«Muğam aləmi» Üçüncü Beynəlxalq Muğam Festivalı Gəncədə «Ustaddan şagirdə» adlı muğam məclisi ilə davam etdirilmişdir

Martın 14-də Gəncədə "Muğam aləmi" Üçüncü Beynəlxalq Muğam Festivalı çərçivəsində növbəti konsert olmuşdur.

AzərTAc xəbər verir ki, şəhərdəki 5 nömrəli musiqi məktəbinin konsert salonunda keçirilən "Ustaddan şagirdə" adlı muğam məclisini Mədəniyyət və Turizm Nazirliyinin Mədəniyyətşünaslıq üzrə Elmi-Metodik Mərkəzinin şöbə müdiri Cabbar Süleymanov açaraq ilk dəfə olaraq festival çərçivəsində respublikamızın bölgələrində Azərbaycanın və xarici musiqiçilərin iştirakı ilə konsertlərin, beynəlxalq muğam müsabiqəsinin, elmi simpoziumların və ən nəhayət, ustad dərslərinin təşkilinin əhəmiyyətindən danışmışdır. O, bu gün Gəncədə keçirilən "Ustaddan şagirdə" muğam məclisini festival çərçivəsində reallaşan növbəti yenilik kimi dəyərləndirmişdir.

"Ustaddan şagirdə" muğam məclisində şəhərdəki 4 və 5 nömrəli musiqi məktəblərinin, eləcə də Qəmbər Hüseynli adına Gəncə Musiqi Kollecinin muğam şöbələrində təhsil alan tələbələr, həmçinin musiqi məktəblərinin şagirdləri öz müəllimləri ilə birgə çıxış etmişlər.

Sürəkli alqışlarla qarşılanan tələbə və şagirdlər sanki öz ustadları qarşısında hesabat vermişlər. Onların hər birinin uğurlu çıxışı müəllimlərin sevincinə səbəb olmuşdur. Hiss olunurdu ki, bu gün titrək səslə muğam aləminə səyahət edən uşaqlar sabahın muğam ustaları kimi yetişəcəklər.

"Ustaddan şagirdə" muğam məclisinin iştirakçıları bütün bunlara görə milli-mənəvi dəyərlərimizin qoruyucusu, Azərbaycanın birinci xanımı, Heydər Əliyev Fondunun prezidenti Mehriban Əliyevaya minnətdarlıqlarını bildirmişlər.

Azərbaycan.-2013.- 15 mart.- S.7.