Ağstafanın ağ günləri

Yaşıllıqlar qoynunda dəyərli bir obyektin təməli qoyulub. İki hektar sahədə Azərbaycan tarixi və müasir memarlıq abidələri parkı yaradılır. Bu, müstəqil dövlətimizin canlı tarixinin real təcəssümü olacaqdır. Turizmin sürətlə inkişaf etdiyi bir dövrdə ölkəmizin şanlı tarixini və milli memarlıq ənənələrini daha yaxından tanıtmağa imkan verəcəkdir.

Son vaxtlarda rayonda bir-birindən maraqlı layihələr həyata keçirilir. Ötən il Heydər Əliyev parkının, ulu öndərin möhtəşəm abidə kompleksinin, Bayraq meydanının, gənclər mərkəzinin, S.Vurğun adına parkın, "Kitab" abidə kompleksinin, yazıçılar evinin, YAP rayon təşkilatının inzibati binalarının açılışı oldu. Cari ildə abadlıq və quruculuq tədbirlərinin miqyası daha genişdir.

Ağstafa rayonunun sosial-iqtisadi inkişafının sürətləndirilməsinə dair əlavə tədbirlər haqqında Prezident İlham Əliyevin 13 aprel 2012-ci il tarixli sərəncamının icrası sayəsində abadlıq və quruculuq işləri yeni vüsət almışdır. Ağstafa əsl inşaat meydanına bənzəyir. Heydər Əliyev prospekti, mərkəzi küçələr, parklar əsaslı şəkildə yenidən qurulur, hər yanda müasir işıqlandırma sistemi quraşdırılır. Asfalt örtüyü çəkilir, üzlük piltələr döşənir, yaşıllıq zonaları yaradılır, səkilər sahmana salınır.

Ötən ilin yekunları və cari ildə qarşıda duran vəzifələr müzakirə olunarkən bu barədə geniş söhbət getdi. Yekdilliklə qeyd olundu ki, regionların sosial-iqtisadi inkişafı Dövlət Proqramının tələblərinə uyğun olaraq, rayonda sosial problemlərin həllinə xüsusi diqqət yetirilir. İşıq, qaz, su sarıdan rayonun elə bir qayğısı yoxdur. Hazırda şəhərin mərkəzində içməli su və kanalizasiya sistemi yenidən qurulur. 462 fərdi və çoxmənzilli yaşayış binalarının dam örtüyü dəyişdirilib. Qarabağ müharibəsi əlilləri və şəhid ailələri üçün 89 mənzilli iki yaşayış binası istifadəyə verilib. Qəzalı vəziyyətdə olan binalarda yaşayan sakinlər üçün 129 mənzilli yeni yaşayış kompleksi inşa olunur.

Hazırda ən önəmli işlərdən biri yol təsərrüfatının yenidən qurulması ilə bağlıdır. Ağstafa rayonunda da bu sahədə çox iş görülür. Poylu-Xətai-Yenigün-Aşağı Göyçəli avtomobil yolunun inşası hamının ürəyindən xəbər verir.

Dövlət başçısının sərəncamı ilə strateji əhəmiyyətli Ağstafa-Poylu-Böyük Kəsik avtomobil yolunun inşası üçün 2,3 milyon manat vəsait ayrılmışdır. 54 kilometrlik bu yol Ağstafa rayonunun mərkəzi ilə Gürcüstanın dövlət sərhədinədək inşa olunacaq, bu yoldan istifadə edən sürücülərə və sərnişinlərə, həmçinin 14 kəndin sakinlərinə rahatlıq gətirəcək.

Rayonda təhsil, səhiyyə və mədəniyyət müəssisələrinin maddi-texniki bazasının möhkəmləndirilməsinə də xüsusi fikir verilir. Toplantıda qeyd olundu ki, hesabat ili ərzində 4 nömrəli uşaq bağçasında, şahmat məktəbində, Tatlı və Duzqışlaq kənd məktəblərində təmir-bərpa işləri görülmüş, Göyçəli, Söyüdlü, Köçəsgər kənd məktəbləri üçün əlavə korpuslar inşa edilmişdir.

Ağstafa rayonunda əhali əsasən kənd təsərrüfatı ilə məşğuldur. Respublika Prezidentinin "Kənd təsərrüfatı məhsullarının istehsalçılarına dövlət dəstəyi haqqında" sərəncamına uyğun olaraq rayonda bir sıra tədbirlər həyata keçirilir. Azərbaycan İnvestisiya Şirkətinin Almaniya şirkətləri ilə birgə yaranmış "AğstafaAqroServis" müəssisəsi təkcə Ağstafada yox, bütün qərb bölgəsində aqrar sektorun inkişafına güclü təkan verir.

Aqrar bölmənin inkişafı sahəsində ən önəmli yeniliklərdən biri "Ağstafa süd" kompleksinin tikintisi ilə bağlıdır. 6500 hektar ərazini əhatə edəcək bu müasir kompleksdə 6600 baş mal-qara saxlanılacaq, yem və heyvandarlıq təsərrüfatı, süd emalı zavodu və s. fəaliyyət göstərəcək. Yeni layihənin tərkib hissəsi kimi Ağstafada 30 min tonluq taxıl anbarı, saatda 30 ton istehsal gücünə malik buğda emalı müəssisəsi, çörək və qənnadı məmulatları zavodlarının inşası nəzərdə tutulub. Bütün bu işlər başa çatanda 300-ə yaxın iş yerinin açılmasına şərait yaranacaq.

İl ərzində sistemli surətdə həyata keçirilməsi nəzərdə tutulan tədbirlər çoxdur. YAP rayon təşkilatının sədri Ramiz Tatarlı dedi ki, il ərzində milli adət-ənənələrin təbliği məqsədilə kütləvi tədbirlərin təşkilinə də xüsusi diqqət yetiriləcək, respublika Mədəniyyət və Turizm Nazirliyi ilə birgə "Saz bayramı", habelə məhsul yığımı başa çatanda İqtisadi inkişaf və Kənd təsərrüfatı nazirlikləri ilə birgə taxıl bayramı keçiriləcək.

Bir sözlə, Qazax rayonu ilə yanaşı, qərb bölgəsinin qapısı sayılan Ağstafanın ağ günləri hələ öndədir.

Əhməd İSAYEV

Azərbaycan.-2013.- 7 mart.- S.5.