Beynəlxalq Muğam Festivalı çərçivəsində «Yeddi gözəl» baleti nümayiş etdirilmişdir

Heydər Əliyev Fondunun, Mədəniyyət və Turizm Nazirliyinin və Azərbaycan Bəstəkarlar İttifaqının birgə təşkilatçılığı ilə ölkəmizdə keçirilən "Muğam aləmi" Üçüncü Beynəlxalq Muğam Festivalı çərçivəsində martın 16-da Azərbaycan Dövlət Akademik Opera və Balet Teatrında dahi bəstəkar Qara Qarayevin "Yeddi gözəl" baleti nümayiş etdirilmişdir.

AzərTAc xəbər verir ki, səhnə əsərinin quruluşçu baletmeysteri Estoniya Respublikasının əməkdar artisti Vasili Medvedev, dirijoru xalq artisti, professor Cavanşir Cəfərovdur.

Baletdə əsas rolları əməkdar artistlər Gülağası Mirzəyev və Kamilla Hüseynova ifa etmişlər.

Qara Qarayev "Yeddi gözəl" baletini Azərbaycanın böyük şairi və mütəfəkkiri Nizami Gəncəvinin 800 illiyinə həsr etmişdir. 2008-ci ildə dahi bəstəkarın 90 illik yubileyi münasibətilə beynəlxalq yaradıcı heyət tərəfindən yeni quruluşda hazırlanmış baletin librettosunu Yana Temiz yazmışdır.

Azərbaycan.-2013.- 17 mart.- S.5.