Ermənistan xaos dövrünü yaşayır

Parlament binasında baş vermiş yanğın hakimiyyətəqarşı mübarizənin daha da kəskinləşməsinə işarədir

Ermənistanda cari ilin fevral ayında keçirilən prezident seçkilərindən sonra müşahidə olunan ən böyük problemlərdən biri də bu ölkədə parçalanma prosesinin sürətlənməsidir. Siyasi ekspertlər KİV-lərə verdikləri açıqlamalarda bildirirlər ki, bu prosesin xüsusilə son aylarda daha da dərinləşməsində əsas səbəb Ermənistanın vahid milli maraqlarının olmaması, ölkənin taleyinə təsir edən məsələlərə müxtəlif yanaşmaların mövcudluğudur. Bu, istər ölkə daxilində, istərsə də xaricdə, o cümlədən Avropa Şurasında Ermənistana qarşı formalaşmış münasibətlərə baxışda özünü əyani şəkildə büruzə verir.

Ermənistanda seçkilərdən sonrakı siyasi gərginlik hadisələrin daha da dərinləşməsinə gətirib çıxarıb. İrs partiyasının rəhbəri Raffi Ovannisyan başda olmaqla, müxalif qüvvələr məqsədlərinə çatana, yəni Serj Sarkisyanı hakimiyyətdən kənarlaşdırana qədər mübarizə aparmaq niyyətindədirlər.

Raffi Ovannisyanın Yerevan Opera Teatrının qarşısındakı meydanda prezident seçkilərinin nəticələrinin saxtalaşdırılmasına etiraz əlaməti olaraq aclıq aksiyasını davam etdirdiyi bir vaxtda ona qarşı sui-qəsd olunduğu bildirilir. Prezidentliyə sabiq namizədin seçki qərargahı Ovannisyanın həyatına sui-qəsd cəhdi ilə bağlı bəyanat yayıb. Bəyanatda bildirilir ki, aclıq aksiyasının keçirildiyi meydanda bir nəfər naməlum şəxs qışqıraraq Ovannisyanın çadırına yaxınlaşmağa çalışıb, lakin sabiq namizədin tərəfdarları buna imkan verməyiblər. Bəyanatda deyilir ki, biz polisdən potensial qatilin şəxsiyyətini müəyyənləşdirməyi və ona qarşı qaldırılacaq cinayət işi ilə bağlı ictimaiyyəti məlumatlandırmağı tələb edirik.

Raffi Ovannisyan isə bu hadisə ilə bağlı verdiyi açıqlamada qeyd edib ki, aksiyanı Serj Sarkisyanın andiçmə mərasiminə - aprelin 9-dək davam etdirəcək: "Məni bu yoldan heç bir qüvvə döndərə bilməz. Hətta ölümlə belə hədələyərək məni bu yoldan çəkindirə bilməyəcəklər. Serj Sarkisyan dəfələrlə müraciət edərək məni aclıq aksiyasını dayandırmağa çağırıb. Lakin mən ölkənin azadlığı uğrunda canımı belə verməyə hazıram".

Prosesin bu səpkidə cərəyan etdiyi bir vaxtda Yerevanda daha bir maraqlı hadisə qeydə alınıb. Yerli mətbuatın verdiyi xəbərə görə, parlament binasında yanğın baş verib. Rəsmi açıqlamada, yanğının binanın hansısa mərtəbəsində yığılmış kağız parçalarının alışması nəticəsində qeydə alındığı bildirilir. Hadisə nəticəsində xəsarət alan olmayıb.

Qeyd edək ki, bu, son bir neçə gündə parlament binasında qeydə alınan ikinci hadisədir. Xatırladaq ki, bir neçə gün öncə 25 yaşında Vrej Qalistiyan adlı bir gənc soyuq silahla (bıçaq) parlament binasına girməyi bacarmış, lakin təhlükəsizlik xidmətinin əməkdaşları həmin gənci ayağına atəş açmaqla dayandıra bilmişlər. Bütün bu hadisələr isə onu deməyə əsas verir ki, artıq ölkədəki insanların iqtidarın yürütdüyü siyasətə inamı və dözümü qalmayıb. Parlament binasında baş vermiş bu hadisələr hakimiyyətə qarşı mübarizənin daha da kəskinləşməsinə işarədir.

Ümumiyyətlə, bu gün Ermənistanda müxalif qüvvələrin və Serj Sarkisyan iqtidarının həyata keçirdiyi siyasətdən narazılıq ifadə edənlərin etirazları ümumilikdə ölkə daxilində cərəyan edən hadisələrə təsirsiz ötüşmür və cəmiyyətlə hakimiyyət arasında yaranmış uçurumu daha da dərinləşdirir. Hətta ekspertlər bildirirlər ki, iqtidarla opponentləri, eləcə də xalq arasında münasibətlər və hadisələrin inkişafına baxış antaqonist xarakter alıb. Elə bu məqam da Ermənistan cəmiyyətində parçalanmanın əsasının qoyulmasında əsas rol oynayır. Belə vəziyyətdə isə Ermənistan politoloqları ölkənin müstəqilliyinin də təhlükə altına düşməsi barədə həyəcan təbili çalırlar.

Ermənistanda yaşanan bu problemlə yanaşı, digər diqqətçəkən məqamlar da var. Onsuz da öz iqtisadi tempinə görə keçmiş postsovet ölkələrindən geridə qalan işğalçı ölkədə məhdud sayda fəaliyyət göstərən istehsal müəssisələri həm qlobal iqtisadi böhran, həm də daxildə baş verən siyasi qarşıdurma nəticəsində daha sürətlə sıradan çıxmağa başlayıb. İndi belə müəssisələrin böyük əksəriyyəti ya fəaliyyətini dayandırır, ya da özlərinin müflis olduğunu elan etməyə hazırlaşır. Bütün bunlar isə öz növbəsində Ermənistanın dövlət olaraq mövcudluğunu davam etdirəcəyinin inandırıcı görünmədiyini söyləməyə əsas verir.

Elçin CƏFƏROV

Azərbaycan.-2013.- 29 mart.- S.4.