Diqqət və zəhmətin nəticəsi inkişafdır

Həmişə yaşıllığı, səliqə-sahmanı ilə seçilən Astara son illər daha da abadlaşır. Ölkəmizin cənub qapısı sayılan bu məkan indi onun qonağı olanlarda unudulmaz xoş hisslər oyadır. Çünki ana təbiətin hüsnünə sığal çəkdiyi Astara insan əməyi sayəsində günbəgün inkişaf edir, tikilən binalar, salınan parklar, xiyabanlar onun hüsnünə xüsusi yaraşıq qatır.

Artıq tarixə çevrilən 2012-ci il də rayonun sosial-iqtisadi həyatında mühüm rol oynamışdır. Rayon icra hakimiyyətinin başçısı Qəzənfər Ağayev deyir ki, keçən ilin martında Prezidentin Astaraya növbəti səfəri, əhali ilə səmimi görüşləri uzun müddət yaddaşlardan silinməyəcək. "Ölkə başçısının Astara Olimpiya İdman Kompleksinin, YAP rayon təşkilatının yeni inzibati binasının, əsaslı təmir olunan rayon mərkəzi xəstəxanasının, Kijəbə-Ojakəran, Kijəbə-Qəcimardə avtomobil yolunun açılışında iştirakı astaralıların sevincini birə-beş artırdı"- deyən Q.Ağayev qeyd etdi ki, ötən ilin son günlərində Prezident astaralıları daha bir sərəncamı ilə sevindirdi. Dövlət başçısının Ərçivan kəndinə qəsəbə statusunun verilməsi barədə imzaladığı sərəncam bir daha sübut etdi ki, Astara rayonunun inkişafı ölkə rəhbərinin qayğısı ilə əhatə olunmuşdur.

Bütün bu və digər faktlar barədə ilin yekunları və cari il qarşıda duran vəzifələrlə bağlı keçirilən yığıncaqda ətraflı söhbət getdi. Müzakirə olunan məsələlərlə əlaqədar çıxış edən RİH başçısı Q.Ağayev bildiridi ki, 2012-ci ildə rayonun yerli gəlirləri 2,3 milyon manat əvəzinə 3,1 milyon, xərcləri isə 16,3 milyon manat əvəzinə 15,9 milyon manat olmuşdur. "Rayonda inşaat işlərinin aparılması üçün bütün maliyyə mənbələrindən əsas kapitala 23,1 milyon manat məbləğində vəsait yönəldilmişdir. Tikinti-quraşdırma işlərində istifadə edilən vəsaitin həcmi isə 21 milyon manata çatmışdır. Həmin vəsait hesabına bir çox təmir-bərpa və yenidənqurma işləri görülmüşdür. O cümlədən ictimai yaşayış binalarının fasadları əsaslı təmir edilmiş, sıradan çıxmış kanalizasiya və su xətləri dəyişdirilərək yenisi ilə əvəz olunmuşdur. Bunlardan əlavə, bir sıra binanın, həmçinin Tarix Diyarşünaslıq Muzeyinin dam örtüyü dəyişdirilmiş, Heydər Əliyev parkı genişləndirilmiş, orada fəvvarə quraşdırılmış, yeni oturacaqlar qoyulmuşdur. Ümumiyyətlə, parkın ərazisində olan bütün binalarda təmir işləri aparılmış, fasadları müasir memarlıq üslubunda qurulmuş, habelə şəhərin küçə və meydanlarında yeni işıqlandırma sistemi quraşdırılmışdır" - deyən məruzəçi Heydər Əliyev prospektinin girişində genişləndirmə işlərinin aparıldığını, yolun hər iki tərəfində yeni hasarlar hörüldüyünü, prospektdə Astara Vergi Terminalı üçün inzibati binanın tikildiyini nəzərə çatdırdı.

Q.Ağayev bu cür işlərin bütün rayon ərazisini əhatə etdiyini söylədi. Toradi kənd məktəbi üçün yeni binanın tikilib istifadəyə verildiyini deyən məruzəçi hazırda Şuvi, Vaqo, Siyaku, Hamoşam, Suparibağ, Telman, Sağlazüzə, Asxanakəran, Motlayataq və Rudəkənar kəndlərində də məktəb binalarının inşa olunduğunu xatırlatdı.

Əhalinin işlə təmin edilməsi sahəsində mühüm nailiyyətlər əldə edildiyini və son 8 ildə rayon üzrə 5,3 mindən çox iş yeri açıldığını vurğulayan Q.Ağayev təkcə keçən il 460 daimi iş yerinin yaradıldığını bildirdi.

RİH-in başçısı ötən il kənd təsərrüfatı sahəsində əldə olunan nəticələrdən də söz açdı: "Kənd təsərrüfatı məhsulları istehsalçılarına dövlət dəstəyi haqqında" Azərbaycan Respublikası Prezidentinin müvafiq sərəncamına uyğun olaraq 2012-ci ildə buğda əkininə və məhsul istehsalında sərf olunan yanacaq və motor yağlarına görə 846 nəfər fermer və fiziki şəxsə ümumilikdə 85,6 min, əlavə olaraq buğda və çəltik istehsalçılarına 8,4 min manat subsidiya ödənilmişdir. Rayonda çəltikçiliyin inkişafına göstərilən diqqətin nəticəsidir ki, ötən il 5 min 600 ton məhsul istehsal olunmuşdur".

"Rayonda sahibkarlığın inkişafına daim diqqət və qayğı göstərilir. Sahibkarlığa mane olan lüzumsuz müdaxilələrin qarşısının alınması və yeni biznes layihələrinin həyata keçirilməsində onlara yaxından kömək göstərilməsi üçün tədbirlər həyata keçirilir" - deyən məruzəçi onu da qeyd etdi ki, 2004-2012-ci illərdə Sahibkarlığa Kömək Milli Fondu tərəfindən 51 sahibkara 2,3 milyon manat güzəştli kredit verilmişdir. Q.Ağayev ilk dəfə olaraq iş adamı tərəfindən şəhərin mərkəzində 9 mərtəbəli yaşayış binasının tikildiyini də müsbət fakt kimi dəyərləndirdi.

Sosial məsələlərdən danışan məruzəçi bildirdi ki, rayonda təbii qazdan istifadə edənlərin sayı 11,5 min abonentə çatmışdır: "İl ərzində rayonun Şovaş və Siyatük kəndlərinə yeni qaz xətləri çəkilmiş, 250 abonentə təbii qazın verilməsi təmin edilmişdir. Hazırda Astara şəhəri, Kijəbə və Ərçivan qəsəbələrində qaz xətləri dəyişdirilərək yenisi ilə əvəz olunur. Sərək, Şüvi, Səlivə, Deqədi, Vəznəş, Şahağacı, Şiyəkəran, Telman və Kolatan kəndlərinə də təbii qaz xətti çəkilir". 2012-ci ildə rayon sakinləri və səhiyyə işçiləri üçün ən əlamətdar hadisənin Prezident İlham Əliyevin rayon mərkəzi xəstəxanasının əsaslı təmirdən sonra açılışında iştirak etməsi və poliklinika şöbəsinin yenidən qurulması məqsədilə vəsaitin ayrılması barədə sərəncam imzalaması olmuşdur. Hazırda poliklinika şöbəsində təmir işləri başa çatmaq üzrədir. Bütün bunlar səhiyyə xidməti sahəsində əhaliyə göstərilən ən yüksək qayğının nəticəsidir.

Astaranın turizm potensialı da genişdir. Rayonda turizmin inkişafı ilə əlaqədar Xəzər dənizinin sahilində müasir tələblərə cavab verən bir neçə turizm istirahət mərkəzi istifadəyə verilmişdir. Bu da əvvəlki illərə nisbətən rayona turist axınının artmasına səbəb olmuşdur.

Toplantıda qeyd olundu ki, rayon icra hakimiyyətinin təsdiq etdiyi qrafik əsasında şəhər, qəsəbə və kənd inzibati ərazi dairəsi üzrə nümayəndəliklərdə 2012-ci ildə görülmüş işlər və 2013-cü ildə qarşıda duran vəzifələrlə əlaqədar hesabat yığıncaqları keçirilmişdir. Bu yığıncaqlarda vətəndaşların rəy və təklifləri dinlənilmiş, qaldırılan məsələlər nəzarətə götürülmüşdür. Həmin məsələlər əsasən kəndarası yolların asfaltlaşdırılması, kəndlərin qazlaşdırılması, yeni iş yerlərinin açılması, elektrik xətlərinin və dirəklərinin dəyişdirilməsi, məktəb və körpülərin tikintisi, ev tikintisi üçün torpaq tələbi, əhalinin sosial müdafiəsi, sahibkarlığın inkişafı və s. barədə olmuşdur. Yerlərdə həlli mümkün olan məsələlər barədə verilmiş təkliflərlə əlaqədar müvafiq tədbirlər müəyyənləşdirilmiş, qaldırılan digər mühüm problemlər isə ümumiləşdirilərək aidiyyəti təşkilatlara göndərilmişdir.

Hesabat yığıncağında çıxış edən Prezident Administrasiyasının məsul işçisi Vəfadar Bağırov ölkəmizdə, o cümlədən Astarada sosial-iqtisadi inkişaf sahəsində qazanılan yüksək nailiyyətlər barədə danışdı, astaralılara 2013-cü ildə qarşıda duran vəzifələrin yerinə yetirilməsində uğurlar arzuladı. Qeyd etdi ki, Prezident İlham Əliyevin regional inkişafa dair Dövlət Proqramının dördüncü ilinin yekunlarına həsr olunmuş konfransdakı nitqindən irəli gələn vəzifələrin yerinə yetirilməsi üçün bütün qüvvələr səfərbərliyə alınmalıdır.

Seyran CAVADOV

Azərbaycan.-2013.- 7 mart.- S.5.