Nüfuzlu Forbes.com saytında Azərbaycan haqqında geniş reportaj yerləşdirilmişdir

Bu günlərdə ABŞ-ın nüfuzlu Forbes.com saytında "Bakı: 1500 yaşı olan ləl daşı inkişaf etmiş infrastrukturu, innovativ texnologiyaları və müxtəlif müəssisələri ilə bərq vurur" sərlövhəli məqalə-reportaj yerləşdirilmişdir.

AzərTAc xəbər verir ki, məqalə-reportajın müəllifi "Wall Street Journal"ının analitiki, "Financial Times" qəzetinin "investisiya aləmi və mülkiyyətin idarə olunması üzrə güclü və nüfuzlu ekspert", "maliyyə investisiyalarının qadın mərkəzi" adlandırdığı Hillari Kreymerdir.

Azərbaycan Amerika Alyansının (AAA) təsisçisi Anar Məmmədovun təşkilatçılığı ilə H.Kreymerin və Forbes.com saytının bir qrup əməkdaşının Bakıya səfəri nəticəsində ərsəyə gəlmiş məqalə-reportaj informasiya resursunun əsas səhifəsində yerləşdirilmişdir.

AAA-dan verilən məlumata görə, Azərbaycanın regionun ən nüfuzlu ölkəsi və dünyanın iqtisadi xəritəsinin strateji nöqtəsi olduğunu vurğulayan müəllif məqalə-reportajda respublikamızda aparılan yenidənqurma və tikinti işləri, mədəni layihələr barədə ətraflı məlumat verir. Azərbaycanın getdikcə dünyanın qabaqcıl ölkələri ilə ayaqlaşdığı, hətta bir çox hallarda daha da irəlilədiyi xüsusi qeyd olunduğu məqalə-reportajda bildirilir ki, bu möhkəm əsaslı geniş infrastruktur, texnoloji inkişaf və yeniliklər son dörd ildə Azərbaycan Prezidenti İlham Əliyevin neft kapitalını böyük məharətlə insan kapitalına çevirə bilməsi sayəsində mümkün olmuşdur. Ölkənin böyük neft ehtiyatlarından əldə edilmiş gəlir digər enerji resurslarının araşdırılıb inkişaf etdirilməsinə və hər sahədə ən yaxşı texnologiyaların tətbiq olunmasına yönəldilir.

Azərbaycanda əlverişli investisiya mühitinin olduğunu vurğulayan müəllif qeyd edir ki, azərbaycanlıların qürur duyacaqları məqamlar çoxdur. Azərbaycan BMT Təhlükəsizlik Şurasının üzvüdür. Azərbaycan "Forbes" siyahısında investorların hüquqlarının müdafiə edildiyi ölkə kimi 24-cü və iqtisadiyyatının inkişaf etməkdə olduğu bir çox digər dövlətlərə xas olan qarmaqarışıqlığın qarşısını ala bilmək imkanlarına görə 15-ci yer tutur. Ümumiyyətlə, Azərbaycan "Forbes"in "İş üçün ən yaxşı ölkələr" adlı siyahısında 141 dövlətin sırasında 73-cü yerdədir. Bu siyahıda Azərbaycan Braziliya, Çin, Hindistan və Rusiyanı geridə qoymuşdur.

Qeyd edək ki, Forbes.com saytında Azərbaycan haqqında yer almış bu məqalə-reportaj silsilə xarakterlidir.

Silsiləyə daxil olan ilk yazı və video ilə www.forbes.com/sites/hilarykramer/2013/05/03/tradition-meets-innovation-on-the-silk-road/ linkindən tanış olmaq mümkündür.

AAA Azərbaycan haqqında ətraflı məlumat verən qeyri-kommersiya təşkilatıdır. Alyansın fəaliyyətilə www.azerbaijanamericaalliance.org saytında daha ətraflı tanış olmaq olar.

Azərbaycan.-2013.- 5 may.- S.11.