Baş katib Lamberto ZANNİER: Azərbaycan ATƏT-in çox fəal üzvlərindəndir

Martın 15-də Azərbaycanın xarici işlər naziri Elmar Məmmədyarov ölkəmizdə səfərdə olan ATƏT-in baş katibi Lamberto Zannier ilə görüşmüşdür. AzərTAc xəbər verir ki, görüşün yekunlarına dair mətbuat konfransı keçirilmişdir.

E.Məmmədyarov görüşdə Azərbaycan ilə ATƏT arasında əməkdaşlığın hazırkı vəziyyəti və perspektivləri ilə bağlı məsələlərin müzakirə olunduğunu bildirmişdir.

ATƏT-in Minsk qrupunun formatının dəyişdirilməsinə dair məsələyə də münasibət bildirən nazir vurğulamışdır ki, onun mövcudluğu zəruridir. Hər ölkə öz milli maraqlarına uyğun siyasət aparır. ABŞ, Fransa və Rusiya BMT Təhlükəsizlik Şurasının daimi üzvləridir. Bu üç ölkə dünya siyasətində çox mühüm rol oynayır.

Azərbaycanın ATƏT üçün çox vacib ölkələrdən olduğunu qeyd edən L.Zannier isə demişdir: "Azərbaycan ATƏT-in çox fəal üzvlərindəndir. ATƏT, eyni zamanda, Azərbaycan üçün vacib məsələlərdə mühüm rol oynayır. Biz çox yaxşı nəticələr əldə etmişik və uğurlu əməkdaşlığımızı bundan sonra da davam etdirəcəyik".

Azərbaycan.-2013.- 16 mart.- S.2.