Niderland Krallığının ölkəmizdəki səfiri Bakı Ali Neft Məktəbində olmuşdur

Niderland Krallığının Azərbaycandakı səfiri Aryen Peter Uyterlinde Bakı Ali Neft Məktəbində (BANM) olmuşdur.

BANM-in rektoru Elmar Qasımov qonağa ali təhsil müəssisəsinin yaranma tarixi, qarşısında duran məqsədlər, 2012-ci ildə tələbə qəbulunun nəticələri, tədris prosesinin təşkili, beynəlxalq əlaqələrin genişləndirilməsi istiqamətlərində görülən işlər haqqında məlumat vermişdir. Qeyd etmişdir ki, Dövlət Neft Şirkətinin strukturunda ali məktəbin yaradılmasında məqsəd ölkənin sənaye müəssisələrinin yüksəkixtisaslı mütəxəssislərə ehtiyacını ödəməkdir. 2012-ci ildə fəaliyyətə başlamasına baxmayaraq, BANM Tələbə Qəbulu üzrə Dövlət Komissiyasının qəbulunun göstəricilərinə görə tərtib etdiyi reytinq cədvəlində lider olmuşdur. Ali məktəbdə tədrisin ingilis dilində təşkil edildiyini vurğulayan rektor bu məqsədlə Böyük Britaniyanın Heriot-Vatt Universiteti ilə əməkdaşlıq haqqında razılaşma imzalandığını, mütəxəssis hazırlığının həmin universitetin tədris proqramları əsasında müasir tədris texnologiyalarının tətbiqi ilə həyata keçirildiyini və məzunlara 2 diplom veriləcəyini demişdir. Rektor BANM-in Niderland Krallığının texniki ali təhsil müəssisələri və neft-kimya təmayüllü sənaye qurumları ilə əməkdaşlıq əlaqələrinin qurulmasına ehtiyac olduğunu bildirmişdir.

Səfir Aryen Peter müasir ali məktəbin yaradılmasını yüksək qiymətləndirmiş, ali təhsil ocağının kollektivinə tədrisdə və təhsildə uğurlar diləmiş, Bakı Ali Neft Məktəbinin Niderland Krallığının müvafiq təhsil müəssisələri və sənaye qurumları ilə əlaqələrin yaradılmasında kömək etməyə hazır olduğunu bildirmişdir.

Sonda rektor Elmar Qasımov qonağa Bakı Ali Neft Məktəbinin "Fəxri qonağı" diplomunu təqdim etmişdir.

Azərbaycan.-2013.- 8 mart.- S.5.