Bakıda Azərbaycan-Rumıniya Ticarət Palatasının açılış mərasimi olmuşdur

Martın 15-də Bakıda Azərbaycan-Rumıniya Ticarət Palatasının açılış mərasimi olmuşdur.

AzərTAc xəbər verir ki, açılışda Rumıniya Deputatlar Palatasının sədri Valeriu Zqonea və Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov çıxış etmişlər.

Natiqlər bu palatanın iki ölkə arasında mövcud iqtisadi əlaqələrin inkişafında, yeni əməkdaşlıq sahələrinin müəyyənləşdirilməsində və tərəfdaşların tapılmasında əhəmiyyətli olacağını vurğulamışlar.

Valeriu Zqonea bildirmişdir ki, Bakıda olmağımdan çox məmnunam. Qısa müddət ərzində Azərbaycan çox böyük inkişafa nail olmuşdur və bu məni heyran etdi. İki ölkə arasında iqtisadi əlaqələri daha da inkişaf etdirməliyik. Buna görə də Bakıda biznes-forumun keçirilməsi və ticarət palatasının açılması çox vacib bir amildir. Rumıniya Azərbaycan ilə əlaqələrin inkişafında maraqlıdır. Azərbaycan və Rumıniya öz regionlarında stabil inkişaf edən ölkələrdir. Qarşılıqlı investisiyaların yatırılması mühümdür. İki ölkənin tarixi oxşarlıqları çoxdur.

AZPROMO-nun rəhbəri R.Məmmədov bildirmişdir ki, ölkələrimiz arasında iqtisadi və digər sahələrdə əlaqələr uğurla inkişaf edir. Bakıda ticarət palatasının açılışı bunun bariz nümunəsidir. Bu palata Azərbaycan və Rumıniya sahibkarları arasında əlaqələrin genişləndirilməsinə töhfəsini verəcəkdir.

Daha sonra mərasim iştirakçıları palata ilə yaxından tanış olmuşlar.

Azərbaycan.-2013.- 16 mart.- S.4.