Görülən işlər hər kəsin ürəyincədir

Ölkəmizin füsunkar turizm bölgələrindən biri də Oğuz rayonudur. Son dövrlər rayonda görülən yenidənqurma, abadlıq-quruculuq işləri turizmin perspektiv imkanlarını da genişləndirir.

Oğuz Rayon Mədəniyyət və Turizm Şöbəsinin nəzdində 4 mədəniyyət evi, 23 klub, mərkəzi kitabxana sistemi və onun 26 filialı, Tarix-Diyarşünaslıq Muzeyi, Heydər Əliyev Mərkəzi, yeddiillik uşaq musiqi məktəbi, mədəniyyət və istirahət parkı fəaliyyət göstərir. Tarix-Diyarşünaslıq Muzeyində rayonun tarixi ilə bağlı 4331 eksponat saxlanılır. Muzeydə ilboyu ekskursiyalar, maraqlı görüşlər təşkil olunur, tarix dərsləri də daxil olmaqla, müxtəlif tədbirlər keçirilir.

Son dövrlər rayonda yeni turizm istirahət obyektləri açılır, yeni parklar salınır. Calud kəndində isə 60 yerlik turizm istirahət mərkəzinin tikintisinə başlanılıb. Yaradılan şəraitin nəticəsidir ki, rayonun tarix və mədəniyyət abidələrinin, Oğuz qalalarının, milli adət-ənənələrin və mətbəxin tanıdılması üçün xeyli iş görülüb. Dünyanın müxtəlif ölkələrindən və respublikanın ayrı-ayrı bölgələrindən 2012-ci ildə Oğuzun qapısını 4323 turist döyüb. Onu da qeyd edək ki, rayondakı 32 tarix və mədəniyyət abidəsindən 17-si ölkə, 15-i isə yerli əhəmiyyətli abidədir. Keçən il daha 5 yeni abidə haqqında məlumat hazırlanaraq qeydiyyata alınması üçün Mədəniyyət və Turizm Nazirliyinə müraciət olunub.

Rayonda Tarix-Diyarşünaslıq Muzeyi, uşaq kitabxanası və uşaq musiqi məktəbi üçün yeni binaların tikintisinə, həmçinin bir çox mədəniyyət evinin əsaslı təmirinə ciddi ehtiyac vardır. Əminliklə demək olar ki, qarşıdakı illərdə bu problemlər də həllini tapacaq.

Ölkə Prezidenti İlham Əliyevin "Şəki, Qəbələ, Qax və Oğuz rayonlarının sosial-iqtisadi inkişafının sürətləndirilməsinə dair əlavə tədbirlər haqqında" 21 noyabr 2011-ci il tarixli sərəncamına əsasən, Oğuz rayonu üçün ayrılmış iki milyon manat vəsait hesabına Oğuz şəhərində xeyli abadlıq-quruculuq işləri görülüb. Dövlət başçısının 4 aprel 2012-ci il tarixli sərəncamına uyğun olaraq, ayrılan 4 milyon 500 min manat vəsait isə Oğuzun 6 yaşayış məntəqəsini birləşdirən və ümumi uzunluğu 17,6 km, eni 6 metr olan dördüncü dərəcəli avtomobil yolunun əsaslı tikilərək istifadəyə verilməsinə sərf olunub.

Respublikanın digər rayonları kimi, Oğuz üçün də əhəmiyyətli layihələrdən biri şəhərin su və kanalizasiya sistemlərinin yenidən qurulması layihəsidir. 2010-cu ildən icrasına başlanılmış bu layihə üzrə tikinti-quraşdırma işləri başa çatmaqdadır. Şəhərdaxili küçələrdə su və kanalizasiya xətlərinin çəkilişindən sonra küçələrin dağılmış hissələrinin bərpası işləri davam edir.

Bu gün Oğuz şəhəri müasir görkəmi ilə elə ilk baxışdan rayona gələn müsafirlərin diqqətini cəlb edir. Müasir işıq dirəkləri, təmiz və rahat səkilər, milli memarlıq üslubunda hasarlar, abad yollar göz oxşayır.

Rayonda yaşayış məntəqələrinin qazlaşdırılmasına xüsusi diqqət yetirilir. Bayan, Calud, Muxas, Baş Daşağıl, Xaçmaz, Böyük Söyüdlü, Yemişənli, Ərmənət, Xalxal, Dəymədərə, Tərkeş və Sincan kəndlərinin qazlaşdırılması üçün maliyyə-smeta sənədləri hazırlanır. Padar kəndində qaz çəkilişinə başlanılıb, tikinti-quraşdırma işləri gedir. Oğuz şəhərini təbii qazla təmin edən əsas daşıyıcı qaz kəmərinin (diametri 273 mm-lik) Əlican çayı üzərindən keçən 305 metr hissəsi təmir edilib. Yaqublu, Yenikənd kəndlərində yeraltı qaz kəmərlərinin yenidən qurulması işlərinə başlanılıb.

Oğuzda təhsilin maddi-texniki bazasının gücləndirilməsi istiqamətində də xeyli iş görülüb. Heydər Əliyev Fondunun təşəbbüsü ilə "Yeniləşən Azərbaycana yeni məktəb" devizi altında 2005-2006-cı illərdə Oğuz şəhərində 240, Zərrab və Xalxal kəndlərinin hər birində 100, Muxas kəndində 200 və dövlət proqramı xətti ilə Malıx yaşayış sahəsində 60 yerli yeni tədris binaları tikilib istifadəyə verilib. 2008-2012-ci illərdə isə dövlət vəsaiti hesabına Bucaq kəndində 260, Oğuz şəhərində, Xaçmaz və Böyük Söyüdlü kəndlərinin hər birində 360, Caludda 220, Filfilli və Dəymədərə kəndlərinin hər birində 180 yerlik yeni tədris binaları şagirdləri öz qoynuna alıb. Sincan kəndində tikilən 220 yerlik yeni məktəb binası tezliklə istifadəyə veriləcək. 2013-cü ildə isə rayonun Qumlaq, Ərmənət, Qarabulaq və Yaqublu kəndlərində yeni məktəb binalarının, Oğuz şəhərində yeni bağçanın istifadəyə verilməsi planlaşdırılır. Bunlardan əlavə, əsaslı təmir olunan məktəblər də az deyil. Qeyd etmək lazımdır ki, bu gün Oğuz şagirdlərinin 43 faizi yeni inşa edilmiş və ya əsaslı təmir olunmuş məktəblərdə təhsil alır.

Rayonda sahibkarlığa, özəl sektorun inkişafına, bu sahəyə qanunsuz müdaxilələrin qarşısının alınmasına xüsusi diqqət yetirilir. Sahibkarlığa yüksək dövlət qayğısının nəticəsidir ki, rayonda kənd təsərrüfatı məhsulları istehsalı və emalı, südlük və ətlik mal-qara yetişdirilməsi sahəsində işlər uğurla davam etdirilir.

Ötən il Sahibkarlığa Kömək Milli Fondu tərəfindən rayon sahibkarlarına 4 milyon 390 min manat məbləğində kreditlər verilib. Bu isə 2011-ci ildəkindən 3 milyon manat çoxdur. Sahibkarlar üçün yaradılan şərait onların abadlıq-quruculuq işlərində, ölkənin ərzaq təhlükəsizliyinin təminatında daha aktiv iştirak etmələri üçün stimul yaradır. Dövlətin göstərdiyi qayğıya görə, razılıqlarını bildirən rayon sahibkarları Oğuzun daha da inkişafı naminə səy və bacarıqlarını artıracaqlarını qeyd edirlər.

Telman NƏZƏRLİ

Azərbaycan.-2013.- 28 mart.- S.6.