Pakistanın nüfuzlu «Diplomatic
Star» jurnalında «31 mart –1918-ci ilin qanlı yaddaşı» sərlövhəli
məqalə dərc edilmişdir
Pakistanın
nüfuzlu ingilisdilli "Diplomatic Star" jurnalının 29
mart tarixli nömrəsində "31 mart - 1918-ci ilin qanlı
yaddaşı" sərlövhəli məqalə dərc
edilmişdir.
Azərbaycanın
Pakistandakı səfirliyindən AzərTAc-a bildirmişlər
ki, yazıda hər il martın 31-nin Azərbaycanlıların
Soyqırımı Günü kimi qeyd olunduğu
vurğulanmışdır. Müəllif əsrlər boyu
"böyük Ermənistan" xülyası ilə
yaşayan erməni şovinistlərin öz məkrli niyyətlərinə
çatmaq üçün hər vasitəyə əl
atdıqlarını, dinc əhaliyə qarşı misli
görünməmiş cinayətlər törətdiklərini
yazır.
Məqalədə
Gülüstan və Türkmənçay müqavilələrindən
sonra Azərbaycanın iki hissəyə
bölündüyü, rus çarı I Nikolayın
imzaladığı fərmanla İrandan və Türkiyədən
Azərbaycanın tarixi torpaqlarına on minlərlə erməninin
köçürüldüyü, onların böyük bir
hissəsinin Qarabağda və İrəvanda yerləşdirildiyi
qeyd edilmişdir.
Yazıda
1918-ci ildən başlayaraq təpədən dırnağa qədər
silahlanmış erməni millətçiləri tərəfindən
rus bolşevikləri ilə birgə Azərbaycanın
Bakı, Şamaxı, Quba, Naxçıvan, Lənkəran, Zəngəzur
və digər yerlərində 50 mindən çox
günahsız insanın qəddarcasına
öldürüldüyü, həmin ərazilərdə
yüzlərlə kəndin Yer üzündən silindiyi
vurğulanmışdır. Təkcə Bakıda 30 mindən
çox insanın amansızlıqla qətlə yetirildiyi
vurğulanan yazıda diqqətə
çatdırılmışdır ki, erməni millətçiləri
qonşu Azərbaycana və Gürcüstana torpaq
iddialarından hələ də əl çəkmirlər.
İkinci
Dünya müharibəsindən sonra Suriya, Yunanıstan, Livan,
İran, Bolqarıstan, ABŞ, Fransa və digər ölkələrdən
Ermənistana 509 min erməninin
köçürüldüyünün qeyd olunduğu
yazıda bildirilmişdir ki, 1948-1953-cü illərdə sovet rəhbərliyinin
qərarı ilə on minlərlə azərbaycanlı Ermənistandan,
öz dədə-baba torpaqlarından respublikamızın aran
rayonlarına köçürülmüşdür.
Məqalədə
1980-ci illərin sonunda keçmiş SSRİ-də baş verən
hadisələrdən sui-istifadə edən ermənilərin
öz çirkin ssenarilərini yenidən işə
saldıqları və Azərbaycana qarşı torpaq
iddiaları qaldırıldığı qeyd edilmişdir.
Müəllif 250 min azərbaycanlının Ermənistandan
deportasiya edildiyini və bununla da, ölkələrini monoetnik
respublikaya çevirmək planına nail olduqlarını
bildirmişdir.
Yazıda
Ermənistanın Azərbaycana qarşı həyata keçirdiyi
təcavüzkar siyasət nəticəsində
respublikamızın torpaqlarının 20 faizinin işğala
məruz qaldığı, 1 milyondan artıq azərbaycanlının
öz doğma yurd-yuvalarından didərgin
düşdüyü, 30 min insanın isə qətlə
yetirildiyi qeyd olunmuşdur. Məqalənin Xocalı soyqırımından
bəhs edilən hissəsində dinc əhaliyə
qarşı törədilmiş vəhşiliklər, yüzlərlə
uşaq, qadın və ahılın xüsusi
amansızlıqla qətlə yetirilməsi haqqında məlumat
verilmişdir.
Məqalədə
həmçinin qeyd edilmişdir ki, 1991-ci il oktyabrın 18-də
müstəqilliyini bərpa edən Azərbaycan
xalqımıza qarşı aparılmış
soyqırımı siyasətinə müvafiq hüquqi qiymət
vermək imkanı əldə etmişdir. Müəllif
ümummilli lider Heydər Əliyevin 1998-ci il martın 26-da
imzaladığı fərmanla 31 martın Azərbaycanlıların
Soyqırımı Günü kimi qeyd olunduğunu
vurğulamışdır.
Yazının
tam mətni ilə
http://www.diplomaticstar.com/magazine/31st-march-the-day-of-genocide-of-the-azerbaijanis.html
linkindən tanış olmaq mümkündür.
Azərbaycan.-2013.- 30 mart.- S.4.