Azərbaycan, Türkiyə və Gürcüstan xarici işlər nazirlərinin üçtərəfli görüşü keçirilmişdir

Acarıstan Muxtar Respublikasının paytaxtı Batumidə Azərbaycanın, Türkiyənin və Gürcüstanın xarici işlər nazirləri Elmar Məmmədyarov, Əhməd Davudoğlu və Maya Pancikidze arasında üçtərəfli görüş keçirilmişdir.

Görüşdən sonra nazirlər mətbuat üçün açıqlama vermişlər.

Qeyd olunmuşdur ki, görüşdə iqtisadiyyat, infrastruktur, enerji təhlükəsizliyi, təhsil, mədəniyyət, ətraf mühitin mühafizəsi, gənclərlə iş və idman sahələrində əməkdaşlığa dair məsələlər ətrafında müzakirələr aparılmış və ümumi rəyə gəlinmişdir. Bunun daha sıx əməkdaşlığa, konkret layihə və təşəbbüslərin həyata keçirilməsinə imkan yaradacağı bildirilmişdir.

Nazirlərin 2012-ci il Trabzon bəyannaməsi əsasında keçirilən sayca ikinci görüşündə 2013-2015-ci illər üzrə idarələrarası əməkdaşlıq planı qəbul olunmuşdur.

Növbəti görüşün Bakıda keçiriləcəyi bildirilmişdir.

Azərbaycanda Dağlıq Qarabağ, Gürcüstanda isə Abxaziya və Cənubi Osetiya münaqişələri, hər iki ölkənin ərazilərinin işğal olunması ilə əlaqədar sualı cavablandıran Maya Pancikidze demişdir ki, nə Azərbaycan, nə də Gürcüstan doğma torpaqlarının işğalı ilə heç bir vəchlə razılaşa bilməz və biz ərazilərimizi mütləq azad edəcəyik.

Azərbaycanın xarici işlər naziri Elmar Məmmədyarov gürcüstanlı həmkarının fikri ilə razı olduğunu qeyd etmişdir.

Türkiyənin xarici siyasət idarəsinin rəhbəri Əhməd Davudoğlu hər iki ölkənin ərazi bütövlüyünün beynəlxalq hüququn normaları çərçivəsində bərpa ediləcəyinə əmin olduğunu vurğulamışdır.

Mesxeti türklərinin Gürcüstana qaytarılması ilə əlaqədar M.Pancikidze indiyədək onlardan beş min ərizə qəbul olunduğunu, bu istiqamətdə işin davam etdirildiyini, ölkəsinin bu məsələ ilə əlaqədar Avropa Şurası qarşısında götürdüyü öhdəliyin yerinə yetirilməsinə çalışdığını demişdir.

Əhməd Davudoğlu Mesxeti türklərinin sovet rejimi tərəfindən doğma yurdlarından sürgün edildiklərinə diqqət çəkmiş və onların vətənə qayıtmaları ilə ədalətin bərpa olunacağını vurğulamışdır. Batumidə yeni məscid tikintisi ilə əlaqədar türkiyəli nazir demişdir ki, Acarıstanda 100 min müsəlman yaşayır və xristianlara kilsə lazım olduğu kimi, müsəlmanlara da məscid gərəkdir.

Maya Pancikidze demişdir ki, biz dostuq, çoxlu mütərəqqi layihələrimiz vardır və onların həyata keçirilməsi istiqamətində məzmunlu fikir mübadiləsi apardıq. Gürcü nazir Bakıya səfərini, burada keçirdiyi mötəbər görüşləri xatırlatmış və belə yüksək, mehriban qəbula görə Azərbaycan rəhbərliyinə minnətdarlığını bildirmişdir.

Sonra nazirlər Batumidə ARDNŞ-nin Gürcüstan nümayəndəliyinin yeni yanacaqdoldurma stansiyasının və buradakı "Makdonalds" restoranlar şəbəkəsinin yeni obyektinin açılış mərasimində iştirak etmişlər.

İslam ƏLİYEV,

AzərTAc-ın xüsusi müxbiri

Batumi

Azərbaycan.-2013.- 29 mart.- S.2.