Azərbaycan və İtaliya gənclər təşkilatları arasında əməkdaşlıq imkanları müzakirə edilmişdir

Xəbər verdiyimiz kimi, martın 28-29-da İtaliyanın paytaxtı Roma şəhərində Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumunun (ASAİF) növbəti - Roma forumu keçirilir.

"Azərbaycan 2020. Gənclərin baxışı" başlığı altında və "2020-ci ilə baxış: Mənim Azərbaycanım - mənim gələcəyim" şüarı ilə keçirilən forum çərçivəsində Azərbaycan və İtaliya gənclər təşkilatları arasında görüş keçirilmişdir. Görüşdə gənclər və idman nazirinin müavini İntiqam Babayev və İtaliya Nazirlər Kabineti yanında Gənclər və Dövlət Mülki Xidməti rəhbərinin müşaviri Mauro Skanu çıxış edərək, hər iki ölkənin gənclər və tələbə təşkilatlarını sıx əlaqələr qurmağa, birgə və beynəlxalq layihələr çərçivəsində əməkdaşlıq etməyə çağırmışlar.

Sonra hər iki ölkənin gənclər təşkilatlarının nümayəndələri təmsil etdikləri qurumları təqdim etmişlər. Görüşdə məktəbli və gənclər arasında birgə layihələr, o cümlədən italyan və azərbaycanlı gənclərin iştirakı ilə gənclər həftəsinin, fəal italyan gənclərin "Azərbaycanın gənc dostları" layihəsi çərçivəsində Azərbaycana səfərinin təşkil olunması barədə təkliflər səsləndirilmişdir.

Görüşdən sonra "İrəli" İctimai Hərəkatı ilə İtaliyanın "Giovanni nel Mondo" təşkilatı arasında, Azərbaycan Tələbə-Gənclər Təşkilatları İttifaqı ilə "AİESEC" beynəlxalq tələbə təşkilatının İtaliya qolu və İtaliyanın təşkilatçılığı üzrə fəaliyyət göstərən Tələbə Hərəkatı arasında, Azərbaycan Gənclərinin Avropaya İnteqrasiyası Təşkilatı İctimai Birliyi (AGAT) ilə İtaliyanın Aktiv Səyahətçilərin Ostia Hərəkatı (A.T.O.M.) arasında əməkdaşlığa dair memorandum imzalanmışdır.

Elgün Niftəliyev,

AzərTAc-ın xüsusi müxbiri

Roma

Azərbaycan.-2013.- 30 mart.- S.3.