Erməni millətçilərinin Azərbaycan xalqının başına gətirdikləri müsibətlər heç vaxt unudulmayacaqdır

Martın 29-da Azərbaycan Texniki Universitetində (AzTU) 31 mart - Azərbaycanlıların Soyqırımı Günü ilə əlaqədar anma mərasimi keçirilmişdir.

AzərTAc xəbər verir ki, əvvəlcə faciə qurbanlarının xatirəsi bir dəqiqəlik sükutla yad edilmişdir.

Tədbirdə AzTU-nun rektoru, professor Havar Məmmədov 1918-ci ilin mart-aprel aylarında erməni millətçilərinin Azərbaycan xalqına qarşı törətdikləri kütləvi qırğından, silahlı erməni dəstələrinin dinc əhalini amansızcasına qətlə yetirməsindən danışmışdır. Bildirmişdir ki, Bakı, Gəncə quberniyalarında, Quba, Xaçmaz, Şamaxı, Lənkəran, Muğan qəzalarında və digər bölgələrdə də bu cür qanlı faciələr törədilmişdir.

Erməni millətçilərinin əsrlər boyu türklərə qarşı soyqırımı siyasəti həyata keçirdiyini vurğulayan H.Məmmədov 31 mart hadisələrinin dünyada ən qanlı soyqırımı kimi tanınmasının vacibliyini qeyd etmişdir. Azərbaycan xalqının dəfələrlə deportasiyaya, soyqırımına məruz qaldığını diqqətə çatdıran rektor bu məkrli siyasətin ermənilərin havadarlarının köməyi ilə reallaşdırıldığını bildirmişdir.

XIX əsrin əvvəllərində Azərbaycanın Rusiya və İran arasında bölüşdürülməsi, həmin dövrdən başlayaraq çar Rusiyasının siyasi dəstəyi və himayəsi ilə ermənilərin Şimali Azərbaycan torpaqlarına köçürülməsi, erməni ekspansionizminin geniş vüsət alması və türk-müsəlman əhalisinə qarşı törədilən təxribat, soyqırımı aktları tarixi faktlarla mərasim iştirakçılarının diqqətinə çatdırılmışdır.

H.Məmmədov azərbaycanlıların soyqırımına hüquqi-siyasi qiymətin yalnız ümummilli lider Heydər Əliyev tərəfindən verildiyini qeyd etmişdir. Ulu öndərin 1998-ci ildə imzaladığı fərmanla martın 31-i rəsmən "Azərbaycanlıların soyqırımı günü" kimi qəbul edilmişdir. Rektor xalqımızın başına gətirilən müsibətlərin dünya ictimaiyyətinə düzgün çatdırılmasının, maarifləndirmə və təbliğat işlərinin aparılmasının vacibliyini xüsusi vurğulamış, Prezident İlham Əliyevin bu sahədə uğurlu və ardıcıl siyasət yürütdüyünü bildirmişdir.

Milli Məclisin deputatı Fəzail İbrahimli, Yeni Azərbaycan Partiyası Yasamal rayon təşkilatının sədri, professor Fikrət İsmayılov tədbirdə çıxış edərək soyqırımı faktorunun birdən-birə yaranmadığını diqqətə çatdırmışlar. Avropa dövlətlərinin Osmanlı imperiyasına qarşı ermənilərdən istifadə etmək planlarının sonradan acı nəticələr verdiyini qeyd edən natiqlər ermənilərin zaman-zaman öz məkrli siyasətini həyata keçirmək üçün məqam axtardıqlarını bildirmişlər. Çar Rusiyasının Qafqaz siyasətindən, imperiya rəhbərlərinin ermənilərin himayə olunması ilə bağlı verdikləri qərarlardan geniş danışılmışdır.

Tədbirdə 1918-ci ilin mart-aprel aylarında ermənilər tərəfindən törədilən cinayətlərin Azərbaycan xalqının yaddaşında silinməz iz qoyduğu, təkcə milli mənsubiyyətinə görə minlərlə dinc azərbaycanlının məhv edildiyi, evlərin yandırıldığı, insanların diri-diri oda atıldığı, milli memarlıq abidələrinin, məscidlərin və digər tikililərin dağıdıldığı, azərbaycanlıların soyqırımının Bakı ilə yanaşı, Azərbaycanın digər ərazilərində də xüsusi qəddarlıqla həyata keçirildiyi vurğulanmışdır.

Qeyd olunmuşdur ki, 1992-ci il fevralın 26-da Xocalıda günahsız dinc Azərbaycan əhalisinə qarşı törədilmiş soyqırımı hadisəsi müasir dövrdə erməni millətçi ideologiyasının qanlı təzahürlərindən biri və 1918-ci ilin mart-aprel aylarında ermənilər tərəfindən həyata keçirilmiş qətliamın davamı kimi qiymətləndirilməlidir.

Azərbaycan.-2013.- 30 mart.- S.5.