«Azərbaycan»ın çıxışını icra hakimiyyəti dəstəklədi

Qəzetimizin 19 dekabr 2012-ci tarixli nömrəsində dərc edilmiş "Oxucu təklifini dəstəkləyirik" sərlövhəli yazıya Quba Rayon İcra Hakimiyyətinin başçısı Mübariz Ağayev münasibət bildirmişdir. Aldığımız məktubu mətbuatla yerli hakimiyyət orqanlarının əməkdaşlığının müsbət nümunəsi kimi oxucularımıza təqdim edirik.

"Oxucu təklifini dəstəkləyirik" başlıqlı yazı çox mühüm, aktual, xalqımızın qan yaddaşı üçün dəyərli bir mövzuya həsr edilmiş, həyəcan təbili kimi səslənmişdir. 100 ildən çoxdur ki, qonşu sanıb güzəştlərə getdiyimiz erməni millətçiləri mərhəmətimizdən sui-istifadə edərək, bədnam cəllad qiyafəsində azərbaycanlılara qarşı saysız-hesabsız soyqırımı aktları törətmiş, kəndləri, şəhərləri yerlə-yeksan edərək, insanları, xüsusilə də qoca, qadın və uşaqlara rəhm etmədən diri-diri yandırmış, ağlasığmaz fiziki işgəncələrə məruz qoymuş, tarixdə misli görünməyən vəhşiliklər törətmişlər.

1988-1994-cü illərdə erməni faşistlərinin törətdikləri cinayətlərin sırasında Xocalı soyqırımı bəşər tarixində insanlığa qarşı törədilən ən ağır cinayətlərdən biridir.

Artıq proqressiv dünya ictimaiyyəti yaxşı bilir ki, tarixən heç zaman öz torpaqları, əraziləri olmayan ermənilər İrəvan xanlığına, Dağlıq Qarabağa və digər Azərbaycan torpaqlarına köçürülərək bu yerlərdə məskunlaşdıqdan sonra onları duz-çörəklə qarşılayan xalqımıza xəyanət etmiş, erməni dövləti yaratmaq iddiası ilə əsrlər boyu azərbaycanlıları ata-baba yurdlarından didərgin salmış, etnik təmizləmələr aparmışlar.

1918-ci ilin mart ayında Qubada törədilmiş erməni vəhşilikləri sovet dövründə ört - basdır edilsə də, ulu öndər Heydər Əliyevin hakimiyyətə qayıdışından sonra xalqımız bu qaranlıq səhifələrin arxasında gizlədilən faciələrdən danışa bildi. Həmin hadisələr zamanı Bakıda, Şamaxıda, Lənkəranda və digər bölgələrimizdə Stepan Şaumyanın rəhbərliyi altında kütləvi qırğınlar və talanlar törədilmişdi. Yalnız Quba qəzasında 16 mindən yuxarı dinc və günahsız əhali ağlasığmaz işgəncələrlə qətlə yetirilmiş, 122 kənd talan edilib yandırılaraq külə döndərilmişdi. Bu barədə arxiv sənədlərində təkzibolunmaz faktlar mövcuddur.

Erməni cəlladlarının Qubada törətdikləri vəhşiliklər faşizmin bəşəriyyət üçün nə dərəcədə təhlükəli olduğunu bariz şəkildə sübut edir. Bir neçə il öncə Quba şəhəri ərazisində aşkar edilmiş kütləvi məzarlıq erməni vandallarının qəddarlığını isbat edən danılmaz tarixi faktdır.

Unutqanlıq tariximizə zərbədir. Bu baxımdan qəzetinizdə dərc olunan məqalədə olduqca mühüm məsələlərə toxunulduğunu xüsusi qeyd etmək yerinə düşərdi. Quba rayonu ərazisində yandırılan, qarət olunan kəndlərin sayı çox olsa da, təəssüf ki, onların adları nəinki rayonumuza gələn turistlərə, hətta yerli sakinlərin də əksəriyyətinə məlum deyil.

Biz erməni cəlladlarının cinayətlərini əks etdirən "31 mart - Azərbaycanlıların soyqırımı abidə-kompleksi" və "Şəhidlər xiyabanı"nda anım mərasimləri keçirir, rayonumuzda seminarlar, mühazirə saatları, veteranlarla görüşlər təşkil edir, gəncləri ordu sıralarına məhz kütləvi məzarlığı, soyqırımı abidə-kompleksini və Şəhidlər xiyabanını ziyarət etdikdən sonra yola salırıq.

Rayon icra hakimiyyəti Qubanın girəcəyində tağ kompleksində ümumu lövhədə erməni faşistlərinin divan tutduğu 122 kəndin siyahısını, hər kəndin girəcəyində isə burada 1918-ci ildə törədilən ağır cinayətlər barədə qısa məlumatları əks etdirməyi nəzərdə tutmuşdur. Bu lövhə və stendlərin üzərində "Sayıq olun, bu vəhşiliklər davam edə bilər!" şüarı da yazılacaqdır.

Belə düşünürük ki, erməni faşizminin mahiyyətini və məkrli niyyətlərini elektron mediada, digər kütləvi informasiya vasitələrində, rayon, ölkə və beynəlxalq miqyaslı tədbirlərdə ifşa etməyə yönələn təbliğatın ana xəttini Azərbaycan gəncliyinin yaddaşında və dünyanın mütərəqqi qüvvələrinin şüurunda insanlığa qarşı törədilən cinayətlərin, genosid aktlarının unudulmaması və cinayətkarların yüz ildən, min ildən sonra belə cəzasız qalmaması ideyası təşkil etməlidir. Kimsə erməni faşistlərinin törətdikləri cinayətlərin cəzasız qalacağına şübhə etməməlidir. Erməni təbliğat maşını artıq dünya miqyasında iflasa uğramaqdadır. Möhtərəm Prezidentimiz cənab İlham Əliyevin və ölkənin birinci xanımı Mehriban Əliyevanın beynəlxalq aləmdə bu istiqamətdə gördüyü böyük işlər müsbət nəticələr verir, erməni təbliğat maşını ömrünü başa vurmuş köhnə mexanizm kimi məhv olmaqda, çürüməkdədir. Haqqın, ədalətin və dünyəvi sülhün bərqərar olması üçün erməni faşist ideologiyası məğlub edilənədək, işğal olunan torpaqlar qaytarılanadək bütün istiqamətlərdə mübarizəmizi sonadək davam etdirməliyik. Bizim dövlətimiz bayrağını qaldırdığı gündən sülhə, əmin-amanlığa, dövlətlərin konstruktiv və dinc əməkdaşlığına üstünlük verib. Ölkəmiz müharibə şəraitində olmasına baxmayaraq, bölgədə liderə çevrilmiş, Qafqazda sülhün qarantı kimi çıxış edən güclü dövlətdir. Azərbaycanın hərbi qüdrəti istənilən müstəvidə faşist ideologiyası ilə öz xalqını zəhərləyən erməni millətçilərini və onları uçuruma sürükləyən hərbi caniləri ordusu ilə birlikdə cəzalandırıb məğlub etməyə hazırdır ".

Azərbaycan.-2013.- 29 mart.- S.4.