Çiçəklərin
sultanı, min bir dərdin dərmanı
Dünya bazarında yüksək alıcılıq
qabiliyyətinə malik müalicəvi bitkilərin ölkəmizdə
yetişdirilməsi və inkişafı üçün həm
təcrübə, həm də əlverişli iqlim şəraiti
mövcuddur. Belə bitkilərin yetişdirilməsi qida sənayesində
tətbiq edilən bir sıra ziyanlı konsentratları əvəz
edərək insanların sağlamlığının
qorunmasında dönüş yarada bilər. Onlardan biri zəfərandır. Zəfəran
neçə əsrlərdir ki, dünyada nadir, müalicəvi,
həm də müqəddəs
çiçək sayılır.
Bir
çox mənbələrə görə zəfəranın
becərilməsi 3-4 min il bundan əvvələ təsadüf
edir. Bəzi mənbələrdə qeyd olunur ki, bu nadir bitki
Avropaya ərəb istilaları zamanı
aparılmışdır. Qədim Misir, Babilistan, İran və
digər Asiya ölkələrində, Romada zəfəran
boyaq maddəsi kimi işlədilir, təbiblər onunla bir
çox xəstəlikləri müalicə edirdilər. Zəfəran
iştahasızlığı, yuxusuzluğu, sinir zəifliyini
aradan qaldırır, orqanizmi gücləndirir. Hətta
baş, ürək, göz, qulaq ağrıları zamanı zəfərandan
istifadə effektli sayılır, öskürəyin
qarşısını alır, qızdırmanı salır.
Vaxtilə
zəfəran çox baha olduğundan ondan əsasən
şahlar, krallar və zadəganlar istifadə edərmişlər.
Şahlar, sultanlar və onların xanımlarının
paltarları bu bitkinin rəngi ilə boyanardı. Kübar
qadınlar saçlarını zəfəranla boyayardılar.
İngiltərədə isə həddən ziyadə qiymətli
bitki olduğu üçün qadınlara zəfəranla
saçlarını boyamaq qadağan edilmişdi. Avropada orta əsrlərdə
saxta zəfəranı bazara çıxaranlar edam olunurdu.
Ümumiyyətlə, dünyada əsrlər boyu zəfəran
möcüzəvi keyfiyyətlərə malik bitki kimi sevilib,
qorunub. İndi də belədir.
Abşeron
öz zeytunu, üzümü, ənciri kimi zəfəranı
ilə də tarixən məşhurdur. Zəfəranın bu
yarımadaya gətirilməsi təxminən VIII-IX əsrlərə
təsadüf edir. Hazırda Bilgəh qəsəbəsində
becərilən zəfəran ədviyyələrin ən qiymətlisi
hesab olunur. Azərbaycan mətbəxinin şah xörəyi
sayılan əsl plovu da zəfəransız təsəvvür
etmək çətindir.
Abşeronun
mülayim qışı, günəşli yayı və
münbit torpağı zəfəranın becərilməsi
üçün çox əlverişlidir. Hələ 1927-ci
ildə Bilgəhdə "Zəfəran" sovxozu da
yaradılmışdı. 140 hektar sahəsi olan sovxozda il ərzində
140-150 kiloqram quru zəfəran yığılardı.
Dünya bazarında bir qram zəfəranın qiyməti
keyfiyyətindən asılı olaraq 1-10 manat arasında dəyişir.
Qeyd edək ki, Bakının Məmmədli, Maştağa, Nardaran,
Pirşağı, Fatmeyi kəndlərində yetişdirilən
bu bitki yüksək keyfiyyətinə görə həmişə
fərqlənib. Məhsuldarlıq yüksək olduğundan
daxili tələbatı ödəməklə yanaşı,
xarici ölkələrə də ixrac edilib. Hətta
Abşeronda yarım tondan artıq zəfəran
yığıldığı vaxtlar da olub. Hazırda zəfəran əkib-becərməklə
məşğul olan Bilgəh kənd sakini İsmayıl
İsmayılov bu barədə belə deyir:
-
Uşaqlıqdan Bilgəhdəki həyətyanı sahəmizdə
atamın zəfəran becərdiyini görmüşəm. O
illər həyətyanı sahələrdə zəfəranı
hamı yetişdirirdi. Hər tərəf zəfəran idi. Kəndin
sakinləri bu bitkidən yaxşı qazanc
götürürdü. İndi özüm 15 ilə
yaxındır ki, zəfəran əkini ilə məşğul
oluram. Bilgəhdə sovxozun ləğv edilməsi,
torpaqların bir qismində yeni yaşayış evlərinin
tikilməsi zəfəran sahələrinin azalaraq 20 hektara enməsinə
səbəb oldu. İndi Abşeronda il ərzində təxminən 60-70 kiloqram zəfəran
tədarük olunur. Halbuki təbii şəraiti imkan verən
əksər ölkələrdə onun qorunub
artırılmasına xüsusi önəm verilir.
İran,
İspaniya, İtaliya, Fransa, Türkiyə, Çin, Əfqanıstan,
Meksika və digər ölkələrdə bu bitkinin onlarca
növü yetişdirilir. Bir sıra Avropa dövlətlərinin
aqrar siyasətində zəfəran perspektivli bitki kimi dəyərləndirilir,
ona investisiya qoyulması təbliğ edilir. Zəfəran
çoxillik bitkidir, dəmyə şəraitində
yetişdirilir və onun becərilməsi üçün
böyük vəsait tələb olunmur.
Bir
kiloqram quru zəfəran almaq üçün 200 minə
yaxın çiçək lazımdır. Azərbaycanda ən
keyfiyyətli zəfəran Bilgəhdə yetişir.
Görünür, bu, kəndin havasındandır. Elə ailə var ki, 1 kiloqramadək quru zəfəran
istehsal edə bilir, müştərisi də həmişə
başının üstündə olur.
Nədənsə
ölkəmizdə sahibkarlar bu sahənin perspektivlərini
aydın görmürlər. Bəlkə də bu, xaricdən
və əsasən İrandan gətirilən ucuz zəfəran
bazarını ələ keçirməsi ilə
bağlıdır. Orta hesabla hər bir insanın bu məhsula
illik tələbatını cəmi bir qramdan hesablasaq, Azərbaycanın
zəfərana olan illik tələbatı 9 tona çata bilər.
Bu rəqəmin özü də
zəfəranın perspektivinin böyük olmasından
xəbər verir.
Digər
tərəfdən, Abşerondan başqa Azərbaycanın digər
bölgələrində də məsələn Bərdə
rayonunda da zəfəran yetişdirmək mümkündür.
Bunun üçün yeni texnologiyalar tətbiq etmək, məhsulu
tanıtdırmaq üçün ilk vaxtlar təbii ki, daha
çox iş görülməlidir.
Qida sənayesində,
mətbəximizdə zəfəran işlətmək ənənəsini
bərpa etmək, bu nadir məhsulun üstünlüklərini
təbliğ etmək, onu becərənlərə mənəvi
və maddi dəstək vermək zəfəranın becərilməsini
stimullaşdıra bilər. Fikrimizcə, Kənd Təsərrüfatı
Nazirliyi rayon icra hakimiyyətləri ilə birlikdə maarifləndirici tədbirləri həyata
keçirsə, zəfəranla bağlı bir neçə
saytın yaradılmasına təkan versə, bu məhsulu
yetişdirənlərin birliyi yaradılsa, həmin bitkiyə
maraq artar, bu sahənin inkişafında dönüş yarana
bilər, yeni iş yerləri yaranar. Göyçayda Nar
bayramı keçirildiyi kimi, Bakıda da zəfəran
festivalı təşkil etmək olar. Axı, zəfəran
çiçəklərin sultanı, min bir dərdin dərmanıdır.
Elnur HADIYEV
Azərbaycan.-2013.- 10 mart.- S.8.