Naxçıvanda «Heydər Əliyev və
Azərbaycan» mövzusunda elmi konfrans
keçirilib
Naxçıvan
Muxtar Respublikasında fəaliyyət göstərən elm və
təhsil müəssisələrin kollektivlərinin
iştirakı ilə Azərbaycan xalqının ümummilli
lideri Heydər Əliyevin anadan olmasının 90 illik yubileyinə
həsr edilən "Heydər Əliyev və Azərbaycan"
mövzusunda elmi konfrans keçirilib. Azərbaycan Milli Elmlər
Akademiyasının Naxçıvan Bölməsinin
Naxçıvan Dövlət Universiteti, Naxçıvan
Müəllimlər İnstitutu və Naxçıvan Özəl
Universiteti ilə birgə keçirdiyi konfransın
iştirakçıları əvvəlcə ulu öndərin
Naxçıvan şəhərindəki abidəsini ziyarət
etmiş, qarşısına gül dəstələri
qoymuşlar.
Daha
sonra konfrans AMEA Naxçıvan Bölməsinin geniş
zalında öz işinə başlamışdır.
Günün birinci yarısında keçirilmiş plenar
iclası AMEA Naxçıvan Bölməsinin sədri,
akademik, Milli Məclisin deputatı İsmayıl Hacıyev
açaraq dahi siyasətçinin həyatı və siyasi fəaliyyətindən
bəhs etmişdir. Qeyd edilmişdir ki, ümummilli lider Heydər
Əliyev hələ SSRİ dövründən Azərbaycanın
inkişafı, müstəqilliyi üçün
çalışmış, ikinci dəfə ölkə rəhbəri
seçildikdən sonra isə respublikanın bütün sahələrində
sürətli yüksəlişə nail olmuşdur. İstər
siyasi-iqtisadi, istər sosial-mədəni, istərsə də
infrastruktur baxımından ölkəmizin sürətli
inkişafı, dünya dövlətləri sırasında
söz sahibi olması birbaşa Heydər Əliyevin uzagörən
siyasətinin və bu gün həmin kursun uğurla davam
etdirilməsi nəticəsində əldə edilmişdir.
Plenar
iclasda ilk olaraq AMEA-nın vitse-prezidenti, akademik, Milli Məclisin
deputatı İsa Həbibbəyli "Heydər Əliyevin
dövlətçilik təlimində azərbaycançılıq
siyasəti: ədəbi düşüncədən dövlət
ideologiyası səviyyəsinə" mövzusunda məruzə
etmişdir. Məruzədə Heydər Əliyevin dövlətçilik
təlimində azərbaycançılığın əsas
yer tutduğunu bildirən natiq bu təlimin əsasını təşkil
edən ideologiyanın formalaşmasının XIX əsrin
sonlarında başlanmasına baxmayaraq, inkişafının və
ideologiyadan reallığa çevrilməsinin əsasında
Heydər Əliyev amilinin dayandığını xüsusi
vurğulamışdır.
Konfransda
Naxçıvan Müəllimlər İnstitutunun rektoru,
professor Oruc Həsənli "Heydər Əliyev: müstəqil
Azərbaycan dövlətinin banisi və qurucusu",
Naxçıvan Özəl Universitetinin rektoru, professor
İsmayıl Əliyev "Heydər Əliyevin dövlətçilik
təlimində təhsil siyasəti və
Naxçıvan", AMEA Naxçıvan Bölməsinin sədri,
akademik İsmayıl Hacıyev "Heydər Əliyev -
dünya şöhrətli siyasətçi",
Naxçıvan Dövlət Universitetinin prorektoru, professor Məmməd
Rzayev "Heydər Əliyev və Azərbaycanın dövlət
müstəqilliyi" mövzularında məruzə
etmişlər.
Konfrans
günün ikinci yarısında bölmə iclaslarında
öz işini davam etdirmişdir. "Heydər Əliyev və
Azərbaycanın inkişafı", "Heydər Əliyev
və Azərbaycan iqtisadiyyatı", "Heydər Əliyev
və Azərbaycanın ərazi bütövlüyü",
"Heydər Əliyev və Azərbaycan elmi", "Heydər
Əliyev və Azərbaycan mədəniyyəti"
başlıqlı bölmələrdə ümumilikdə 47
məruzə dinlənilmişdir.
Elxan MƏMMƏDOV
Azərbaycan.-2013.- 2 may.- S.8.