Azərbaycan yeni üfüqlər qarşısında

Güclü lider -güclü Azərbaycan!

Bir neçə aydan sonra ölkəmizdə Prezident seçkiləri keçiriləcək. İddiaçılar çox olacaq. Bu, təbiidir. Çünki hər bir Azərbaycan vətəndaşı Konstitusiyaya uyğun olaraq seçkilərdə öz namizədliyini irəli sürə bilər. Demokratik ölkədə belə bir mənzərənin olması normaldır. Başqa cür demokratiya olmaz ki?! Alternativsiz demokratik seçki mümkün deyil! Yekun söz seçicinindir!

Namizədlərin istəkləri başadüşüləndir. Ancaq insan daşıya biləcəyi yükü götürər, bacardığı işin qulpundan yapışar. Götürə bilmədiyi yük adamın bel sütununu qırar. Azərbaycanda Prezident yükü çox ağır bir yükdür. Bu yükü ölkəmizdə kim daşıya bilər? Bu suala cavab vermək üçün yaxın tarixin təcrübəsinə diqqət yetirək.

Rəqabətə davamlı Azərbaycan dövləti yaradan Prezident

2003-cü ildə keçirilən Prezident seçkilərindən sonrakı dövr tarix baxımından qısa olsa da, həyata keçirilən tədbirlər, aparılan islahatlar və inkişaf baxımından bir çox ölkələrin yüz ildə keçdikləri yola bərabərdir. Bunu dərk etmək üçün hər şeydən əvvəl, Azərbaycanın həyatında baş verən bəzi əsaslı dəyişikliklərə nəzər yetirmək faydalı olardı. Prezident seçkilərində qələbə qazanan İlham Əliyevin hakimiyyətə gəlməsi ilə müasir Azərbaycan dövlətçiliyinin tarixində yeni bir dövr başladı. Bəs bu dövrün özünəməxsusluqları hansılardır?

Ötən 10 il Azərbaycanın daxili ictimai-siyasi, iqtisadi, mədəni həyatı və xarici siyasəti bir sıra özünəməxsusluqlarla əlamətdar oldu. Bu illər Azərbaycan Respublikasında dövlət quruculuğunda və xarici siyasətdə varisliyin, böyük dövlət və siyasət adamı, ulu öndər Heydər Əliyevin müəyyənləşdirdiyi strateji xəttin davam etdirilməsi, ölkənin müasirləşməsi və onun tərkib hissəsi kimi modernləşməsi illəridir. Hakimiyyətə gəldikdən sonra İlham Əliyev milli-mənəvi köklərdən ayrılmayaraq, tarixi varisliyə dayanaraq ölkənin müasirləşdirilməsini bir vəzifə olaraq qarşıya qoydu. Belə bir sual edilir: müasirləşmə Azərbaycana nə üçün lazımdır? Bu suala cavab vermək üçün tarixi keçmişə qısa nəzər yetirməkdə fayda vardır. Tarixin təcrübəsi göstərir ki, ölkənin zəngin təbii sərvətləri, çoxlu maliyyə vəsaitləri ola bilər. Lakin əgər dövləti idarə edənlər həmin təbii sərvətləri milli sərvətlərə çevirmirsə, yeni texnologiyaların tətbiqini həyata keçirmirsə, insanlar əməyi yadırğayırlarsa, ölkə digərlərindən geri qalır, rəqabətə tab gətirmir, zəifləyir və dağılmağa doğru gedir. Buna dair çoxlu nümunələr gətirmək olar. Məlum olduğu kimi, uzun tarix boyu mövcud olmuş xalqların və ölkələrin bir çoxu məhz zamanla ayaqlaşa bilmədikləri üçün və digər səbəblərdən hazırda dünyanın siyasi xəritəsində yoxdurlar! Yalnız tarix kitablarında adları qalıb! Zamanla uğurla ayaqlaşmağı, dövrün şərtlərinə uymağı və özüyaşayış şərtlərini irəli sürməyən xalqların çoxu hazırda söz sahibi deyillər. Arxa planda gəlirlər. Bir zamanlar Roma və Bizans imperatorluqları, Portuqaliya, İspaniya, Hollandiya, Osmanlı dövləti, Avstriya-Macarıstan dünya siyasətinə ya hökmranlıq edərdilər, ya da xeyli nüfuzlu idilər. Lakin zaman-zaman onların bəziləri həm dünyada gedən müasirləşmə proseslərinə uyğunlaşmadıqları, həm də amansız rəqabət şəraitində xarici güclərin təsiri altında zəiflədilər, bəziləri isə parçalandılar.

Beynəlxalq aləmdə Azərbaycan dövlətinin nüfuzu və təsiri artdı, ona maraq göstərən, əlaqələr qurmaq istəyən dövlətlərin sayı artdı. Dostları çoxaldı. Ötən illər göstərdi ki, Azərbaycan sözü ilə işi bir olan, ləyaqətli bir dövlətdir. O, yalnız öz maraqlarının yanında, daim haqq və ədalətin tərəfindədir.

Bir zamanlar Azərbaycan qaz təchizatı sarıdan digər ölkələrdən asılı vəziyyətdə idi. Həmin dövlətlər istədikləri vaxt Azərbaycana satdıqları qazı dayandırar və ondan siyasi təzyiq vasitəsi kimi istifadə etməyə çalışardılar. Ötən müddət ərzində Azərbaycanda yürüdülən siyasət nəticəsində bu vəziyyətə son qoyuldu. Azərbaycan enerji təhlükəsizliyini təmin edən ölkə oldu. Ərazisi baxımından kiçik, əhalisinin sayına görə bir çox ölkələrdən az olmasına baxmayaraq, Azərbaycan Respublikası Avropanın enerji təhlükəsizliyində mühüm rol oynayan bir ölkəyə çevrildi. Bakı-Tbilisi-Ceyhan neft, Bakı-Tbilisi-Ərzurum qaz kəmərləri təkcə iqtisadi deyil, böyük siyasi və strateji əhəmiyyət daşıyaraq Azərbaycanın müstəqilliyinin möhkəmləndirilməsində mühüm rol oynayan və dünya siyasətində rolunu artıran kəmərlər oldular. Transavropa və Transasiya dəmir yollarını birləşdirəcək Bakı-Tbilisi-Qars dəmir yolu layihəsi Azərbaycanı dünyanın tranzit, nəqliyyat və ticarət mərkəzlərindən birinə çevirəcək. Azərbaycan nəqliyyat təhlükəsizliyini təmin edən bir ölkədir.

Bir zamanlar Azərbaycan qonşu və bəzi uzaq xarici ölkələrin ucuz kənd təsərrüfatı malları üçün əlverişli satış bazarına çevrilmişdi. Ötən illər ərzində Azərbaycan uğurlu xarici ticarət siyasəti həyata keçirərək nəinki ərzaq təhlükəsizliyini təmin edən bir ölkəyə çevrildi, eyni zamanda xarici ölkələrə kənd təsərrüfatı məhsulları ixrac etməyə başladı.

Dünya siyasətinin, beynəlxalq münasibətlərin həm nəzəri, həm tarixi, həm də praktik baxımdan mahir bilicisi olması Azərbaycan Prezidentinə xarici siyasət sahəsində uğurlar gətirib. Planetar təfəkkürlü dövlət xadimi olan İlham Əliyev tariximizdə ilk dəfə olaraq "dövlət canlı orqanizmdir, daim genişlənməlidir" geosiyasi nəzəriyyəsini xarici ölkələrə sərmayələr qoymaqla, geniş əməkdaşlıq yolu ilə gerçəkləşdirdi. Bir zamanlar Azərbaycan borc istərdi, verməzdilər. Çünki sabaha ümid yox idi! İndi isə vəziyyət dəyişib. Azərbaycan borc alan ölkədən borc verən ölkəyə çevrilib!

Azərbaycan ənənəvi bazarlardan əlavə yeni bazarlarda yer tutur. Bir zamanlar ölkəmizi əlverişli satış bazarına çevirmək istəyən bəzi ölkələrin özləri Azərbaycan məhsulları üçün satış bazarına çevriliblər. Azərbaycan dövləti və şirkətləri xarici ölkələrdə mülklər alırlar. Bizim tariximizdə bunlar heç bir zaman olmamışdı. Artıq xaricdə qazanılan pullar Azərbaycana gəlir.

İlham Əliyevin başlıca məqsədlərindən biri Azərbaycanı inkişaf etmiş ölkələr cərgəsinə çıxarmaqdır! Bu da səbəbsiz deyildir! Çünki tarixi təcrübə sübut edir ki, yalnız dövlətin böyüklüyü böyük zənginliklər yaradır. Bu zənginliklər həyatın bütün sahələrinə aid olur. Təsir baxımından böyük olmayan dövlətlər böyük zənginliklər yarada bilmirlər. Azərbaycan Prezidentinin siyasəti nəticəsində Azərbaycan dövləti özündən böyük olan qonşu dövlətlərə təsir edən bir güc halına gəlib. Bəzi dövlətlər məhz Azərbaycan ilə yaxınlaşaraq özlərinin bir sıra problemlərini həll etmək və ya özlərini qorumaqda maraqlıdırlar.

Ötən illər ərzində ərazisinin bir hissəsinin işğal altında, qaçqın və məcburi köçkünlərin olmasına baxmayaraq, Azərbaycan yenidən qurulan, inkişaf edən bir ölkəyə çevrildi. Ölkədə geniş inşaat işləri aparıldı, qaçqın və məcburi köçkünlər üçün evlər tikildi. Başqa hər hansı bir ölkə belə vəziyyətdə olsaydı, çox ağır bir vəziyyətə düşərdi.

Azərbaycan Cənubi Qafqaz iqtisadiyyatının təqribən 75 faizini öz əlində cəmləşdirdi. İqtisadiyyatın neftdən asılılığına son qoymaq üçün addımlar atıldı.

Ölkəni xarici hərbi müdaxilədən qorumaq qabiliyyətində olan güclü ordu və müasir hərbi-sənaye kompleksi yaradıldı. Azərbaycan beynəlxalq silah sərgilərində özünəməxsus yer tutdu.

İlham Əliyev Azərbaycan xalqının minilliklər tarixində Qurucu Prezident adını qazandı. Əslində, ötən 10 ildə bir möcüzə yarandı. Dünyaya yeni bir model təqdim edildi. Bu, Azərbaycan möcüzəsi və modeli oldu!

Siyasətin məqsədi: Azərbaycan xalqının yaxşı yaşaması

İlham Əliyevin siyasətinin başlıca məqsədi xalqın daha yaxşı yaşamasıdır. Bu məqsədlə ictimai həyatın bütün sahələrində geniş islahatlar həyata keçirildi. Sosial dövlətin qurulması üçün başlanan islahatlar dərinləşdirildi. Bərabər imkanların yaradılması üçün ciddi tədbirlər reallaşdırıldı. Sovet dövrü başa çatdıqdan sonra yaranmış boşluqda Azərbaycan xalqının əməyi yadırğamasının qarşısı alındı. Yeni iş yerləri açıldı. Yoxsulluğun səviyyəsi aşağı salındı. Azərbaycan kasıblar ölkəsindən imkanlılar ölkəsinə çevrildi. Sabaha inam artdı. Gənclərə xüsusi qayğı göstərildi. Onların xarici ölkələrin ən qabaqcıl universitetlərində təhsil almalarına şərait yaradıldı.

Milli-mənəvi dəyərlərə qayğı

İlham Əliyevin hakimiyyətinin ilk 10 ilində milli-mənəvi dəyərlərimizə, qədim və zəngin Azərbaycan mədəniyyətinə yeni bir nəfəs gəldi. Azərbaycan maddi və qeyri-maddi irsinin bəzi nümunələri UNESCO-nun irs siyahısına daxil edildi. Azərbaycan Prezidenti xalqının dünya mədəniyyəti yaradan bir xalq olduğunu bir daha sübut edərək, ona böyük imkanlar açdı. Bu illər Azərbaycan mədəniyyətinin intibahı illəri oldu.

Ana dilinə qayğı Azərbaycan Prezidentinin fəaliyyətinin sahələrindən biri oldu. Qloballaşma şəraitində dövlət dilimizin qorunmasına dair sənədlər imzalandı.

Azərbaycan dünyəvi dövlət olsa, din dövlətdən ayrı olsa da, İlham Əliyev milli-mənəvi dəyərlərin qoruyucusu oldu. Yeni məscidlər tikildi. Dini ibadət yerləri bərpa edildi. Dinimizə və dini adət-ənənələrimizə qayğı dövlət rəhbərinin fəaliyyətinin mühüm sahələrindən birinə çevrildi. Din ilə dövləti qarışdırmadan onlar arasında qızıl ortanı müəyyənləşdirib hər ikisini inkişaf etdirmək Azərbaycan Prezidentinin böyük uğurlarından biridir.

Ölkəmizin paytaxt şəhərində Bayraq meydanı və muzeyi tikildi. Bununla da ölkədə bayraq ənənəsi yaradıldı. Bu, Azərbaycanın dövlət müstəqilliyinin daimi olacağına və bayrağının daim yüksəklərdə dalğalanacağına bir işarə idi. Yürüdülən siyasət nəticəsində xalqın milli ruhu yüksəldi və özünə inamı artdı. Xalq ilə dövlət arasında birlik, hakimiyyətin qanadları arasında səmərəli əməkdaşlıq quruldu.

Demokratikləşdirmə, vətəndaş cəmiyyətinin qurulması məqsədi ilə geniş islahatlar həyata keçirildi. Çoxpartiyalı sistemin əsasları möhkəmləndirildi. Azərbaycan bütün postsovet məkanında islahatların ən geniş və uğurla aparıldığı bir ölkə oldu.

Tariximizdə qürurverici İlklərə imza atmış təkrarsız dövlət xadimi və strateq

2003-cü ildən bəri İlham Əliyev tariximizdə bir sıra İlklərə imza atıb. O, BMT Baş Məclisində çıxış edən ilk Baş nazirimiz oldu. Etdiyi nitqində bir sıra məsələlərlə yanaşı, Şərqi Avropa ölkələri qrupundan bir dövlətin BMT Təhlükəsizlik Şurasına üzv seçilməsini təklif etdi.

Bu təklifini dövlət rəhbəri bir neçə il sonra gerçəkləşdirdi. 2011-ci ildə Azərbaycan BMT-nin 193 üzvündən 155-nin səsini alaraq Təhlükəsizlik Şurasının qeyri-daimi üzvü seçildi. İlham Əliyev Təhlükəsizlik Şurasının iclasına sədrlik edərək və ən vacib dünya məsələləri barədə nitq söyləyərək dünya müdiriyyətinə rəhbərlik etdi. Bu, Azərbaycan dövlətinin beynəlxalq nüfuzunun artmasının göstəricisi oldu, eyni zamanda, yeni imkanlar qazandırdı.

Azərbaycanın xəritədə axtarılmasına məhz İlham Əliyev son qoydu. Məlum olduğu kimi, vaxtilə Heydər Əliyev xarici ölkələrə səfərləri zamanı xəritə qarşısında dayanaraq Azərbaycan haqqında danışardı. Tarixində bəlkə də ən mükəmməl şəkildə Azərbaycanda keçirilən "Eurovision" mahnı yarışması zamanı tariximiz, maddi və mənəvi mədəniyyətimiz ən yaxşı bir şəkildə təbliğ edildi. Biz heç bir zaman belə təbliğ edilməmişdik! Bu, qürurverici bir İlk idi!

İlham Əliyevin hakimiyyətinin ilk 10 ilində Azərbaycan işğal edilmiş ərazilər istisna olmaqla ərazisində xarici hərbi baza və ya obyekt saxlamayan bir ölkəyə çevrildi. Qəbələ Radiolokasiya Sisteminin fəaliyyətinin dayandırıldığı 2012-ci ilin 10 dekabr günü müasir tariximizdə bəlkə də 1991-ci ilin 18 oktyabrı qədər əhəmiyyətlidir. Uzun illər keçdikdən sonra bu tarixin böyüklüyü daha yaxşı bilinəcək.

Son illərdə müasir tariximizdə bir zamanlar xəyalımıza gəlməyən bir İlkə imza atıldı. Azərbaycan kosmosa ilk peykini göndərərək Kosmos klubunun üzvü oldu. Bu, artıq ölkənin fərqli bir inkişaf mərhələsi demək idi. Geosiyasətçilərin fikrincə, səmaya nəzarət edən yerə də nəzarət edir. Azərbaycan informasiya təhlükəsizliyini təmin edən ölkə oldu.

İlham Əliyev ölkə idmanına qayğı göstərərək, onun dünyada uğrular qazanmasına müstəsna qayğı göstərdi. Olimpiya oyunlarında və dünya çempionatlarında Azərbaycan idmançılarının qazandıqları medalların sayı artdı. Üçrəngli, ay-ulduzlu bayrağımız dünyanın müxtəlif ölkələrində dalğalandı. Azərbaycanın 2015-ci ildə Birinci Avropa Olimpiya Oyunlarına ev sahibliyi etməsi hər bir azərbaycanlı üçün qururverici olacaqdır. Bütün dünyanın gözü Azərbaycanda olacaq! Bu, həm ölkənin təbliğatı, həm də millətin fiziki tərbiyəsi üçün bir təşviq vasitəsi olacaq.

Bəs bütün bunlara necə nail olunub? İş üslubu

Bu İlkləri gördükdən sonra insan düşünür: bəs bütün bunlara necə nail olunub? Axı, Azərbaycanın coğrafiyası, təbii sərvətləri və insanı əvvəlki illərdəki kimi idi! Heç şübhəsiz, bütün bunlar göydəndüşmə, birdən-birə olmadı. İndiki vəziyyətə gətirən yol asan və rahat deyildi! Ona nail olmaq üçün böyük əmək sərf edilib! Bu səviyyəyə yalnız təbii sərvətlərin hesabına deyil, onun milli sərvətə çevrilməsi və səmərəli istifadə edilməsi nəticəsində nail olunub. Bunlar isə bilavasitə dövlət idarəçiliyi ilə bağlı məsələlərdir.

Ölkənin indiki inkişaf səviyyəsinə gəlib çıxması Azərbaycan Prezidenti İlham Əliyevin planetar təfəkkürünün, geniş və yorulmaz fəaliyyətinin, ona məxsus olan yaradıcı iş üslubunun nəticəsidir. İlham Əliyevin fəaliyyəti göstərdi ki, o, milli-mənəvi köklərə dayanaraq ölkəsinin müasir dünya ilə ayaqlaşması üçün ən səmərəli və faydalı tədbirləri düşünən və həyata keçirən yenilikçi, dərin islahatçı dövlət xadimidir. Ölkə həyatının inkişafdan geri qalan, onunla ayaqlaşmayan sahələrinin olduğunu təkcə mükəmməl deyil, eyni zamanda onların inkişaf yollarını, problemlərin həlli üsullarını dəqiqliklə bilən İlham Əliyev yürütdüyü siyasət nəticəsində Azərbaycan bu səviyyəyə gəlib çatıb.

Tələbkarlıq, ciddiyyət və qayğıkeşlik Azərbaycan Prezidentinin iş üslübunun tərkib hissələrindın biridir. Dövlət rəhbəri məmurlara qarşı nə qədər tələbkar və ciddidircə, xalqa münasibətdə bir o qədər sadə və təvazökardır. O, təkcə böyük dövlət xadimi deyil, eyni zamanda, əsl sadə xalq adamıdır.

Azərbaycan Prezidenti işin nəticəsini yerində yoxlayan, həyata keçirilən hər hansı bir işdə əhalinin maraqlarını, rahatlığını və istirahətini nəzərə alan dövlət adamı kimi rəğbət qazanıb.

Hamının Prezidenti

Azərbaycan Prezidenti mövqeyi açıq, siyasəti isə çevik olan bir dövlət xadimidir. O, ölkəsini digər dövlətlər üçün qarşıdurmalar, intriqalar deyil, əməkdaşlıq meydanına çevirib. Bununla da bir-biri ilə əsrlər boyu didişən ölkələr Azərbaycanda bir araya gəliblər.

Yorulmazlıq Azərbaycan dövlət rəhbərinə xas olan başlıca keyfiyyətlərdən biridir. Azərbaycan Prezidentinin dəfələrlə Bakıda beynəlxalq toplantılarda iştirak etdikdən və nitq söylədikdən sonra rayonlara səfər etməsinin, yeni inşa edilmiş sənaye, kənd təsərrüfatı, təhsil, səhiyyə, mədəniyyət müəssisələrini açmasının, xalq ilə görüşlərinin şahidi olmuşuq.

Məlum olduğu kimi, tarix boyu insanlar həmişə ədalətli hökmdar, rəhbər axtarışında olublar. Ötən 10 il İlham Əliyevin ədalətli dövlət xadimi olduğunu göstərdi! Azərbaycan Prezidentinə düşmənçilik, kin-küdurət yaddır! O, ona səs verənin də, verməyənin də Prezidenti olmaqla Azərbaycan cəmiyyətinə yeni bir nəfəs gətirib. Məhz onun hakimiyyətinin ilk 10 ilində keçmiş prezidentlər haqqında qanun layihəsi müzakirə edilərək qəbul edildi. Bu, Azərbaycan cəmiyyətində bir-birinə qucaq açma və dövlətçilik tariximizdə dərin ənənələrin əsasının qoyulması oldu.

Avropanın və dünyanın bir sıra ölkələrinin böhrandan əziyyət çəkdiləri, iş yerlərini ixtisar etdikləri bir zamanda Azərbaycanın inkişaf etməsi yalnız yürüdülən siyasətin nəticəsidir. Lakin Azərbaycan problemlərsiz də deyil! Bu, böhrandan, geriləmədən deyil, inkişafdan doğan problemlərdir. İnsanlar bu gün dünənkindən, sabah bugünkündən daha yaxşı yaşamaq istəyirlər. Buna isə yalnız sevinmək lazımdır. Həyat standartları əvvəlki illərə nisbətən xeyli yüksəlib.

Azərbaycanın başlıca problemi Ermənistanın təcavüzü nəticəsində yaradılmış Dağlıq Qarabağ münaqişəsidir. Bir məsələni açıq söyləmək lazımdır: nəinki Dağlıq Qarabağdakı separatçı rejimin, həmçinin Ermənistanın özünün də əraziləri işğal etmək gücündə olan insan, maliyyə ehtiyatları, hərbi sənaye kompleksi yoxdur! Dövlətin qüdrəti məsələsində heç Azərbaycana yaxın da gələ bilmir! Onda soruşulur: bəs hansı ölkə və nə üçün Azərbaycan ərazilərini işğal edib? Cavab isə aydındır. Azərbaycan Ermənistan ilə təkbətək qalarsa, işğal altında olan ərazilərini qısa müddətdə azad edə bilər. Ancaq münaqişənin indiyədək həll edilməməsi məsuliyyəti bu məsələ ilə məşğul olan qurumların üzərinə düşür.

Alternativ varmı? Yoxdur!

Soruşulur: Azərbaycanda yürüdülən siyasətin alternativi varmı? Bu siyasətdən başqa hər hansı bir siyasət Azərbaycanı dağıtmaq, milli dövləti məhv etmək, ölkəni və xalqı parçalamaq, vətəndaş müharibəsinə sürükləmək, onu rəzil günə salmaq yoludur! Azərbaycan xalqı həmin yolu heç bir zaman qəbul etməz!

Ötən illərin təcrübəsi göstərdi ki, Azərbaycanda xalqın maraqlarına cavab verən bu davamlı sabit inkişaf yolunun alternativi yoxdur! Ölkə və xalq xaos, anarxiya, sarsıntılar, inqilablar deyil, islahatlar, təkamül yolu ilə inkişaf etməlidir! Heydər Əliyevin əsasını qoyduğu siyasi xətdən kənara çıxmaq Azərbaycana böyük fəlakətlər gətirər, həm də qonşu dövlətlər üçün arzuolunmayan proseslərin başlanması olar. Bu siyasətin davam etdirilməsi həm Azərbaycan xalqının, həm qonşu dövlətlərin, həm də bütün demokratik ölkələrin maraqlarına uyğundur.

Bəzi inkişaf etmiş xarici ölkələrin ibrətamiz bir seçki təcrübəsi var. Prezidentliyə namizəd dostu, qonşusu, partiya yoldaşı olsa da, səs verən şəxs son anda qərar qəbul edərkən özünə belə bir sual verir: namizədlərdən hansı xalqını və dövlətini beynəlxalq aləmdə daha yaxşı təmsil edər, işi bacarar ki, onun hərəkətlərinə və fəaliyyətinə baxarkən qürur hissi keçirə bilərəm? Buna uyğun da səs verir. Ötən 10 ildə İlham Əliyev atdığı bütün addımları ilə millətimizə qürur verdi, başını uca etdi. İnanıram ki, hansı siyasi partiyanın, hətta müxalifət partiyalarının üzvü olmalarından asılı olmayaraq, bütün seçicilər belə hərəkət edəcək!

Tarixən belə olub: işi səmimiliyini müəyyənləşdirmək mümkün olmayan "vətəni, torpağı, xalqı sevirəm" kimi sözlər deyənlərə deyil, onu bacarana, ustasına tapşırıblar. "Sevmək" mücərrəd bir şeydir, sabah nifrətə də çevrilə bilər! Bacarmaq isə danışmaq deyil, milyonların gözlərinin önündə görülən konkret işdir! Son 10 ilin təcrübəsi belə bir ibrət verdi: İlham Əliyev təkcə Azərbaycanı sevməklə kifayətlənmədi, onu qabaqcıl bir dövlət və xalqını isə böyük bir xalq etmək üçün nəhəng işləri görməyi bacardı! Azərbaycanı yeni üfüqlərin astanasına çıxardı!

Elə isə bacaranlar iş başında olmalıdırlar!

Musa QASIMLI,

Milli Məclisin deputatı, professor

Azərbaycan.-2013.- 21 iyun.- S.5.