Nəqliyyat naziri Şirvan şəhərində vətəndaşları qəbul etmişdir

İyunun 19-da nəqliyyat naziri Ziya Məmmədov Şirvan şəhərindəki mədəniyyət evində bu şəhərdən, eyni zamanda, Neftçala, Hacıqabul, Sabirabad, Salyan, Saatlı, İmişli, Beyləqan və Füzuli rayonlarından olan vətəndaşları qəbul edərək onların şikayət və təkliflərini dinləmişdir.

AzərTAc xəbər verir ki, nazirliyin tabeli qurumlarının rəhbərlərinin də iştirak etdikləri qəbulda bu rayonlarda yaşayan sakinlərin müraciətinə baxılmışdır.

Görüşdə işə qəbul, kənd yollarının yenidən qurulması, magistral yolların çəkilişi zamanı pay torpaqlarının yol layihələrinə düşərkən konpensasiyanın ödənilməsi, eləcə də nazirliyin fəaliyyət istiqamətinə aid olan digər məsələlərlə bağlı müraciətlər dinlənilmişdir.

Qaldırılan məsələlərin demək olar ki, əksəriyyəti yerindəcə həll olunmuş, vətəndaşların digər müraciətləri əlaqədar köməklik göstərilməsi məqsədi ilə nazirliyin aidiyyəti qurumlarının rəhbərlərinə tapşırıqlar verilmişdir.

Bəzi vətəndaşların nazirliyin səlahiyyətlərinə aid olmayan, şəxsi xarakter daşıyan müraciətləri isə müvafiq təşkilatlara çatdırılmaq üçün qeydiyyata alınmış və nəzarətə götürülmüşdür.

Azərbaycan.-2013.- 20 iyun.- S.3.