İfrat radikalizmə yer yoxdur, onun sonu iflasdır

Mübariz QURBANLI: "Eldar Namazovun yaratdığı qurumun məqsədi üçüncü qüvvə olmaq yox, radikallarla sosial bazanı bölüşdürmək uğrunda çarpışmadır"

Bu ilin oktyabr ayında Azərbaycanda keçiriləcək prezident seçkilərinə hazırlıq işləri davam edir. Seçkilərdə iştirak etmək niyyətində olan bütün siyasi təşkilatlar fəallıqlarını artırıblar. Ölkədəki ictimai-siyasi durum isə müsbət qiymətləndirilir. Söz yox ki, 7 aydan sonra keçiriləcək seçkilər zamanı Azərbaycan bir çox beynəlxalq təşkilatların diqqət mərkəzində olacaq. Təəssüf ki, ölkədə normal seçki mühitini pozmağa cəhd edən bəzi qüvvələr də var. Xalqın etimadını itirmiş qüvvələrin də antiazərbaycançı şəbəkəyə dəstək verməsi gözləniləndir. Bütün bunlara rəğmən Azərbaycanda tam demokratik seçkilərin keçirilməsi üçün hər cür şərait yaradılıb.

Mövcud durumu aydınlaşdırmaq üçün Yeni Azərbaycan Partiyasının icra katibinin müavni, Milli Məclisin deputatı Mübariz Qurbanlıya müraciət etdik:

- Mübariz müəllim, ölkədəki seçkiqabağı durumu necə dəyərləndirirsiniz?

- Seçkiqabağı durum çox normaldır. Prezident seçkilərində iştirak etmək istəyən hər bir siyasi partiyanın, namizədliyini irəli sürmək iddiasında olan şəxslərin fəaliyyəti üçün tam şərait yaradılıb. Müxtəlif siyasi partiyalar artıq ayrı-ayrı bölgələrdə toplantılar, görüşlər keçirirlər. Hərçənd ki, həmin toplantılara qoşulanların kəmiyyəti olduqca aşağıdır, amma hər halda, hər bir siyasi təşkilatın öz tərəfdarları ilə seçki kampaniyasına hazırlıqla əlaqədar görüşlər keçirmək imkanı yaradılıb və heç bir məhdudiyyət yoxdur. Azərbaycanda Seçki Məcəlləsinə uyğun olaraq seçki kampaniyasına hazırlıqla bağlı hər bir namizədə lazımi şərait yaradılır. Bütünlükdə hesab edirəm ki, Azərbaycanda tam azad, şəffaf, demokratik seçkilərin keçirilməsi üçün normal mühit var.

- Bütün seçkilərdə olduğu kimi, budəfəki prezident seçkiləri ərəfəsində də ölkədə müxtəlif qurumlar, təşkilatlar yaranır. Bu təşkilatlar özlərini üçüncü qüvvə adlandıraraq xalqın etimadını qazanacaqlarını iddia edirlər. Bu qurumlarda təmsil olunan şəxslərin bəziləri siyasi riyakarlar, reneqatlar və özlərini ziyalı hesab edən bir qrup narazı insanlardır. Sizcə, belə şəxslərin cəmləşdiyi qurumlara xalq etimad göstərəcəkmi?

- Bu gün biz azad, demokratik bir ölkədə yaşayırıq və seçkilərdə iştirak etmək istəyən hər bir şəxs özünü cəmiyyətə təqdim etməyi, imkanlarını göstərməyi bacarmalıdır. Hansı ad altında bir təşkilat yaradılırsa və gələcəkdə o qurumun seçkilərə qatılacağı təqdirdə biz onunla siyasi müstəvidə rəqabət aparmağa hazırıq. Çünki Yeni Azərbaycan Partiyası kifayət qədər güclü partiyadır, onun seçkilərdə qələbə qazanacağına ümidimiz böyükdür. Buna proqnozlarımız əsas verir.

Digər tərəfdən isə artıq demək olar ki, Azərbaycan vətəndaşları öz siyasi mövqelərini müəyyənləşdiriblər. Ölkədə hakimiyyətin, konstruktiv mövqedə dayanan müxalifət partiyalarının və radikal, aqressiv yönümlü müxalifətin mövqeyini dəstəkləyən qüvvələr var. Bununla belə, Azərbaycan əhalisinin mütləq əksəriyyəti hakimiyyətin mövqeyini dəstəkləyir və mövcud ictimai-siyasi vəziyyətin dəyişməsini arzulamır. Konstruktiv müxalifət partiyalarının rəhbərləri Milli Məclisdə təmsil olunurlar, təklif və iradlarını səsləndirir və prezident seçkilərində namizədliklərini irəli sürəcəklərini bəyan edirlər. Aqressiv, dağıdıcı müxalifətin rəhbərliyində olanlar isə hakimiyyətdə olduqları dövrdə siyasi iflasa uğramış şəxslərdir. Onlar sadəcə, cılız hisslərlə yaşayırlar və nəyin bahasına olursa-olsun hakimiyyətə qayıtmaq iddiasındadırlar. Lakin onların sosial dayaqları məhduddur. Bu palitradan yanaşdıqda, yeni bir qurumun ortaya çıxması və onun "El" adlandırılması, guya bu ad altında vətəndaşları öz ətrafına yığa bilməsi iddiası o qədər də inandırıcı görünmür. Onlar Eldar Namazovun ətrafına toplaşmış bir qrup şəxsdir. Bu adamların bəziləri siyasi hakimyyətdə olmuş və uğur qazana bilməmişlər. Onlar hansısa yeni bir ideoloji siyasi konsepsiyanı və yaxud proqramı ortaya qoymayıblar. Bütövlükdə, bunlar içərisindən yalnız bir qisim aqressivlərin söykəndiyi seçicilərə, bir qismi isə konstruktivlərin söykəndiyi seçicilərə istinad edə bilər. Bu isə bütövlükdə Azərbaycan cəmiyyətində siyasi mühitdə, siyasi bir çevrədə hansısa bir dəyişikliyə gətirib çıxarmayacaq. Əslində, reneqat Eldar Namazovun yaratdığı qurumun məqsədi üçüncü qüvvə olmaq yox, radikallarla sosial bazanı bölüşdürmək uğrunda çarpışmadır. Hesab edirəm ki, növbəti seçkilərdə siyasi mübarizə hakimiyyətə gəlmək üçün çalışan qüvvələr arasında ikincilik yarışına çevriləcək. Birincilk artıq tam proqnozlaşdırılıb. Aparılan araşdırmalar göstərir ki, Azərbaycan xalqının mütləq əksəryyəti Prezident İlham Əliyevi dəstəkləyir və onu yenə də ölkə başçısı kimi görmək istəyir. Qalan qüvvələr isə ikincilik naminə bir-birinin tərəfdarlarını öz dairələrinə çəkmək üçün çalışacaqlar. İndki situasiya bundan ibarətdir. Seçki prosesi yaxınlaşdıqca aqressivlərin çevrəsi daha da daralacaq. Çünki onların irəli sürdükləri tezislər cəmiyyət tərəfindən qəbul edilmir. Azərbaycan cəmiyyəti iqtisadi, siayasi sabitlik, inkişafa yönələn siyasət istəyir və əksəriyyət də bundan yararlanır. Ona görə də cəmiyyətin marağı indiki siyasətin müdafiəsinə yönəlib. Hesab edirəm ki, "El" adlanan qrup, əslində, özünü böyük bir ad altında ortaya atsa da, hansısa sosial bazaya malik olmadığı üçün seçkiyə qədər daha da zəif formada özünü nümayiş etdirəcək.

- Bu gün ölkədə müxalifətin sosial bazası yox dərəcəsindədir. Ancaq seçki yaxınlaşdıqca bu qüvvələr bir qədər aktivləşməyə çalışırlar. Kiçik bir hadisəni şişirtməklə yenə gəncləri önə verib arxada gizlənən siyasi "liderlər" köhnə peşələrindən əl çəkmirlər. Hətta son olaraq əsgər ölümündən istifadə edərək ictimai sabitliyi pozmağa çalışdılar...

- Bu gün Azərbaycanda olan uğurların sahibi Yeni Azərbaycan Partiyası və ölkə iqtidarı, Azərbaycan Prezidentidir. Ölkənin inkişafı, əldə edilən bütün uğurlar, dövlət büdcəmizin artımı, neft gəlirləri, digər sahələrin sürətlə inkişafı, insanların sosial durumunun yaxşılaşdırılması, yoxsulluğun aradan qaldırılması istiqamətində görülən bütün işlər Prezident İlham Əliyevin fəaliyyəti ilə bağlıdır. Azərbaycan cəmiyyəti bunu qəbul edir. Digər tərəfdən, ölkədə hər hansısa bir neqativ hal baş verirsə, onun da cavabdehi indiki iqtidardır. Ancaq dağıdıcı müxalifətin destruktiv fəaliyyəti və hakimiyyətə gəlmək ehtirasları elə bir səviyyəyə qalxır ki, onların fəaliyyətində milli maraqlar arxa plana keçir. Şəxsi və qrup maraqlarının ön plana keçdiyi dönəmdə onlar hər şeydən istifadə etməyə çalışırlar. Bu qüvvələr "Nə qədər hakimiyyətə pisdirsə, bizim üçün o qədər yaxşıdır" tezisini irəi sürürlər. Bunun arxasında isə "millətə, dövlətə pisdir" ifadəsi də dayanır. Çünki hakimiyyət milləti, dövləti təmsil edir. Ona görə də dağıdıcı qüvvələr bütün vasitələrdən istifadə etmək istəyirlər. Onlar ən adi hadisələri şişirdərək siyasiləşdirmək cəhdlərindən belə çəkinmirlər. Hər kəs bilir ki, Azərbaycanda ordu quruculuğu sahəsində böyük uğurlar qazanılıb. Azərbaycan ordusu bu gün Cənubi Qafqazın ən güclü ordusudur. Ordu ilə əlaqədar aparılan bütün təhqiqatlar bunu deməyə əsas verir. Azərbaycan ordusu 20 ildir döyüş səngərindədir. İşğal olunmuş ərazilərimiz var. Müharibə hələ bitməyib və bu gün də davam edir. Səngərdə olan orduda təbii ki, psixoloji çətinliklər də olur. Bu da bəzən xoşagəlməz hadisələrə gətirib çıxarır. Heç bir ordu komandiri öz əsgərinin nəinki həlak olmasını, heç onun başından bir tük əksik olmasını belə arzulamır. Ancaq heç kim qəzadan sığortalanmayıb. Ordumuza dövlət tərəfindən böyük diqqət, qayğı var. Amma bunu görmək istəməyən aqressiv müxalifət əsgər ölümü üzərində siyasət quraraq onu hakimiyyətə qarşı çevirmək istəyir. Ancaq bu qüvvələrə xalq yenə də "yox" deyir. Çünki onlar Azərbaycan ordusunu gözdən salmaq, ordu ilə bağlı yanlış təəssürat yaratmaq istəyirlər. Bütün bunlar dağıdıcı müxalifətə xas olan xüsusiyyətdir. Bu həm də belə qüvvələrin iflasının göstəricisidir. Ona görə də onlar Azərbaycan cəmiyyətində mövqe qazana bilməyəcəklər. Çünki cəmiyyət bu cür hərəkətləri bütövlükdə qəbul etmir, ona tərəfdar deyil.

- Prezident seçkiləri zamanı Azərbaycan bir çox dövlətlərin diqqət mərkəzinə çevriləcək. Ölkəmizi istəyən qüvvələrlə yanaşı, istəməyənlər də aktivləşəcəklər. Necə düşünürsünüz, seçkilərə 7 ay qalmış əsgər ölümünü siyasiləşdirib siyasi şou düzənləyən aqressiv, dağıdıcı qüvvələr seçkilər ərəfəsində antiazərbaycançı şəbəkəyə xidmət göstərə bilərmi?

- Hər bir seçki prosesində siyasi ehtirasların coşması təbii hadisədir. Amma bu siyasi ehtirasların coşması qanunların pozulmasına gətirib çıxarmamalıdır. Hər şey qanun çərçivəsində olmalıdır. Kim qanunu pozacaqsa, adekvat cavab alacaq. Ölkədə xaos, anarxiya yaratmaq istəyən qüvvələrin qarşısı alınacaq. Azərbaycanı istəməyən dairələr var. Prezident İlham Əliyev bununla bağlı fikirlərini açıqlayıb. Bunlar Ermənistan, erməni lobbisi və Azərbaycanın sürətli iqtisadi inkşafını qəbul etmək istəməyən bəzi dairələrdir. Ermənistandan başqa Azərbaycanın bütün ölkələrlə münasibətləri yüksək səviyyədədir. Bakı dünya dövlətlərinin, beynəlxalq təşkilatların bir araya gəldiyi məkana çevrilib. İfrat radikal dairələr isə seçki zamanı pozuculuq hallarına yol verə bilərlər və belə cəhdlər ediblər də. Lakin belə halların qarşısı mütləq alınacaq. Çünki cəmiyyət bu cür pozuculuğu istəmir. Bir məşhur kəlamda deyilir: "Həndəsi aksiomlar insanların maraqlarına zidd olsaydı, onları çoxdan təkzib edərdilər". Bizim hakimiyyət insanların maraqlarını ifadə etməsəydi, Azərbaycan cəmiyyəti hakimiyyətə mənfi reaksiya verərdi. Bu maraq milli, dövlət marağıdır. Ona görə də hər cür ifrat radikalizmə yer yoxdur və onun sonu iflasdır.

Rəşad BAXŞƏLİYEV

Azərbaycan.-2013.- 30 mart.- S.3.