«YARAT!» Müasir İncəsənət Məkanı məşhur gürcü rəssamı Mamuka Caparidzenin ustad sinfinin iştirakçılarının sərgisini təqdim etmişdir

"YARAT!" Müasir İncəsənət Məkanı "Art Villa" sərgi salonunda məşhur gürcü rəssamı və kuratoru, 48-ci Venesiya Biennalesinin iştirakçısı Mamuka Caparidzenin ustad sinfinin iştirakçılarının "Reflection" adlı sərgisini təqdim etmişdir.

"YARAT!" Müasir İncəsənət Məkanının maarifləndirici proqramı çərçivəsində təşkil edilən sərgi özündə "shadow hunting" metodunun tətbiqi ilə gipsdən hazırlanan kompozisiyalar, foto və videoları cəmləşdirmişdir. Sərginin qonaqlarına nadir imkan - ağacların "gözlər"inə baxmaq və istəyə uyğun olaraq moruq kolunun əkilməsində iştirak etmək imkanı verilmişdir.

Layihənin iştirakçıları Səyyarə Nemətova, Nigar Əlişova, Səbinə Abbasova, Fidan Abdullazadə, Aysel Nağıyeva, Əbülfəz Əliyev, Nərgiz Məmmədova, Diana Əliyeva, Olqa Martınova, Ülvi Mehdi, Samirə Səfixanova, Nazlı Orucova, Nəzrin Xəlilova, Məmməd Rəşidov, Zərifə Məmmədova, Fəridə Rəcəbova, Aysel Əmirovadır.

Layihənin sponsoru Azərbaycan Gənclər və İdman Nazirliyidir. Texniki dəstək isə Mədəniyyət və Turizm, Rabitə və İnformasiya Texnologiyaları nazirliklərinə məxsusdur.

2011-ci ildə gürcü rəssam və performansisti Mamuka Caparidzenin Tbilisidə yerləşən Müasir İncəsənət Mərkəzinin təşkil etdiyi qeyri-rəsmi təhsil proqramlarının iştirakçıları üçün açıq təcrübi dərslərin keçirilməsi məqsədilə yeni bağın salınması fikri yaranmışdı. Hazırda artıq mövcud olan və "Açıq sahədə akademiya" adlanan bağda tələbələr bir çox mədəniyyət təşəbbüslərinin həyata keçirilməsi ilə məşğuldurlar.

"Açıq sahədə akademiya"nın əsas məqsədi şagirdləri ətraf mühitin problemləri və ekoloji siyasətin prinsipləri ilə tanış etməkdir. Təlim kursunun əsas istiqaməti - yaradıcı ünsürlə orqanik fermerçiliyin prinsiplərinin birləşdirilməsi, ekoloji məsələlərə yeni ideyaların gətirilməsi və bu məsələlərin şövqləndirilməsidir. Akademiyanın müəllimləri var gücləri ilə dünyanın bədii cəhətdən dərk edilməsinin sərgi salonlarının hüdudlarından kənarda bərqərar olmasına çalışırlar.

"Açıq sahədə akademiya"da daim rəssamlarla, ümumiyyətlə, incəsənətin müxtəlif sahələrini təmsil edən peşəkarlarla qeyri-rəsmi görüşlər keçirilir. Hər belə seminar zamanı yeni mətbəx təcrübəsi təqdim edilir - sağlam və qeyri-adi qida bişirilib hazırlanır.

Akademiyanın bütün seminarları və tədbirləri təbiət qoynunda təşkil olunur. Musiqiyə qulaq asmaq, meşə gəzintiləri, bitkilərin və göbələklərin öyrənilməsi, ağacların əkilməsi, istixanaların və səyyah mətbəxinin qurulması təhsil proqramının hissələridir.

Mamuka Caparidze hazırda həm Tbilisidə, həm də Böyük Britaniyada yaşayıb çalışan gürcü rəssamıdır. O, öz yaradıcılığında müxtəlif texniki üslublardan və özünüifadə metodlarından geniş istifadə etməklə sonradan aksiyalar, performans, sərgilər və instalyasiyalar vasitəsilə təqdim olunan əsərlərdə sözləri və sədanı tətbiq edir. Rəssam əşyaların mövcudluq formalarını onların olduğu məişət-istifadə kontekstindən kənar, məkan və zaman çərçivələrində axtarmaqdadır.

Mamuka Caparidze Gürcüstanı 48-ci Venesiya Biennalesində təmsil etmişdir.

AzərTAc

Azərbaycan.-2013.- 29 mart.- S.6.