Antiazərbaycançı dairələrin hər bir məkrli planı puç olacaq

Qısa dövrdə böyük uğurlara imza atan Azərbaycan siyasi, sosial-iqtisadi və digər sahələrdə nail olduğu sıçrayışlı yüksəlişlə Cənubi Qafqazın aparıcı dövlətinə çevrilib. Regionda və dünyada cərəyan edən proseslərlə bağlı Prezident İlham Əliyevin həyata keçirdiyi siyasət Azərbaycanın regionun lider dövləti kimi rolunu artırıb.

Ötən hər il Azərbaycanın gücünü və imkanlarını dünyaya nümayiş etdirir, ölkəmizin beynəlxalq imicini artıran mühüm hadisələr kimi tariximizə qızıl hərflərlə yazılır.

İndi hər bir Azərbaycan vətəndaşı fəxr edir ki, sürətlə inkişaf edən, hər baxımdan - istər sosial, iqtisadi, istərsə də hərbi və s. olsun - regionun lider dövlətinə çevrilən, ədalətli sosial cəmiyyətin qurulduğu bir ölkədə yaşayır. Amma o da məlumdur ki, bəzi dairələr Azərbaycanın bu nailiyyətlərini qəbul edə bilmir, müxtəlif planlar quraraq ölkəmizdəki ictimai-siyasi sabitliyin pozulmasına cəhd göstərirlər. İndiyədək belə cəhdlərin sayı çox olub və hamısı da xalq-hakimiyyət birliyinin qarşısında iflasa uğrayıb.

Məkrli niyyətlərinin gerçəkləşmədiyini görən antiazərbaycançı dairələr hər cür vasitələrə əl atırlar. İndi də əsgər ölümünə etiraz etmək adı ilə insanları qanunsuz aksiyalara çağırır, ölkədə xaos yaratmağa cəhd göstərirlər. Öncə qeyd edək ki, ən ideal sahədə belə hansısa xoşagəlməz hadisə baş verə bilər. O cümlədən, minlərlə insanın qulluq və xidmət etdiyi ordu sıraları da böyük strukturdur və qəti hökm etmək olmaz ki, burada problem baş verə bilməz. Əsas odur ki, belə hadisələr araşdırılsın və hüquqi qiymətini alsın. Azərbaycan hüquq dövlətidir və orduda baş verən heç bir hadisə diqqətdən kənarda qalmır, günahkar varsa, mütləq məsuliyyətə cəlb edilir.

Lakin antiazərbaycançı dairələrin sifarişlərini yerinə yetirən dağıdıcı müxalifət belə hadisələri siyasiləşdirməyə, bundan öz maraqları naminə istifadə etməyə çalışır. Onların martın 10-da Bakının mərkəzində keçirməyə cəhd etdikləri aksiya da bunu təsdiqlədi. Həmin aksiya ilə orduya və dövlətə qarşı məkrli kampaniya həyata keçirmək cəhdi xaricdən maliyyələşən, erməni lobbisinin və antiazərbaycançı şəbəkənin maraqlarına xidmət edən dağıdıcı müxalifət partiyalarının təxribatçılıq fəaliyyətindən və özlərinin çirkin siyasi məqsədlərini reallaşdırmaq niyyətindən başqa bir şey deyildi.

Azərbaycan Silahlı Qüvvələrinə ləkə vurmağa çalışanlar bilməlidirlər ki, ordu hamı üçündür və hərbi xidmət ümummilli vəzifədir. Orduda bir hadisəni siyasiləşdirənlər, görəsən, niyə bu ordudan həm də Mübariz İbrahimov kimi qəhrəmanların çıxdığını unudurlar? Müharibə başlayacağı təqdirdə belə qəhrəmanların sayı minlərlə olacaq. Bu gun Azərbaycan Ordusunun nüfuzuna xələl gətirməyə cəhd edənlər bir nüansı xüsusilə unutmamalıdırlar ki, başında qətiyyətli və uzaqgörən bir dövlət rəhbəri, Ali Baş Komandan İlham Əliyevin dayandığı Azərbaycanın Silahlı Qüvvələrini riyakar siyasi məqsədlər üçün ləkələmək mümkün deyil.

Diqqəti çəkən digər məqamlardan biri də antiazərbaycançı dairələrin öz çirkin niyyətlərini reallaşdırmaq üçün gənclərdən istifadə etmək cəhdidir. Lakin hələ də bu dairəyə çatmır ki, Azərbaycan gəncini antimilli fəaliyyətə cəlb etmək mümkün deyil. Çünki bu gün Azərbaycanda gənc nəsil dövlət qayğısı ilə əhatə olunub. Gənclərin sosial problemlərinin həllinə xüsusi diqqət göstərilir, asudə vaxtlarının və istirahətlərinin səmərəli təşkili məqsədi ilə respublikanın bütün bölgələrində genişmiqyaslı məqsədyönlü iş aparılır, gənclər mərkəzləri yaradılır. Bütün bunlar isə bir daha təsdiq edir ki, Azərbaycanda gənclər siyasəti uğurla həyata keçirilir. Qanunsuz aksiyalarda iştirak edənlər isə dağıdıcı müxalifət partiyalarının rəhbərlərinin yaxın ətrafında olanlardır.

Antimilli şəbəkənin sifarişlərini yerinə yetirən destruktiv qüvvələr öz çirkin niyyətlərinə çatmaq üçün hətta ən iyrənc metodlardan istifadə etməkdən də çəkinmirlər. Belə ki, bir neçə gün əvvəl onların insanlar arasında vahimə yaratmaq effekti verən "Molotov kokteyli" hazırlamaları hüquq-mühafizə orqanları tərəfindən ifşa olundu. Bu barədə Milli Təhlükəsizlik Nazirliyinin və Baş Prokurorluğun birgə məlumatına görə, həyata keçirilən axtarış tədbirləri nəticəsində Bəxtiyar Quliyev, Şahin Novruzlu və Məmməd Əzizovun yaşadıqları mənzillərdən tezalışan "Molotov kokteyli" adlanan maye, narkotik vasitələr aşkar edilərək götürülüb. İlkin istintaqla müəyyən edilmişdir ki, onlar "Molotov kokteyli"ndən martın 10-da icazəsiz aksiyada iştifadə etməyi planlaşdırıblarmış.

Bu gün əsgər ölümü ilə bağlı boğazdan yuxarı danışan bəziləri bir müddət öncə zabitimiz Ramil Səfərov vətənə geri qaytarılanda onu tənqid edənlərin ən başında dayanırdı. İndi əsgər itkisinə "kədərlənən" belələri Ramil Səfərovun qayıtmasından sarsılmışlar. Ona görə də bu cür insanların əsgər ölümünə etiraz etmələri qətiyyən səmimi görünmür. Onları nə Azərbaycan əsgəri, nə də sadə vətəndaş maraqlandırır. Onların məqsədi yalnız antiazərbaycançı şəbəkənin sifarişlərini yerinə yetirməkdir. Bu şəbəkənin Azərbaycanla bağlı planları isə həmişə iflasa məhkumdur.

Rəşad CƏFƏRLİ

Azərbaycan.-2013.- 13 mart.- S.6.