Ümummilli liderin arzu və
istəkləri reallığa çevrilir
Ümummilli
lider, müstəqil Azərbaycanın banisi, dünyanın ən
böyük azərbaycanlısı Heydər Əliyevin 90
illiyində onun barəsində fikir söyləmək çətin
olduğu qədər də, məsuliyyətli, həm də
şərəflidir.
Dövləti qurub-yaradan, məhv olmaq təhlükəsindən
xilas edən, mənalı ömrünü xalqına sədaqətlə
xidmətə həsr edən, həyatda məqsədi
qurub-yaratmaq olan insanlar dahi şəxsiyyətlərdir. Tarix isə
belə şəxsiyyətləri çox nadir hallarda
yetişdirir və həm də bu xoşbəxtlik tək-tək
xalqa nəsib olur.
Xalqımız
xoşbəxtdir ki, XX əsr Azərbaycana, xalqımıza 2
böyük və əvəzolunmaz nemət bəxş
etmişdir: dövlət müstəqilliyi və əbədi
LİDER.
Həqiqətdir ki, dövlət müstəqilliyi hər
bir xalqın həyatında ən dəyərli nemətdir. Bu dəyərli
neməti əldə etmək nə qədər çətindirsə,
onu qorumaq, möhkəmləndirmək bir o qədər də
ağır və mürəkkəbdir. Bu
mühüm tarixi vəzifənin öhdəsindən isə
yalnız sözün əsl mənasında, həqiqi
LİDER gələ bilir.
Bəli,
XX əsrin Azərbaycana, xalqımıza, dünyaya bəxş
etdyi ən böyük vətəndaş, dahi şəxsiyyət,
müdrik siyasi xadim, xalqımızın əbədi lideri,
dünənin, bu günün və sabahın aparıcı
siyasi qüvvəsi olan Yeni Azərbaycan Partiyasının
yaradıcısı Heydər Əliyevdir.
90 illik
bir zaman axarını vərəqlədikcə
açıq-aydın görürük ki:
- Heydər
Əliyev böyük siyasət qalasının ən uca zirvəsini
fədakarlıqla fəth edə bilmişdir.
- Ulu
öndər kiçik bir məmləkətin adını
bütün dünyaya tanıtmağa nail olmuşdur.
- O, qəlbi
daim bəşəri duyğularla döyünən ümumbəşər
övladı, ən böyük azərbaycanlı idi.
- Heydər
Əliyevin adı həmişə dünyanın tanınan,
sayılıb-seçilən, hörmət bəslənilən
siyasi liderləri, ən müdrik rəhbərləri
sırasında çəkilir.
-
Dünya siyasət meydanında cərəyan edən proseslərə
təsir baxımından dahi siyasətçi həmişə
öz sözü, öz çəkisi, öz dəst-xətti
ilə seçilmişdir.
- Heydər
Əliyev əsl ümumxalq məhəbbəti, sevgisi
qazanmış tək-tək siyasətçilərdən,
dövlət xadimlərindəndir.
Bəli,
XX əsrin sonlarında Azərbaycanda dövlətçilik ənənələrinin
bərpa edilib zənginləşdirilməsi, Azərbaycanın
dövlət müstəqilliyinin möhkəmləndirilməsi,
onun əbədi, dönməz xarakter alması, ölkəmizin
dinamik iqtisadi inkişaf yolu ilə inamla irəliləməsi,
beynəlxalq nüfuzunun sürətlə artması, strateji
müttəfiqlərin qazanılması Heydər Əliyevin
uzaqgörən və zəngin siyasi fəaliyyəti sayəsində
mümkün oldu.
Azərbaycanın ən yeni tarixində müstəqil
dövlət ideyası məhz Heydər Əliyevin adı ilə
bağlıdır. Ümummilli lider Azərbaycanın
güclü dövlətə çevrilməsində
iqtisadiyyatın əhəmiyyətini hər zaman yüksək
qiymətləndirirdi. Ulu öndər
güclü dövləti müstəqilliyin əsası hesab
edirdi. Buna görə də o, "Azərbaycanın
dövlət müstəqilliyi yolunda fədakarcasına
çalışmaq mənim həyatımın mənasıdır"
- deyirdi və buna qətiyyətlə əməl edirdi.
Ulu öndər Heydər Əliyevin 1993-cü ildə -
tarixin ən çətin mərhələsində
xalqımızın təkidli tələbi ilə ikinci dəfə
hakimiyyətə qayıdışı nəticəsində
xalqımız o ağır, təlatümlü günlərdən,
dövlətimiz isə məhv olmaq təhlükəsindən
xilas oldu.
Böyük xilaskar 1993-2003-cü illərdə ölkəni
yenidən qurdu, faktiki olaraq güclü dövlət
yaratdı, uzaqgörənliyi, qətiyyəti və əzmkarlığı
ilə Azərbaycanın yeni tarixində müstəqilliyimizin
əbədi olmasını təmin etdi.
Tarixə qısa nəzər salsaq, görərik ki, son
200 ildə ermənilər Azərbaycan torpaqlarının ələ
keçirilməsi planını öz havadarlarının -
erməni lobbisinin köməyi ilə mərhələ-mərhələ
həyata keçirmişlər. Bu məkrli siyasət
nəticəsində XX əsrdə xalqımızın
başına müsibətlər, dəhşətli faciələr
gətirilib. 1905-ci, 1918-1920-ci, 1948-1950-ci və
1988-ci illərdə azərbaycanlıların öz ata-baba
yurdlarından zorla köçürülməsi, deportasiya,
etnik təmizləmə və soyqırımılara məruz
qalması məhz bu yüzillikdə törədilmiş
müsibətlərdir.
Danılmaz faktdır ki, hələ 1969-1982-ci illərdə
ümummilli lider Heydər Əliyev Azərbaycana rəhbərlik
etdiyi dövrdə Moskvada və xaricdəki erməni lobbisinin
Dağlıq Qarabağa olan iddialarının
qarşısını almağa müvəffəq olmuşdu. Ermənilər çox
cidd-cəhd etsələr də, öz çirkin istəklərinə
nail ola bilmirdilər.
Buna görə də onlar birinci növbədə Heydər
Əliyevin keçmiş Sovetlər İttifaqının rəhbərliyindən,
Siyasi Bürodan uzaqlaşdırılmasını
qarşılarına məqsəd qoymuşdular. Təəssüflər
olsun ki, Heydər Əliyev böyük siyasətdən Mixail
Qorbaçovun əli ilə uzaqlaşdırıldıqdan 25
gün sonra Dağlıq Qarabağ böhranı yenidən
qızışdırıldı və ermənilər havadarlarının
köməyi ilə öz çirkin planlarını həyata
keçirə bildilər.
Heydər Əliyevin böyük siyasətdən getməsi,
Azərbaycanda olmaması xalqımıza çox baha başa gəldi. Həmin dövrdə nələrin
baş verdiyinə nəzər salaq: 1988-ci il Sumqayıt hadisələri,
20 Yanvar, əsrin ən dəhşətli cinayəti olan
Xocalı faciəsi, Ermənistanın 1988-1992-ci illərdə
planlı şəkildə həyata keçirdiyi etnik təmizləmə
siyasəti nəticəsində tarixən bu ərazidə
yaşamış 250 min azərbaycanlının öz
doğma yurdlarından zorla qovularaq Azərbaycana pənah gətirməsi,
Ermənistan silahlı qüvvələri tərəfindən
Azərbaycan torpaqlarının 20 faizinin - Dağlıq
Qarabağın və ona bitişik olan 7 rayonun işğal
olunması, 700 min nəfərədək azərbaycanlının
öz doğma yurdunda məcburi köçkünə
çevrilməsi, Azərbaycanda bir milyona yaxın
qaçqın və məcburi köçkünün
olması və s.
Əgər Heydər Əliyev xalqın iradəsi və
çağırışı ilə 1993-cü ildə yenidən
siyasi hakimiyyətə gəlməsəydi, onda xalqımız
daha böyük fəlakətlərlə, müsibətlərlə
üzləşə bilərdi. Yalnız taleyinə xilaskarlıq
missiyası yazılan Heydər Əliyev bütün məhrumiyyətlərə
sinə gərərək dövləti qurdu, onu zamanın
ağır və sərt sınaqlarından mərdliklə
çıxardı, məhv olmaq təhlükəsindən
xilas etdi, vətəndaş müharibəsinə son qoydu,
ölkənin siyasi inkişafı və iqtisadi yüksəlişi
üçün etibarlı baza yaratdı.
Bütün
mənalı həyatını Azərbaycanın tərəqqisinə,
əhalinin güzəranının, rifah halının
yaxşılaşdırılmasına həsr edən
ümummilli lider Heydər Əliyevin ən böyük
arzularından biri də Ermənistan-Azərbaycan,
Dağlıq Qarabağ münaqişəsinin ədalətli həlli,
zəbt olunmuş torpaqlarımızın erməni
işğalından azad edilməsi, bir milyondan artıq
soydaşımızın doğma yurdlarına ləyaqətlə
qaytarılması idi. O, bunun üçün daim var qüvvəsi
ilə çalışırdı.
Xalqımızın
unudulmaz lideri Heydər Əliyevin rəhbərliyi ilə bu problemin
həm siyasi yolla həlli, həm də qaçqın və məcburi
köçkünlərin sosial müdafiəsi ilə
bağlı genişmiqyaslı işlərdən bəzilərini
sadalamaq istərdim:
- məhz Heydər Əliyevin diplomatiyası sayəsində
Ermənistan-Azərbaycan, Dağlıq Qarabağ
münaqişəsinin əsl mahiyyəti, Azərbaycanın
haqq səsi dünya ictimaiyyətinə
çatdırıldı, Ermənistanın təcavüzkar
siyasəti ifşa edilərək gələcək qələbəmizin
siyasi, diplomatik və informativ zəmini
formalaşdırıldı. 1993-cü ildə BMT Təhlükəsizlik
Şurasının münaqişənin siyasi həlli,
işğal olunmuş ərazilərin azad edilməsi,
qaçqın və məcburi köçkünlərin
doğma yurdlarına qaytarılması ilə bağlı beynəlxalq
hüquq normalarına uyğun 4 qətnaməsi qəbul edildi;
-
1994-cü ildə atəşkəs əldə olundu;
- ATƏT-in
1994-cü il Budapeşt, 1996-cı il Lissabon
və 1999-cu il İstanbul sammitlərində münaqişənin
dinc və siyasi yollarla həlli istiqamətində tədbirlər
görüldü, ABŞ Konqresinin müstəqil Azərbaycana
yardım göstərilməsini qadağan edən ədalətsiz
907-ci düzəlişin icrası dayandırıldı.
- Ermənistan-Azərbaycan,
Dağlıq Qarabağ münaqişəsi ilə əlaqədar
olaraq ATƏT rəhbərliyi Minsk qrupunun təmsilçiləri
ilə 200-dən artıq, 80 ölkənin dövlət
başcıları ilə 500-dən çox görüş
keçirmişdi;
- bu problemi ölkədə bir nömrəli
problem adlandırmışdı;
-
qaçqın və məcburi köçkünlərlə əlaqədar
beynəlxalq normalara uyğun tam hüquqi baza yaradıldı,
ölkə Prezidenti tərəfindən onların sosial
müdafiəsi ilə bağlı 43 fərman və sərəncam
imzalandı, Milli Məclis 23 qanun, Nazirlər Kabineti isə 192
qərar və sərəncam qəbul etdi;
- 1998-ci il iyun ayının 27-də Heydər Əliyevin
sədrliyi ilə problemlə bağlı ümumrespublika
müşavirəsi keçirildi;
- Azərbaycan
Respublikası Prezidentinin 1998-ci il 17 sentyabr tarixli 895 nömrəli
sərəncamı ilə "Qaçqınların və məcburi
köçkünlərin problemlərinin həlli üzrə"
uzunmüddətli dövlət proqramı təsdiq edildi;
- ölkəmizdə olan qaçqınların və
məcburi köçkünlərin sosial problemlərinin
operativ həlli və vahid mərkəzdən idarə
olunması məqsədilə 1998-ci ilin noyabrında Nazirlər
Kabinetinin strukturunda Baş nazirin müavini - Dövlətaçqınkomun
sədri vəzifəsi təsis olundu, Nazirlər Kabineti
aparatının strukturunda bu sahə ilə bağlı
şöbə yaradıldı;
- 1999-cu
ildə beynəlxalq təcrübədə ilk dəfə
olaraq Məcburi Köçkünlərin Sosial İnkişaf
Fondu təşkil edildi, Dünya Bankı tərəfindən
ölkəmizə ayrılmış 10 mln ABŞ dolları həcmində
kredit hesabına qaçqınların və məcburi
köçkünlərin məskunlaşdıqları yerlərdə
infrastrukturun yaxşılaşdırılması, yeni iş
yerlərinin açılması məqsədilə müxtəlif
layihələr həyata keçirildi;
- 18 may
2000-ci ildə Heydər Əliyevin bilavasitə iştirakı
ilə "İnkişaf Problemləri və Strateji İstiqamətlər"
mövzusunda beynəlxalq konfrans keçirildi;
- 2002-ci
ildə Goranboy rayonunun Aşağı Ağcakənd qəsəbəsində
qaçqın və məcburi köçkünlər
üçün salınmış yeni qəsəbənin
açılış mərasimində iştirak etdi;
- əsası Heydər Əliyev tərəfindən
qoyulan milli neft strategiyası öz bəhrəsini verməyə
başlayan andan, iqtisadi imkanlar yarandıqca dövlət tərəfindən,
digər sahələrdə olduğu kimi, qaçqın və
məcburi köçkünlərin sosial müdafiəsi ilə
bağlı geniş tədbirlərin həyata keçirilməsinə
başlanıldı;
- BMT-nin
Ümumdünya Ərzaq Proqramı tərəfindən ölkəmizdə
140 min nəfər məcburi köçkünə aylıq ərzaq
proqramının müddəti Heydər Əliyevin təşkilatın
baş qərargahına müraciəti nəticəsində
2005-ci ilin sonunadək uzadıldı;
- əvvəllər beynəlxalq təşkilatlar
tərəfindən məcburi köçkünlərə
göstərilən ərzaq yardımı proqramı 2001-ci
ildə dayandırıldığı üçün bu
boşluq ölkə rəhbərinin müvafiq sərəncamları
ilə aradan qaldırıldı, Dövlət Neft Şirkətinin
və büdcə vəsaitinin hesabına onlar aylıq ərzaqla
təmin edildilər;
- məcburi köçkünlərə yemək
xərci üçün verilən aylıq müavinətin həcmi
50 dəfə artırıldı;
- məcburi köçkünlərə kommunal
və digər xidmətlərdən pulsuz istifadə
imtiyazı verildi;
- qazla təmin olunmayan kənd rayonlarında
müvəqqəti məskunlaşmış 90 min məcburi
köçkün ailəsi qış aylarında ağ neftlə
təmin olundular;
- dövlət ali və orta ixtisas təhsili
müəssisələrində ödənişli formada təhsil
alan məcburi köçkünlər təhsil haqqını
ödəməkdən azad edildilər.
Təsadüfi deyildir ki, məhz Heydər Əliyev tərəfindən
yaradılmış Dövlət Neft Fondunda toplanan ilk vəsait
onun müvafiq fərman və sərəncamları ilə
qaçqın və məcburi köçkünlərin
sosial problemlərinin həllinə yönəldilmişdir.
Belə
ki, həmin fərmanlarla 2001-2002-ci illərdə ilk dəfə
Dövlət Neft Fondundan ayrılmış 359 milyard manat vəsait
hesabına çox qısa bir müddətdə 400 min
kvadratmetr mənzil sahəsi olan 6411 fərdi yaşayış
evi, 3150 yerlik 18 məktəb, 18 uşaq bağçası, 16
tibb məntəqəsi tikilmiş, 195 km uzunluğunda asfalt
yol, 188 km su xətti, 350 km elektrikötürmə xətti, 133
km irriqasiya su kəməri və digər sosial obyektlər
istifadəyə verildi.
Nəticədə
Biləsuvar rayonu ərazisindəki 5 çadır düşərgəsi
ləğv edildi, 1329 qaçqın və 5081 məcburi
köçkün ailəsinin 32 min nəfərinin mənzil-məişət
şəraiti yaxşılaşdırıldı.
35 min nəfərdən çox qaçqın, məcburi
köçkün və yerli əhali həmin qəsəbələrin
tikintisində işlə təmin olundu.
Qəsəbələrə
köçürülmüş hər bir ailəyə həyətyanı
və əkin sahələri ayrıldı, onlara kənd təsərrüfatı
işləri ilə məşğul olmaları
üçün əvəzsiz maliyyə yardımı verildi.
Yeni
salınmış qəsəbələrdə 6000-dən
çox iş yerləri yaradıldı.
Bütün
bunlar bir daha əyani şəkildə sübut edir ki,
xalqımızın ümummilli lideri Heydər Əliyev Ermənistan-Azərbaycan,
Dağlıq Qarabağ münaqişəsi və bunun nəticəsində
əziyyət çəkən bir milyona yaxın
qaçqın və məcburi köçkünün problemlərinə
daim diqqət və qayğı ilə yanaşar, bu problemi
gündəlik nəzarətində saxlayırdı.
Əhalinin ən həssas qrupu olan qaçqın və
məcburi köçkünlər daha ağır şəraitdə
yaşamalarına baxmayaraq, ümummilli liderimiz Heydər Əliyevin
bu diqqət və qayğısına cavab olaraq daim dövlətə
sadiq olduqlarını nümayiş etdirirərək
bütün ictimai-siyasi proseslərdə dövlətçiliyi
müdafiə ediblər və bu gün də etməkdədirlər.
Məhz
buna görə də 2003-cü ildə keçirilən
prezident seçkilərində, ölkənin bütün əhalisi
kimi, qaçqınlar və məcburi köçkünlər
də yüksək fəallıqla Heydər Əliyevin siyasi
kursuna, onun layiqli davamçısı cənab İlham Əliyevə
səs verməklə dövlətimizə sadiq
olduqlarını, aparılan siyasəti dəstəklədiklərini
bir daha nümayiş etdirdilər.
Cənab İlham Əliyevin seçkilərdə
öz rəqibləri üzərində parlaq qələbəsi
isə Azərbaycan tarixində yeni dövrün əsasını
qoydu.
2003-cü
ildə "Əsl siyasət konkret, real iş görməkdən
ibarətdir" - deyən Prezident İlham Əliyev davamlı
sabitlik, iqtisadi inkişaf, tərəqqi və milli dövlətçilik
ənənələrinin bərqərar olması yoluna sadiq
qaldı.
Ötən 10 ildə dövlət öz daxili
resursları üzərində güclü iqtisadi zəmin
yaratmış və gələcəyə böyük
ümidlərlə, böyük nikbinliklə baxır.
Balanslı və uğurlu xarici siyasətin
aparılması nəticəsində xeyli dünyəvi
uğurlarımız olmuşdur. Azərbaycan bu gün yüksək
insan inkişafına malik olan ölkələr sırasına
daxil olmaqla regionun lider dövlətidir, Cənubi Qafqazda
investisiya kredit reytinqi alan ilk və yeganə
ölkədir.
Əlbəttə ki, bütün bu uğurlar
xalqımızın ümummilli lideri Heydər Əliyev tərəfindən
əsası qoyulan siyasətin Azərbaycan
Respublikasının Prezidenti cənab İlham Əliyev tərəfindən
məharətlə, çevik və qətiyyətlə həyata
keçirilməsi nəticəsində mümkün
olmuşdur.
Cənab
İlham Əliyev 2003-2012-ci illərdə xarici ölkələrin
və beynəlxalq təşkilatların rəhbərləri
ilə 350-dən çox qaçqın və məcburi
köçkünlərlə bağlı keçirilən
müxtəlif tədbirlərdə 27 dəfə, o cümlədən
yeni salınmış qəsəbələrdə 23 dəfə
görüşlərdə, həmçinin yeni
yaşayış qəsəbələri və məhəllələrinin
açılışında şəxsən iştirak
etmişdir.
2011-ci il dekabrın 24-də Prezident İlham Əliyevin
və Mehriban xanım Əliyeva ilə birgə Qarabağ
bölgəsinə - Ağcabədi rayonuna səfər edərək
Laçın rayonundan olan məcburi köçkünlər
üçün salınmış yeni qəsəbənin
açılışında iştirakını xüsusi
qeyd etmək istərdim. Bütün məcburi
köçkünlər üçün tarixi gün hesab
edilən həmin görüşdə cənab Prezidentin
dediyi "Bu gün mən öz ailəmlə birlikdəyəm,
mənim ailəm sizsiniz" ifadəsi nəinki məcburi
köçkünlər, həm də bütün ölkə
ictimaiyyəti tərəfindən böyük rəğbətlə
qarşılandı.
Bu, həm də bütün dünyaya ciddi bir mesaj idi
ki, Ermənistan-Azərbaycan, Dağlıq Qarabağ
münaqişəsi və onun nəticəsi olaraq ölkədə
olan bir milyonadək qaçqın və məcburi
köçkün problemi ölkənin bir nömrəli
prioritet problemidir.
Azərbaycan
Respublikası Prezidentinin 2004-cü il 1 iyul tarixli 298 nömrəli
sərəncamı ilə "Qaçqınların və məcburi
köçkünlərin yaşayış şəraitinin
yaxşılaşdırılması və məşğulluğunun
artırılması üzrə Dövlət Proqramı",
2007-ci il 31 oktyabr tarixli və 2011-ci il 21 fevral tarixli sərəncamları
ilə həmin dövlət proqramına əlavələr təsdiq
edilmişdir.
Ötən illərdə həyata keçirilən tədbirlər
sayəsində həmin dövlət proqramı, ona əlavələr
və digər normativ aktlar uğurla icra edilmiş və bu sahədə
nəzərdə tutulan digər işlər davam etdirilir.
Cənab
İlham Əliyev 2003-cü il oktyabrın
1-də prezident seçkiləri ərəfəsində ilk
görüşünü Biləsuvar rayonu ərazisində məcburi
köçkünlər üçün salınmış
yeni qəsəbələrdə keçirərkən ölkədə
bir dənə də olsun, çadır düşərgəsinin
qalmayacağını bəyan etmişdi.
2006-cı
ildə Bərdə (3 çadır düşərgəsi) və
Ağcabədi (1 çadır düşərgəsi)
rayonlarındakı 4 çadır düşərgəsinin,
2007-ci ilin dekabrında isə Saatlı və Sabirabad rayonları
ərazisindəki 3 çadır düşərgəsinin ləğvi
də təmin edilərək, ölkə Prezidenti cənab
İlham Əliyevin tapşırığı vaxtından bir
il əvvəl yerinə yetirilmişdir.
2012-ci ildə
məcburi köçkün ailələrinin Ağcabədi
şəhərində 560 ailəlik beşmərtəbəli
10 yaşayış binasından ibarət məhəlləyə,
Bərdə rayonunda 195 ailəlik, İmişli rayonunda isə
325 ailəlik yeni salınmış qəsəbələrə
köçürülməsi təmin edilmişdir. Həmçinin
Mingəçevir şəhəri ərazisində 502 məcburi
köçkün ailəsi üçün yeni
yaşayış məhəlləsi salınmış,
Abşeron rayonunun Masazır qəsəbəsi ərazisində
760 məcburi köçkün ailəsi üçün yeni
qəsəbənin tikintisi isə başa çatmaq üzrədir.
Beləliklə,
2012-ci il ərzində 296 min kvadratmetr sahəsi olan 6 yeni
yaşayış kompleksi salınmış, 22765 nəfərdən
ibarət 4553 məcburi köçkün ailəsi yeni evlərə
köçürülmüş, 3300 şagird yerlik 6 məktəb
inşa edilmişdir.
Gücünə görə son 20 ildə ən
böyük elektrik yarımstansiyası 280 meqavat olmaqla, məcburi
köçkünlər üçün 2007-ci ildə
Ağcabədi rayonunda istifadəyə verilmişdir. Bu
yarımstansiya 5 rayonun - Ağcabədi, Ağdam, Bərdə,
Beyləqan və İmişli rayonlarının elektrik
enerjisinə olan tələbatını stabilləşdirmişdir.
Qeyd etmək lazımdır ki, bütün rayonlarda
qaçqın və məcburi köçkünlər
üçün tikilən qəsəbələrdən və
onun infrastrukturundan yerli əhali də bəhrələnmişdir.
2004-2012-ci
illər ərzində Dövlət Neft Fondundan və digər
mənbələrdən ayrılmış vəsait
hesabına 19 min ailə - 94 min nəfərdən çox məcburi
köçkün üçün 1 milyon 72 min kvadrat- metr sahəsi
olan 51 qəsəbə və fərdi evlər inşa
edilmiş, 115 məktəb, 5 musiqi məktəbi, 30 uşaq
bağçası, 33 tibb müəssisəsi, 32 klub icma mərkəzi,
26 rabitə evi tikilmiş, 470,6 kilometr yol, 610,0 kilometr su, 980,0
kilometr hava elektrik, 264,0 kilometr qaz, 61,5 kilometr kanalizasiya, 13
kilometr istilik xətləri çəkilmiş, 537 müxtəlif
gücə malik olan elektrik transformatoru
quraşdırılmışdır.
Ümumiyyətlə,
2001-2012-ci illər ərzində Dövlət Neft Fondundan və
digər mənbələrdən ayrılmış vəsait
hesabına 2 milyon kvadratmetr sahəsi olan, 31 min mənzildən
ibarət bütün sosial-texniki infrastruktura malik 77 müasir
qəsəbə salınmış, 31 min ailə -140 min nəfərədək
qaçqın və məcburi köçkünün mənzil-məişət
şəraiti yaxşılaşdırılmışdır.
Azərbaycan Respublikası Prezidentinin
tapşırığına əsasən 2013-cü ildə də
bu məqsədlə 588 milyon manat vəsaitin
ayrılacağı nəzərdə tutulmuşdur.
Dövlət
Neft Fondundan ayrılacaq 300 milyon manat vəsait hesabına 4 min
ailə - 20 min nəfər məcburi köçkün
üçün ümumi sahəsi 260 min kvadratmetr olan,
bütün zəruri sosial-texniki infrastruktur obyektləri ilə
birlikdə 8 qəsəbə və məhəllə
salınacaqdır.
Azərbaycan
Respublikası Prezidentinin göstərişinə əsasən,
Bakı şəhərindəki yataqxanalardan 90 min nəfər
məcburi köçkünün müvəqqəti məskunlaşdırılması
və müəyyən iş yerlərinin yaradılması
üçün yeni yaşayış massivinin
salınması məqsədilə Abşeron rayonunun Qobu bələdiyyəsinin
ərazisində 500 hektar torpaq sahəsi
ayrılmışdır. Hazırda Qobu məcburi
köçkün yaşayış massivinin layihələndirilməsi
və onun idarəetmə strukturunun yaradılması üzrə
müvafiq işlər görülür.
Dövlət
proqramının və ona əlavələrin icrasına
uyğun olaraq, məcburi köçkünlərin məşğulluğunun
artırılması və yoxsulluğun azaldılması
üzrə də müvafiq tədbirlər
aşağıdakı ardıcıllıqla həyata
keçirilir:
- Azərbaycan
Respublikasının Əmək və Əhalinin Sosial
Müdafiəsi Nazirliyi və onun struktur bölmələri ilə
qarşılıqlı fəaliyyət nəticəsində
2004-2012-ci illər ərzində 85,5 min nəfər məcburi
köçkün müvafiq işlə təmin edilmiş,
3770 nəfərə işsiz statusu verilmiş, 2331 nəfər
peşə hazırlığı kurslarına, 1716 nəfər
haqqı ödənilən ictimai işlərə cəlb
olunmuş, 16 min ailəyə ünvanlı sosial yardım
verilmişdir.
-2001-ci
ildən etibarən Dünya Bankı və Azərbaycan
hökuməti arasında bağlanılmış kredit
sazişinə əsasən, ölkəmizdə olan
qaçqın və məcburi köçkünlərin
sosial rifahının yaxşılaşdırılmasına,
işğal olunmuş ərazilərin bərpasına yönəldilən
layihələr də həyata keçirilir.
Həmin
saziş üzrə Məcburi Köçkünlərin Sosial
İnkişaf Fondu tərəfindən son 10 ildə 310 min nəfərin
(bunun da 83%-i məcburi köçkündür)
faydalandığı və dəyəri 30 milyon manat təşkil
edən 520 müxtəlif növ mikrolayihə icra
edilmişdir.
Bu yaxınlarda Dünya Bankının Vaşinqton şəhərində
yerləşən baş qərargahında keçirilmiş
yüksək səviyyəli tədbirdə Azərbaycanda məcburi
köçkünlərlə bağlı layihə
hazırlanma keyfiyyətinə, şəffaflığına və
digər meyarlara görə ötən maliyyə ilinin
üç ən təqdirəlayiq layihəsindən biri
seçilmişdir.
- Azərbaycan
Respublikası İqtisadi İnkişaf Nazirliyinin
Sahibkarlığa Kömək Milli Fondunun xətti ilə
2004-2012-ci illərdə 1534 məcburi köçkünə
sahibkarlıq subyektinin investisiya layihəsinin maliyyələşdirilməsinə
32,2 milyon manat məbləğində güzəştli kredit
verilmişdir.
Ümimiyyətlə,
2012-ci ildə bir nəfər məcburi köçkünə
xərclənən vəsaitin həcmi təxminən 1040 manat
təşkil etmişdir ki, bu da dünyanın digər
münaqişə zonaları ilə müqayisədə ən
yüksək göstərici olmaqla, 2003-cü illə
müqayisədə 8,6 dəfə çoxdur.
Ötən
10 ildə qaçqın və məcburi köçkün
soydaşlarımızın sosial problemlərinin həlli məqsədi
ilə 3,3 milyard manat həcmində vəsait, o cümlədən
1,6 milyard manat dövlət büdcəsindən, 1,4 milyard
manat Dövlət Neft Fondundan, 307 milyon manat isə beynəlxalq
təşkilatlar tərəfindən istifadə edilmişdir.
Ümumilikdə
1993-2012-ci illərdə bu məqsədlə 4,3
milyard manat həcmində vəsait sərf olunmuşdur.
Bu vəsaitin 77 faizi son 10 ildə - Azərbaycan
Respublikasının Prezidenti cənab İlham Əliyevin
prezidentlik fəaliyyəti dövründə istifadə
olunmuşdur.
Məcburi köçkünlər arasında yoxsulluq həddi
son 10 ildə 75 faizdən 15 faizədək
azalmışdır.
Şübhəsiz ki, bütün bu irimiqyaslı layihələr
əsası ümummilli lider Heydər Əliyev tərəfindən
qoyulan uğurlu neft strategiyasının konkret bəhrəsi, nəticəsidir.
Qeyd etmək lazımdır ki, fəaliyyətə
başladığı ilk gündən etibarən Heydər Əliyev
Fondu da qaçqın və məcburi köçkünlərin
üzləşdikləri çoxsaylı problemlərin
dünya ictimaiyyətinə çatdırılmasına və
onların həllinə daim diqqətlə yanaşır.
Fondun
prezidenti, UNESCO və İSESKO-nun xoşməramlı səfiri,
Milli Məclisin deputatı Mehriban xanım Əliyevanın təşəbbüsü
ilə yaradılmış "Azərbaycan" internet
portalında Ermənistan-Azərbaycan, Dağlıq Qarabağ
münaqişəsi, Xocalı soyqırımı, Ermənistanın
hərbi təcavüzünün nəticələri barədə
də geniş məlumat toplanmışdır. Bununla bərabər,
fondun xətti ilə hər il Xocalı
soyqırımı ərəfəsində dünyanın
müxtəlif ölkələrində tədbirlər
keçirilir, beynəlxalq mətbuatda soyqırımı
haqqında yazılar dərc etdirilir, hər il keçirilən
Yeni il şənliklərinə qaçqın və məcburi
köçkün uşaqları da dəvət edilir.
Fondun vitse-prezidenti Leyla xanım Əliyevanın təşəbbüsü
ilə 80-dən artıq ölkədə "Xocalıya ədalət"
beynəlxalq məlumat-təşviqat kampaniyası ilə
bağlı silsilə tədbirlər təşkil olunur.
Qaçqınların və Məcburi
Köçkünlərin İşləri üzrə
Dövlət Komitəsi tərəfindən Ermənistan-Azərbaycan,
Dağlıq Qarabağ münaqişəsi ilə
bağlı hazırlanan kitablar, qısametrajlı filmlər səfirliklər
vasitəsilə dünya ölkələrində
nümayiş etdirilir və bu yolla dünya ictimaiyyəti məlumatlandırılır.
Təkcə 2012-ci ildə cənab İlham Əliyevin
müvafiq tapşırıqlarına əsasən nümayəndə
heyətimiz Meksikada səfərdə olmuş və Mexiko
şəhərinin mərkəzində Dostluq Parkının və
Xocalı soyqırımı abidəsinin
açılış mərasimlərində iştirak
etmişdir. Eyni zamanda, 4 ölkənin - Belçika, Finlandiya,
İspaniya və Andorra parlamentlərində Ermənistanın
ölkəmizə qarşı hərbi təcavüzünün
nəticələrinə dair keçirilmiş dinləmələrdə
iştirak etmişdir.
Azərbaycan
Respublikasının Prezidenti cənab İlham Əliyevin
2004-cü ilin fevral ayında keçirilmiş, beynəlxalq
humanitar təşkilatların fəaliyyətinin 10 illiyinə
həsr edilmiş beynəlxalq konfransda qeyd etdiyi kimi,
imkanların məhdud olduğu dövrdə, xüsusən,
müstəqilliyin bərpasının ilk illərində
göstərilən fövqəladə humanitar yardımın
çox böyük əhəmiyyəti olmuş,
yaranmış humanitar fəlakətdən çıxmaqda
respublikada fəaliyyət gəstərən beynəlxalq, yerli
humanitar və inkişaf təşkilatları əvəzsiz
rol oynamışlar.
Onların fəaliyyəti Azərbaycan Respublikası
Prezidentinin müvafiq sərəncamı ilə
yaradılmış Beynəlxalq Humanitar Yardım üzrə
Respublika Komissiyası tərəfindən əlaqələndirilir. Hazırda respublikamızda
49 beynəlxalq, 43 yerli humanitar təşkilat fəaliyyət
göstərir və bilavasitə bu təşkilatların xətti
ilə ötən 20 il ərzində qaçqın, məcburi
köçkün və aztəminatlı əhaliyə
müxtəlif layihələr üzrə 930 mln ABŞ
dollarından çox həcmdə yardım göstərilmişdir.
Bu təşkilatların tam sərbəst, azad və
şəffaf fəaliyyətləri üçün ölkədə
nümunəvi şərait yaradılmışdır.
Azərbaycan Respublikasının Prezidenti cənab
İlham Əliyev dəfələrlə bəyan etmişdir
ki, Azərbaycan heç vaxt öz əzəli
torpağında ikinci qondarma erməni dövlətinin
yaradılmasına imkan verməyəcək, Dağlıq
Qarabağ heç vaxt müstəqil olmayacaqdır.
İnanırıq ki, Azərbaycan Respublikasının
Prezidenti cənab İlham Əliyevin səyi nəticəsində
ölkəmizin ərazi bütövlüyü bərpa ediləcək,
işğaldan azad olunacaq əraizələrdə həyat
tamamilə yenidən qurulacaq. Qaçqınlar və
məcburi köçkünlər öz ata-baba yurdlarına ləyaqətlə
qayıdaraq yenidən öz doğma torpaqlarında
yaşayacaqlar.
Bütün xalqımız kimi, məcburi
köçkünlər də rəhbər, lider kimi cənab
İlham Əliyevə inanır, ona etibar edirlər. Çünki
Azərbaycana belə bir layiqli siyasi davamçını ulu
öndər Heydər Əliyev bəxş etmişdir.
Şübhə
yoxdur ki, 2003, 2008-ci illərdə olduğu kimi, bu il də Azərbaycanın
uğurlarını gözü götürməyən xarici
və daxili qüvvələrin cidd-cəhdləri boşa
çıxacaq və müdrik xalqımız, o cümlədən
qaçqın və məcburi köçkünlər də
ulu öndər Heydər Əliyevin siyasətinə və cənab
İlham Əliyevə sədaqətli olduqlarını bir daha
nümayiş etdirəcəklər.
Böyük
qürur və iftixar hissi ilə deyə bilərik ki,
xalqımızın əbədi lideri, Yeni Azərbaycan
Partiyasının yaradıcısı Heydər Əliyev təkcə
XX əsrin deyil, ümumiyyətlə, Azərbaycan tarixinin
yetirdiyi ən böyük, dahi şəxsiyyətdir.
Heydər Əliyevin böyük qürur hissi ilə
dediyi "Azərbaycanlı kimi dünyaya gəldiyimə, Azərbaycan
dilində danışdığıma, Azərbaycanı təmsil
etdiyimə görə özümü çox xoşbəxt
sayıram. Mən fəxr edirəm ki, mən azərbaycanlıyam"
sözləri onun bu torpağa, bu Vətənə,
xalqımıza nə qədər bağlı, sədaqətli
olduğunu göstərir.
2003-cü
il oktyabrın 1-də dünyanın ən
böyük azərbaycanlısı Azərbaycan xalqına
müraciətində qazandığı uğurların, zəfərlərin
formulunu belə açıqlamışdı: "Mənim Azərbaycan
Respublikasına bütövlükdə rəhbərliyimin 34,
müstəqil Azərbaycan dövlətinə Prezident kimi rəhbərliyimin
isə 10 ili tamam olur. Bu illərdə istər bir azərbaycanlı,
Azərbaycan Respublikasının vətəndaşı, istərsə
də onun rəhbəri, Prezidenti kimi mənim həyat
amalım yalnız sizə - bütün varlığım qədər
sevdiyim Azərbaycan xalqına, dövlətçiliyimizə,
ölkəmizin iqtisadi, siyasi, mənəvi inkişafına
xidmət olmuşdur. Bu yolda bütün
gücümü və iradəmi yalnız müdrik və qədirbilən
xalqımdan almışam. Ən çətin
anlarda, ən mürəkkəb vəziyyətlərdə
yalnız və yalnız xalqıma arxalanmışam. Bu da mənə dözüm, iradə verib və
bütün uğurlarımı təmin edib".
Bax budur əsl
Xalq - Rəhbər vəhdəti!
Heydər Əliyev öz əməlləri ilə, xalq
qarşısında əvəzsiz xidmətləri ilə əbədiyaşarlıq
zirvəsinə yüksəlmişdir. Ölkəmizin bu
günkü sabit və dayanıqlı inkişafının təməlində
məhz ulu öndərin ideyaları durur.
Əminliklə deyə bilərik ki, onun müəyyən
etdiyi strateji istiqamətlər hələ uzun illər müstəqilliyimizin
daha da möhkəmləndirilməsi və gücləndirilməsi,
iqtisadi qüdrətin artırılması işinə xidmət
edəcəkdir.
Heydər
Əliyevin taleyi əslində bir insanın ömür yolu
deyil, Azərbaycanın şanlı tarixidir, qurtuluş,
inkişaf, milli tərəqqi salnaməsidir!
Dünyanın
ən böyük azərbaycanlısı deyirdi: "Nə qədər
ki Azərbaycan var, mən də varam. Mən isə
Azərbaycanda əbədi olacağam!"
Bəli,
nə qədər ki, Azərbaycan dövləti var, Heydər Əliyev
də min illər keçsə belə, əbədi
yaşayacaqdır. Çünki o, əbədidir, ölməzdir!
Çünki o, "dünyanın ən böyük azərbaycanlısı"
adına layiq olan, bu adı şərəflə
daşıyan yeganə azərbaycanlıdır.
Əli HƏSƏNOV,
Azərbaycan Respublikası Baş
nazirinin
müavini, Qaçqınların və
Məcburi Köçkünlərin
İşləri üzrə
Dövlət Komitəsinin sədri,
YAP Siyasi Şurasının
üzvü
Azərbaycan.-2013.- 4 may.- S.6.