Gürcüstan Prezidenti Naxçıvan Muxtar Respublikası Ali Məclisinin Sədri
ilə görüşmüşdür
Gürcüstan
Prezidenti Mixeil Saakaşvilinin Azərbaycana rəsmi səfəri
Fevralın
28-də Azərbaycana rəsmi səfəri çərçivəsində
Naxçıvana gələn Gürcüstan Prezidenti Mixeil Saakaşvili
muxtar respublika Ali Məclisinin sədri Vasif Talıbov ilə
görüşmüşdür.
Ali Məclisin
Sədri Muxtar Respublikanın statusu, ərazisi, əhalisi, idarəetmə
quruluşu, elm və təhsil müəssisələri,
sosial-iqtisadi inkişafı barədə ali qonağa ətraflı
məlumat vermişdir. Vasif Talıbov bildirmişdir ki, Azərbaycan
və gürcü xalqları ən qədim dövrdən
sıx dostluq münasibətlərinə malik olmuşlar.
Naxçıvan və Acarıstan muxtar respublikaları
arasında dostluq əlaqələrinin hazırkı səviyyəsi
məmnunluq doğurur. Naxçıvan və Acarıstan muxtar
respublikaları arasında mədəniyyət, turizm, təhsil,
səhiyyə, iqtisadiyyat, ticarət, sənaye və nəqliyyat
sahələrində əlaqələrin genişləndirilməsi
üçün yaxşı əsaslar vardır.
Naxçıvana
səfərindən məmnunluğunu bildirən
Gürcüstan Prezidenti Mixeil Saakaşvili ulu öndər Heydər
Əliyevin iki ölkə arasındakı əlaqələrin
inkişafına misilsiz töhfələr verdiyini
vurğulamışdır. Gürcüstan Prezidenti Azərbaycanın,
o cümlədən Naxçıvan Muxtar Respublikasının
sürətlə inkişaf etdiyini bildirmişdir. "Azərbaycanlılar
ölkələrini çox sevirlər" deyən Mixeil
Saakaşvili Bakıda Prezident İlham Əliyev ilə
uğurlu görüşlər keçirdiyini qeyd etmişdir.
Vurğulamışdır ki, ölkəsini belə inkişaf
etdirmək hər bir liderin arzusudur. İnanıram ki, Azərbaycan
gələcəkdə daha da inkişaf edəcəkdir.
AzərTAc
Azərbaycan.-2013.- 1 mart.- S.5.