqtisadi vəziyyəti sürətlə gərginləşdirdiyini və ölkəmizin həmin dövrdə vətəndaş müharibəsi astanasında olduğunu, yaranmış xaosdan istifadə edən Ermənistanın Azərbaycanı hərbi təcavüzə məruz qoyduğunu yada salmışdır.

Ə.Tarabik ölkədə hökm sürən xaosdan çıxış yolunu axtaran Azərbaycan xalqının ümummilli lider Heydər Əliyevə xilas çağırışı ilə müraciət etdiyini yazaraq, ulu öndərin bu çağırışı cavabsız qoymadığına diqqəti çəkmişdir.

1993-cü il iyunun 15-də Heydər Əliyevin Azərbaycan Respublikasının Ali Sovetinin sədri seçildiyini bildirən müəllif həmin günün müasir Azərbaycanın tarixinə Milli Qurtuluş Günü kimi daxil olduğunu oxucuların nəzərinə çatdırmış, ulu öndərin prezident vəzifəsinə seçildikdən sonra Ermənistanın işğal etdiyi ərazilərin bir qismini qaytarmağa müyəssər olduğunu, lakin o vaxtkı ölkədaxili iqtisadi durumun və beynəlxalq şəraitin bu missiyanı başa çatdırmağa imkan vermədiyini və Ermənistan ilə atəşkəs haqqında sənədin imzalandığını qeyd etmişdir.

Bundan sonra ulu öndər Heydər Əliyevin Azərbaycanın hərtərəfli inkişafına başlamaqla yanaşı, xarici ölkələrlə səmərəli əməkdaşlıq əlaqələri qurmağa müvəffəq olduğunu vurğulayan müəllif ümummilli liderin Ermənistan-Azərbaycan, Dağlıq Qarabağ münaqişəsi ilə bağlı həqiqətləri dünya birliyinin diqqətinə çatdırmaqla sonuncunun dəstəyinə nail olduğunu xüsusilə qeyd etmişdir.

Məqalədə, həmçinin SSRİ dövründə İslam dünyası ilə əlaqələrini itirmiş Azərbaycanın məhz ulu öndər Heydər Əliyevin hakimiyyəti illərində bu əlaqələri bərpa etdiyi, hətta genişləndirdiyi oxucuların diqqətinə çatdırılmışdır.

Asya HACIZADƏ,

AzərTAc-ın xüsusi müxbiri

Qahirə

Azərbaycan.-2013.- 19 iyun.- S. 5.