Sumqayıtda ötən ilin sosial-iqtisadi yekunları müzakirə edilmişdir

Dünən Sumqayıtda 2012-ci ilin sosial-iqtisadi inkişafının yekunlarına və qarşıda duran vəzifələrə həsr olunan hesabat yığıncağı keçirilmişdir.

Yığıncaqdan əvvəl Sumqayıt Şəhər İcra Hakimiyyətinin başçısı Eldar Əzizov KİV nümayəndələri ilə görüşdə bildirdi ki, ötən ili uğurla yola salan sumqayıtlılar gələcəyə nikbin yanaşırlar. Qarşıda duran vəzifələrin yerinə yetirilməsində yeni qüvvə ilə çalışmaq gərəkdir və belə olduğu halda hər şeyə nail olmaq mümkündür.

Ötən ilin yekunlarına və 2013-cü ildə qarşıda duran vəzifələrə həsr edilən ümumşəhər toplantısında çıxış edən Eldar Əzizov iştirakçıların nəzərinə çatdırdı ki, dinamik inkişaf dövrünü yaşayan respublikamızda qazanılan müvəffəqiyyətlər davamlı şəkildə artmaqdadır. Dünyada Azərbaycanın iqtisadi inkişafının fenomenal xarakter daşıdığı qəbul olunmaqda, onun səciyyəvi xüsusiyyətləri geniş rakursdan öyrənilməkdədir. Sosial-iqtisadi inkişaf dövrünü yaşayan Azərbaycan qazandığı müvəffəqiyyətləri davamlı şəkildə genişləndirməkdə və yeni xarakterli nailiyyətlərin müəllifi kimi çıxış etməkdədir. Bu gün Azərbaycanın inkişaf modeli dünya dövlətlərində maraqla qarşılanır, aparıcı beynəlxalq təşkilatlar tərəfindən araşdırılır. Bu gün ölkənin həyatında qeyri-neft sektorunun inkişafına diqqət artıb.

Natiq vurğuladı ki, Azərbaycan üçün xarakterik cəhətlərdən biri də yaşanan sürətli tərəqqinin hər bir ölkə vətəndaşının həyatında özünü bariz formada əks etdirməsi, insanların rifah halının yüksələn xətt üzrə inkişaf etməsidir. Son illər aparılan uğurlu iqtisadi siyasət nəticəsində Azərbaycanın beynəlxalq nüfuzu daha da artmışdır. Respublikada yaşanan inkişaf Azərbaycanın sosial-iqtisadi həyatında özünəməxsus çəkiyə malik olan Sumqayıt şəhərinin simasında da aydın müşahidə olunur.

E.Əzizov bildirdi ki, ölkə başçısının tapşırıq və tövsiyələri şəhərdə həyata keçirilən bütün layihələrin mənbəyidir. Əldə edilən nailiyyətlərin hamısı əhalinin rifah halının yüksəlməsinə, maddi vəziyyətlərinin yaxşılaşmasına yönəlmişdir.

Daha sonra hesabat məruzəsində söylənilənləri əks etdirən, son bir il ərzində həllini tapan məsələlərə həsr olunan sənədli film göstərildi. Videogörüntülərin nümayişindən sonra şəhər icra aparatının məsul nümayəndəsi Sahib Quliyev 2012-ci ildə Sumqayıt şəhəri üzrə əldə olunan uğurların bəzi məqamlarını müşavirə iştirakçılarının diqqətinə çatdırdı. Şəhərin ötən ildə əldə etdiyi nailiyyətləri S.Quliyev statistik göstəricilərlə təsdiqlədi.

Tədbirdə iştirak edən şəhər sakinləri Aygün Rəhimova, Elşad Şıxməmmədov, Əjdər Qafarov, Famil Həsənov, Mətanət Məmmədova və digərləri şəhərin müxtəlif mikrorayon və məhəllələrində qarşılaşdıqları problemlərlə bağlı müraciət etdilər. Zalda quraşdırılan mikrafonlar vasitəsilə verilən bütün suallar müəssisə və təşkilat rəhbərləri tərəfindən cavablandırıldı. Şikayətlərlə bağlı elə yerindəcə müvafiq təşkilatların rəhbərlərinə tapşırıqlar verildi.

Tədbirdə Prezident Administrasiyasının məsul işçisi Əlibaba Əliyev iştirak etmişdir. Tədbirin sonunda Azərbaycan Prezidenti İlham Əliyevə müraciət qəbul olundu.

Akif ƏLİYEV

Azərbaycan.-2013.- 2 mart.- S.5.