Hər gününüz bayram olsun!
Biz kişilər həmişə həmrəy ola bilmirik. Necə deyərlər, bir yerdə neçə kişi varsa, bir o qədər rəy, mövqe olur. Amma həyatın cədvəli sayılan təqvimdə elə günlər var ki, bu zaman hətta xarakterlərinə görə biri-birindən ağ və qara kimi fərqlənən kişilər də həmrəylik nümayiş etdirirlər. Təbii ki, həmin günlərdən biri və bəlkə də birincisi martın 8-idir. Məhz bu gün biz ən azı, dünyaya gəlməyimizin, böyüməyimizin, bir şəxsiyyət kimi formalaşmağımızın əsasən kimin sayəsində mümkün olduğunu bir daha dərk edir və Tanrının ilk növbədə Ana kimi yaratdığı yarımızın qarşısında baş əyirik.
Deyirlər, uşaq atadan yox, anadan yetim qalır. Bu, həqiqətdir.
Hətta bir az dərinə gedəndə,
görürük ki, nəinki uşaqlar, həyatın hər
üzünü görən, hər sınağından
çıxan böyüklər də anasız -
qadınsız bütöv ola bilmirlər. Nahaq yerə
qadınsız evi çiçəksiz bağçaya bənzətmirlər
ki...
İşdə də belədir. İndi sahəsindən asılı
olmayaraq hansı iş yerini qadınsız təsəvvür
etmək mümkündür?! Yəqin ki,
heç birini. O cümlədən, dünyada həyat
üçün ən riskli peşə olduğu çoxdan
sübut edilmiş jurnalistikada bu gün xanımlarsız
keçinmək mümkün deyil. Götürək,
bizim redaksiyanı. Təxminən 70-ə
yaxın işçisi olan qəzetimizdə 25 xanım
çalışır. Hamısı da
cavabdeh olduqları işin öhdəsindən bacarıq və
bir də təbii ki, qadınlara xas səliqə ilə gəlirlər.
Səliqədən söz düşmüşkən. Səhər 9-a az qalır. Hamımız bir-bir,
iki-iki işə gəlirik. Elə dəhlizə
ayaq basanda görürük ki, dünən axşam qoyub
getdiyimiz deyil. Dəhliz də, otaqlar da təmizlənərək
sahmana salınıb. Hətta kondisionerlər
cərəyana qoşulub. Bir sözlə,
redaksiyada işə başlamaq üçün yalnız masa
arxasına keçmək qalır. Təxminən
30-a yaxın otağı, uzun dəhlizi olan redaksiyamızda
bizim üçün hər səhər bu təmizliyi,
rahatlığı yaradanlarsa Kəmalə Bayramova və Lumi
İslamovadır. Artıq neçə illərdir ki,
onların iş saatları səhər saat 6-dan əllərində
tozsoran və dəsmalla başlayır və günortaya
yaxın işlənmiş qucaq-qucaq kağızlarla başa
çatır.
Saat 10-a təzə işləyir. Redaksiyada iş hələ,
necə deyərlər, qızışmayıb.
Bəs, operatorların otağından gələn
səs kimindir? Sözsüz ki, mədəniyyət
şöbəsinin redaktoru Flora Xəlilzadədir, növbəti
məqaləni yazdırır. Flora Xəlilzadəni
oxucularımıza xüsusi təqdim etməyə ehtiyac
yoxdur. Nəinki qəzetimizi gündəlik
oxuyanlar, eləcə də digər mətbu orqanları və
telekanalları izləyənlər Flora xanımın Azərbaycanın
görkəmli sənət adamları haqqında tədqiqat
xarakterli məqalələri, ictimai maraq doğuran, cəmiyyəti
narahat edən məsələlərlə bağlı
çıxışları ilə tez-tez rastlaşırlar.
Ümumiyyətlə, ölkənin mədəni
və ictimai həyatında elə hadisə yoxdur ki, Flora
xanım ona münasibətini bildirməsin. Hətta bəzən
bu münasibət iç yanğısından doğan
emosional olur. Amma bu halda da Flora Xəlilzadə səmimi
və təbiidir. Məhz bütün bu
keyfiyyətlərinə görə Flora xanıma bir neçə
gün əvvəl Prezidentin sərəncamı ilə "Əməkdar
jurnalist" fəxri adı verilmişdir.
Və beləliklə, redaksiyamızda bu ada layiq
görülən qadınların sayı bir boy da artdı. Əməkdar
jurnalist, humanitar şöbənin redaktoru İradə Əliyevanın
yaşı elə çox olmasa da, xüsusən,
cavanlarımız ona nəvazişlə "mamaşa" deyə
müraciət edirlər. Özü də bu
xanım-xatın həmkarımıza belə münasibət
təkcə onun iş yoldaşlarına həmişə
qayğı ilə yanaşmasından, əlindən gələn
köməyi əsirgəməməsindən irəli gəlmir.
İradə xanım həm də sözün
bir başqa mənasında peşəkar jurnalistdir. İndiyəcən onun qələmindən çiy,
yarımçıq məqalə çıxmayıb. İradə Əliyeva istər səhiyyə və təhsilin
qlobal problemləri olsun, istərsə də cəmiyyətdəki
bəzi nöqsanlar, nədən yazıbsa mövzunun dərinliyinə
varır, başqa sözlə desək, qəzet səhifəsinə
çıxardığı məsələnin nəticəsindən
çox onu doğuran səbəbləri qələmə
alır.
Madam ki söhbət əldəki qələmdən
düşdü, əlindən qələm düşməyən
daha bir xanımımızı təqdim etmək
vaxtıdır. Flora Sadıqlı iqtisadiyyat
şöbəsinin müxbiridir. Amma o,
sıradan bir müxbir deyil. Tam məsuliyyətlə
bildiririk ki, hazırda Azərbaycan jurnalistləri arasında
ölkəmizin neft-qaz sənayesini, onun tarixini,
bugününü, gələcəyini Flora xanım kimi bilən,
Flora xanım qədər yazan ikinci bir qələm sahibi
yoxdur! Deyir ki, gecə məni yuxudan oyadıb
adımı soruşsalar, bəlkə də fikirləşərəm,
amma BTC-nin təməlqoyma tarixindən tutmuş
uzunluğunacan olan faktları əzbərdən söyləyərəm.
Əslində, o, bunu deməsə də, bilirik.
Bilirik ki, küçənin bu tayından
qarşı tərəfinə keçməyə cürət
etməyən Flora xanım dənizin ortasında hündür
buruqlara qorxmadan çıxır. Dəfələrlə
şahidi olmuşuq ki, hətta qışın
soyuq-sazağı onu uzaq Çilov və Pirallahı
adalarına getməkdən çəkindirməyib, jurnalist
marağı bütün maneələrə üstün gəlib.
Flora Sadıqlı həmçinin məzmunlu
sosial oçerklərin və məqalələrin müəllifidir.
Onun bu yönümlü yazılarında
toxunduğu mövzu zəngin həyati faktlarla təhlil
olunmaqla yanaşı, xarakterindəki məsuliyyət və
sadəlik də sezilir.
Digər sadə və məsuliyyətli həmkarımız
isə Rəsmiyyə Rzalıdır. Xalqla əlaqə
şöbəsinin müxbiri Rəsmiyyə xanım
bütün gün ərzində ya harasa tələsir, ya da
barmaqları kompyuterin klaviaturasından çəkilmir. Kənardan müşayiət etmək kifayətdir
ki, onun gün ərzində bir dəqiqə belə boş
vaxtının olmadığını görəsən.
Əsl qeyrətli Azərbaycan
xanımıdır, hər işə çatır. Niyə də yox? Axı, Rəsmiyyə
xanım ailəsi kimi işini, peşəsini də sevir.
Onun xarakterinə uyğun çılğın
qələmindən çıxan müxtəlif mövzulu elə
yazısı yoxdur ki, oxunmasın, ən azından həmkarları
arasında müzakirə edilməsin. Xüsusən,
Qarabağ mövzusunda yazdıqları. Bir
qarabağlı jurnalist kimi onun bu mövzuda qələmə
aldığı məqalələrindəki
yanğını hiss etməmək mümkün deyil.
Yəqin
çox az adam bilir ki, bizim redaksiyanın
müdiri də var və həmin məsul vəzifə
Nüşabə Qənbərliyə həvalə olunub. Cavabdeh olduğu işi mükəmməl bilən
N.Qənbərli jurnalist çörəyi ilə
böyüyüb. Yəqin elə bu səbəbdən
ara-sıra yazmağı da var. Nüşabə xanımı
bizə daha çox sevdirən, necə deyərlər,
missiyası isə onun xeyirxəbər olmasıdır. Əgər o, əlində şirniyyat
qapımızı döyürsə, deməli, kollektivimizdə
əlamətdar hadisə baş verib. Bu cür hadisələrinsə
siyahısı genişdir - nişan, toy, ad
günü, övlad və nəvənin dünyaya gəlməsi
və s. Belə yerdə deməsək olmur: Allah şirin əlini
kəsməsin, Nüşabə xanım!
Amma bizim
gözümüz əllərində qalan digər
xanımlarımız da var. Onlar da kim
olsalar yaxşıdır? Təbii ki,
mühasibatlığın işçiləri - baş
mühasib Bilqeyis Şalıyeva, mühasib Bəhiyyə Əhmədova
və mühasib-xəzinədar Marian Cəlilova. Düzdür, əməkhaqqımızı xeyli
vaxtdır bankomatdan alırıq. Lakin görəndə
ki, Bilqeyis xanım əlində bir qalaq kağız baş
redaktorun yanına gedir, ən uzağı, ertəsi gün
Marian xanım həmin sənədləri götürüb
sürücü ilə banka yola düşür, deməli,
maaş və qonorar sevinci yaşayacağıq. Onu da deyək ki, biz bu sevinci keçmiş vaxtlarda
olduğu kimi, ayda iki dəfə keçiririk və bu xeyirxah
işdə mühasibatlıqdakı
xanımlarımızın zəhməti çoxdur.
Digər əməkdaşımız Təranə
xanımın da "əli pulla oynayır". Lakin reklam və
elanlar şöbəsinin mütəxəssisi T.Abbasovanın
işi məsuliyyətlə bərabər,
yaradıcılıq da tələb edir. Bu
tələblər redaksiyanın əhali tərəfindən ən
çox müraciət edilən şöbəsində hər
kəslə öz dilində danışmaq, ən müxtəlif
məzmunlu sorğulara cavab vermək və eyni zamanda, maliyyə
məsələlərində dəqiq olmağın vacibliyindən
doğur və Təranə xanım onların öhdəsindən
bacarıqla gəlir. Operator
yığıcılarımız kimi.
Onlarsa dörd nəfərdir, hamısı da xanım -
Salmanova Rəsmiyyə, Əliyeva Səkinə, Əzimova Nərminə
və Orucova Xuraman. Baxmayaraq ki, redaksiyada əməkdaşlarımızın
hamısı fərdi kompyuterlə təchiz olunub, bu
xanımlarsız işimiz aşmır. Rəsmiyyə
xanım qaradinməzdir, dindirməsən danışmaz.
Bütün günü işi və bir də...
ürəyindəki övlad itkisi dərdiylədir. Səkinə xanım mətbuat veteranıdır.
Hələ sovet vaxtında "Azərbaycan gəncləri"
qəzetində dərc edilən məqalələrin
çoxu onun yazı makinasından keçmişdir. İndi də həmin işi görür, amma
kompyuterdə. Nərminə xanımsa bu
işdə elə püxtələşib ki, hətta bəzən
yığdığı yazılara redaktə xarakterli düzəlişlər
də edir. Bir də eşitmişik ki,
yaxşı qutab bişirməyi var. Qarabağlı
qızı Xuraman xanımın isə həm də əla
musiqi zövqü var. Nə vaxt ona yaxınlaşırsan,
kompyuterində həzin el mahnıları səslənir.
Doğulduğu Cəbrayılın həsrətinə özgə
necə dözmək olar ki...
İş günü sona çatmaq üzrədir. Bəs,
kitabxanaçı Dürdanə Ağayeva və baş
redaktorun köməkçisi Yeganə Xudiyevanın
yuxarıda nə işləri var? Yəqin
baş redaktor ya hansısa tədbirdədir, ya da Milli Məclisdə.
Deməli, fürsətdir, dördüncü mərtəbəyə
qalxıb rəfiqələrlə "dərdləşmək"
olar. Bizim bu iki xanımımızın
yaşları arasında fərq olsa da, bacı kimidirlər.
Özü də bu doğmalıq təkcə onların
iş otaqlarının qonşu olmasından yaranmayıb. Dürdanə nənə (zarafat deyil, iki nəvə
nənəsidir) və Yeganə xanım həmxasiyyətdirlər
- mehriban və gülərüz. Hətta
işə məsuliyyətli münasibətləri də
eynidir. O dərəcədə ki, ehtiyac olduqda bir-birini
problemsiz əvəz edə bilir.
...Bu da
iş gününün sonu. Amma həmin son qəzetimizin
korrektor və oxucuları üçün iş
gününün başlanğıcıdır. Bəli,
korrektorlar - Kəmalə Cəfərova, Fəzilət
İsmayılova, Arzu Mehdiyeva, Gülnar Novruzova, Kəmalə Rəhimova,
oxucular - Zəkurə Quliyeva, Rəhilə Əliyeva və
Rüxsarə Əzimova üçün iş günü
növbə ilə axşam saat 5-dən başlayır və
saat neçədə qurtarır - bunu bir... AzərTAc
bilir. Hər halda, gecə saat 12-1-dən
tez qurtarmır. Bir faktı nəzərə
çatdıraq: "Azərbaycan" qəzetinin ay ərzində
təxminən 25 nömrəsi çıxır. Bu, orta hesabla 200-250 səhifə edir. Həmin səhifələrdə neçə
sözün, durğu işarəsinin olmasını isə
hesablamaq sadəcə, mümkün deyil. Yəqin ki,
milyondan az olmaz. İndi gəl, gecə
saatlarında bu sayda hər sözü az
qala, hərf-hərf oxu ki, qəzetdə səhv getməsin. Yəqin elə ona görədir ki, bizim korrektor və
oxucularımızın əksəriyyəti yaşlarından
asılı olmayaraq optik gözlükdən istifadə edir.
Necə deyərlər, hər səhər
alıb oxuduğumuz qəzetimizin hər səhifəsində
onların gözlərinin nuru var.
Həm də təkcə onların yox. Bu gün bayramlarını
təbrik etdiyimiz bütün xanım əməkdaşlarımızın!
Raqif MƏMMƏDOV
Azərbaycan.-2013.- 8 mart.- S.4.