«Zəhra Quliyeva - elm xadimi» miniatür kitabının təqdimatı olmuşdur

Miniatür Kitab Muzeyində görkəmli ictimai xadim, oftalmoloq alim, tibb elmləri doktoru, professor Zəhra Quliyevanın anadan olmasının 90 illiyi ilə əlaqədar "Zəhra Quliyeva - elm xadimi" kitabının təqdimatı olmuşdur.

AzərTAc xəbər verir ki, tədbirdə Milli Məclisin deputatları, dövlət strukturlarının və ictimaiyyətin nümayəndələri iştirak etmiş, Zəhra Quliyevanın pedaqoji və həkimlik fəaliyyətindən, həyat yolundan danışılmışdır.

Miniatür Kitab Muzeyinin yaradıcısı, əməkdar mədəniyyət xadimi Zərifə Salahova həyat yollarının tez-tez kəsişdiyi Zəhra Quliyeva haqqında xatirələrini bölüşmüşdür.

Qeyd edilmişdir ki, Zəhra Quliyeva 1923-cü il yanvarın 18-də Bakıda ziyalı ailəsində anadan olmuşdur. 1944-cü ildə Azərbaycan Tibb İnstitutunu bitirmişdir. Həmin il institutun Göz xəstəlikləri kafedrasında ordinator kimi əmək fəaliyyətinə başlamış, sonra isə assistent, dosent, professor və kafedra müdiri olmuşdur.

Professor Zəhra Quliyeva 150-dən çox elmi əsərin, 4 monoqrafiyanın, dərsliklərin və bir neçə tədris vəsaitinin, ixtiraların və səmərələşdirici təkliflərin müəllifidir.

Zəhra Quliyeva uzun illər Azərbaycan Tibb İnstitutunun rektoru olmuşdur. Onun ictimai fəaliyyəti respublikamızın həyatında mühüm rol oynamışdır. Ümummilli lider Heydər Əliyev ona yüksək dəyər verir və hörmət edirdi. O, Zəhra Quliyevaya xarici ölkələrdə keçirilən beynəlxalq konfranslarda və simpoziumlarda Azərbaycanı təmsil etmək kimi mühüm missiya həvalə etmişdi. Kitab Zəhra xanım Quliyeva haqqında Heydər Əliyevin bu sözləri ilə açılır: "Azərbaycana rəhbərlik etdiyim müddətdə Zəhra xanım 11 il tibb institutuna başçılıq etmişdir. O, instituta əvvəlki rektorlardan daha uzun müddət rəhbərlik etmişdir. Geniş fəaliyyətinə görə biz onu Qadın Problemləri üzrə Dövlət Komitəsinin sədri təyin etmişik".

Milli Məclisin deputatı, tanınmış publisist Elmira Axundova, Milli Məclisin deputatı Qənirə Paşayeva, "Zəhra Quliyeva - elm xadimi" miniatür kitabının müəllifi əməkdar jurnalist İradə Əliyeva, xalq yazıçısı Çingiz Abdullayev, Azərbaycan Tibb Universitetinin kafedra müdiri professor Paşa Qəlbinur, Azərbaycan Respublikasının insan hüquqları üzrə müvəkkili Elmira Süleymanova Zəhra Quliyevanın elmi və ictimai-siyasi fəaliyyətindən, onun yüksək mənəvi simasından, peşəkarlığından və zəngin daxili dünyasından danışmışlar. Qeyd edilmişdir ki, professor Zəhra Quliyeva özünə və öz prinsiplərinə sadiq qalan bir insan olmuşdur. O, müxtəlif vəzifələrdə, özü də həmişə var qüvvəsi ilə çalışmış, Qadınların Problemləri üzrə Dövlət Komitəsinin ilk sədri olmuş, onların problemlərini bacarıqla həll etmişdir.

Zəhra Quliyeva SSRİ-nin və müstəqil Azərbaycanın bir sıra yüksək dövlət mükafatlarına, orden və medallarına layiq görülmüşdür. O, davamçılarının və yetirmələrinin xatirəsində həmişə ən uca nümunə kimi qalacaqdır.

Zəhra Quliyeva tibb elminə verdiyi töhfəsi, vətənpərvərliyi, natiqlik qabiliyyəti, yüksək mədəniyyəti ilə ölkədə nüfuz qazanmışdı. İstedadlı oftalmoloq alim və gözəl insan kimi onu hamı sevir və qiymətləndirirdi.

"İndiqo" nəşriyyatında Azərbaycan Respublikasının "Kitab" cəmiyyəti tərəfindən buraxılmış miniatür nəşrin müəllifi İradə Əliyeva, redaktoru Zərifə Salahovadır. "Redaktordan" bölməsində deyilir ki, kitab əsl həkimə və gözəl insana həsr olunur.

Kitaba Zəhra Quliyevanın qohumlarının, dostlarının və həmkarlarının xatirələri, ona həsr olunmuş şeirlər, bir çox fotoşəkillər daxil edilmişdir.

Z.Quliyevanın qızı Cəmilə Səttarova ailə üzvləri adından çıxış edərək anasının xatirəsinə ehtiramla yanaşıldığına görə dərin minnətdarlığını bildirmişdir.

Azərbaycan.-2013.- 20 mart.- S.12.