Əbədi fəxri rəhbər

Azərbaycan xalqının XX yüzilliyin ortalarından XXI əsrin əvvəllə rinə qədərki tarixi Heydər Əliyevin siyasi fəaliyyəti və şəxsiyyəti ilə, xüsusən ən yüksək vəzifələrdə olduğu zaman öz xalqının, doğma yurdunun gələcəyi naminə həyata keçirdiyi böyük quruculuq işləri ilə qırılmaz surətdə bağlıdır. Bütün varlığı ilə millətinə, torpağına sadiq olan bu dahi şəxsiyyət bir-birinə zidd iki sistemdə fəaliyyət göstərsə də, ən çətin tarixi dövrlərdə, təqiblər şəraitində belə doğma Azərbaycanının tərəqqisinə və xalqının maddi rifahının yüksəlməsinə xidmət etmişdir.

Xüsusi xidmət - məxsusi istedad

Hələ ötən əsrin 40-cı illərindən Azərbaycanın təhlükəsizlik orqanlarında fəaliyyətə başlayan Heydər Əliyev son dərəcə ağır maneələri və çətinlikləri dəf edərək fenomenal şəxsi və peşəkarlıq keyfiyyətləri sayəsində Dövlət Təhlükəsizlik Komitəsinin sədri vəzifəsinə qədər yüksəldi.

Qeyd olunmalıdır ki, o zaman Azərbaycanın təhlükəsizlik orqanlarında əks-kəşfiyyat xətti üzrə Heydər Əliyevin birbaşa rəhbərliyi ilə həyata keçirilmiş klassik peşəkarlıq nümunəsi sayılacaq bir sıra əməliyyat tədbirləri nəticəsində çox mühüm hərbi-siyasi, iqtisadi məlumatlar əldə edilmişdir. Onun tapşırığı ilə xarici xüsusi xidmət orqanlarının agentura şəbəkəsinə nüfuz edilərək rəqib dövlətlər tərəfindən respublikaya qarşı aparılan kəşfiyyat-pozuculuq fəaliyyətlərinin qarşısı müvəffəqiyyətlə alınmışdır. Bu işdə Heydər Əliyevin təşkilatçılığı, əməliyyat şəraitini düzgün qiymətləndirməsi, vaxtında qərar qəbul etmək bacarığı, qətiyyətliliyi, yüksək peşəkarlığı, bilavasitə rəhbər və əməliyyat heyəti ilə birgə əməliyyat tədbirlərində gündəlik iştirakı və bir şəxsiyyət kimi böyük nüfuzu mühüm rol oynayırdı.

İstər bilavasitə onun özünün keçirdiyi, istərsə də rəhbərlik etdiyi əməliyyat tədbirləri - "Duel", "Alagöz", "Naturalist", "Axito", "Duqlas-2" və onlarca başqaları öz mükəmməlliyi, hərtərəfliliyi ilə mərkəzin marağına səbəb olur və onların tapşırığı ilə Heydər Əliyev bu əməliyyat işləri, eləcə də onların keçirilməsi metodları barədə keçmiş SSRİ-nin müxtəlif şəhərlərində, o cümlədən Moskvada və Leninqradda təhlükəsizlik orqanlarının əməkdaşlarına mühazirələr oxuyurdu. Bütün bunlar Heydər Əliyevin əsl peşəkar əməliyyat işçisi və səriştəli rəhbər kimi İttifaq miqyasında tanınmasında az rol oynamadı. Həm də bu əməliyyatların çoxu indi də həmin məktəblərdə metodik vəsait kimi istifadə olunur.

Yüksək təşkilatçılıq və idarəçilik qabiliyyəti, hərtərəfli savadı və səriştəsi ilə seçilən ümummilli lider Heydər Əliyev 1965-ci il martın 2-də Azərbaycan SSR Nazirlər Soveti yanında DTK-nın sədr müavini, 1967-ci il iyunun 22-də isə sədri vəzifəsinə təyin edildi.

Heydər Əliyev təhlükəsizilik orqanlarının sədri kimi əməliyyatların hazırlanmasına, planlaşdırılmasına birbaşa rəhbərlik edərək əks-kəşfiyyat tədbirlərinin həyata keçirilməsinə xüsusi diqqət yetirir, eyni zamanda, rəqibin apardığı pozuculuq fəaliyyətinin qarşısını qabaqlayıcı tədbirlərlə alırdı. Heydər Əliyev hər hansı bir əməliyyat tapşırığı verəndə işin həcmini, aktuallığını, əhəmiyyətliliyini nəzərə alaraq konkret müddət göstərər, icrasını şəxsən nəzarətə götürər və mütləq onun nəticəsini müzakirə edər, ortaya çıxan halları müəyyənləşdirib, yeni istiqamətləri göstərərdi. Bu, həm rəhbər heyət, həm də əməliyyatçılar arasında işi vaxtında və keyfiyyətlə yerinə yetirməkdə məsuliyyət hissini daha da artırırdı.

Ulu öndər Heydər Əliyevin özünəməxsus liderlik keyfiyyətlərindən biri də əməliyyat işinin incəliklərini şəxsi heyətə, xüsusilə də struktur bölmələrin rəhbərlərinə böyük səbr və təmkinlə, eyni zamanda, xüsusi tələbkarlıqla dərindən öyrətməsi idi. O, hər bir əməkdaşın fiziki-mənəvi imkanlarını, iş qabiliyyətini, fərdi keyfiyyətlərini gözəl bilir və tapşırıqlar verərkən bunları nəzərə alırdı.

Milli maraqlar və mənafelər hər şeydən üstündür

Ulu öndər Heydər Əliyevin təhlükəsizlik orqanlarında gördüyü ən önəmli və əvəzsiz işlərdən biri milliləşdirmə siyasəti idi. Araşdırmalar göstərir ki, ümummilli liderin milliləşdirmə siyasəti ötəri, keçici və ya epizodik xarakter daşımamış, bütöv bir sistem təşkil etmişdir. Belə ki, onun 1950-ci illərin ortalarından başlayan və sonralar da davam edən milliləşmə siyasəti ictimai-siyasi həyatın mühüm sahələrində, o cümlədən təhlükəsizlik orqanlarında milli kadrların yerləşdirilməsi, eləcə də azərbaycanlıları keçmiş SSRİ-nin müxtəlif bölgələrində təhsil almağa göndərməsi ilə reallaşdırıldı. Bu həyati vacib prosesdə ən ümdə cəhət ondan ibarətdir ki, Heydər Əliyev milliləşdirmə siyasətini həyata keçirərkən prioritetliyi azərbaycanlıların sayca çoxluğu ilə yanaşı, başlıcası onların milli-mənəvi keyfiyyətlərinə verirdi. Görkəmli siyasi xadimin baxışlar sistemində riyazi rəqəm, statistika azərbaycanlaşdırmaya, yəni azərbaycanlıların say çoxluğuna, milli-mənəvi əxlaqi dəyərlərə malik olmaq isə milliləşməyə gətirib çıxarırdı. Həqiqətən də yalnız bu xarakterik xüsusiyyətlərə malik olan ziyalılar Azərbaycanda milli oyanışa, milli intibaha təkan verə bilərdi. Milli kadrların təhsili və müxtəlif vəzifələrdə yerləşdirilməsi Heydər Əliyevin milliləşdirmə siyasətinin əsasını təşkil edirdi. Ulu öndər 1997-ci ildə təhlükəsizlik orqanlarının əməkdaşları ilə görüşündə bildirirdi ki, sovetlər dönəmində dövlət təhlükəsizlik orqanlarında digər strukturlarla müqayisədə milliləşmə daha vacib məsələ idi.

Həmin illərdə milli ziyalı, daha doğrusu, milli ziyalı düşüncəsinin azadlığı problemi də Heydər Əliyevin milliləşdirmə siyasətinin tərkib hissəsinə çevrildi. Bu fenomenal şəxsiyyətin yürütdüyü müdrik siyasət nəticəsində xalq şairi Bəxtiyar Vahabzadənin "Gülüstan" poemasında ikiyə bölünmüş Azərbaycan ideyası dövrün ən böyük dissident hadisəsi kimi Moskvanı narahat etsə də, ulu öndərin milli təəssübkeşliyi sayəsində o bu kritik situasiyadan zədəsiz və fəsadsız çıxdı. Millətçilikdə ittiham edilən akademik Ziya Bünyadov "Atabəylər dövləti" əsərinə görə dövlət mükafatı aldı, Xəlil Rza və başqaları əsərlərində qaldırdıqları milli ideyalarına görə təqib və təzyiqlərdən yayındırıldılar. Məsələnin mahiyyətinə fikir versək görərik ki, Heydər Əliyev yalnız fərdlərə deyil, Azərbaycanın dövlətçilik tarixi və dövlətçilik ənənələri ilə bağlı fundamental məsələlərə də diqqət yetirirdi. Dövlətçilik tarixinə və dövlətçilik ənənəsinə sədaqət ümummilli lider Heydər Əliyevin milliləşmə siyasətində prioritet məsələ kimi özünü qabarıq şəkildə göstərirdi. Sovetlər dönəmində milliləşdirmə siyasəti aparmaq o qədər də asan məsələ deyildi. Hər şeydən əvvəl ona görə ki, Heydər Əliyevin dediyi kimi, "bizə, azərbaycanlılara etibar etmirdilər". Azərbaycan xüsusi xidmət orqanları əməkdaşlarının sayını başqa millətlərin nümayəndələri hesabına artırmağa çalışırdılar.

Azərbaycan xüsusi xidmət orqanlarının azərbaycanlılaşdırılmasını böyük uğur hesab edən ulu öndər Heydər Əliyev deyirdi: "Mən hesab edirəm ki, Azərbaycanda təhlükəsizlik təşkilatının milliləşdirilməsi prosesi... bizim əldə etdiyimiz ən böyük nailiyyət idi. Təşkilat milliləşdikcə onun fəaliyyətinin istiqamətini də Azərbaycanın milli mənafelərinə daha çox uyğun aparmaq mümkün olurdu".

Azərbaycan xüsusi xidmət orqanlarında milliyyətcə azərbaycanlı olan kadrların yerləşdirilməsi prosesi sonrakı illərdə, Heydər Əliyev Azərbaycan Kommunist Partiyası Mərkəzi Komitəsinin birinci katibi olanda da davam etmişdir. O zaman Heydər Əliyev xalqımızın milli əhval-ruhiyyəli ziyalılarını təqiblərdən qorudu və bununla da milli oyanışımızın əsasını qoydu. Bu proses Heydər Əliyevin siyasi rəhbərliyi dövründə daha da gücləndi.

XX əsrin ortalarında həyata keçirilən təmizləmə və azərbaycanlılaşdırma prosesinin ağırlıqlarını Heydər Əliyev öz taleyində yaşadı. Vaxtilə baş-başa verərək Azərbaycanın milli, mənəvi dəyəri ilə yanaşı, mütəfəkkir şəxsiyyətlərini də məhv edən qüvvələr Heydər Əliyevin bu cəsarətli addımlarına qarşı çıxaraq hələ 1955-ci ildə onun şöbə rəisi vəzifəsindən azad edilməsinə nail oldular. Bu məsələyə ümummilli lider Heydər Əliyev özü belə aydınlıq gətirirdi: "Nə qədər çətinliklər çəkdim ki, 30-cu illərdən qalmış və Azərbaycana xəyanət etmiş insanlardan bu orqanları xilas edək və yeni gənc nəsli cəlb edək, orqanlarda sağlamlaşma işi aparaq. Bu, çətin oldu. O qədər çətin oldu ki, mənə qarşı fitnələr etdilər, vəzifədən çıxartdılar. Lakin az bir müddətdən sonra məni yenə də vəzifəyə təyin etdilər, məcbur oldular ki, təyin etsinlər".

Bütün çətinliklərə baxmayaraq, dahi şəxsiyyət öz mövqeyindən dönmədi, prinsipiallıq göstərdi və mübarizəsini axıradək davam etdirdi. 1950-1960-cı illərdə repressiya qurbanlarına bəraət verilməsi məsələsi geniş vüsət aldığından qeyri-qanuni, əsassız, kiminsə siyasi və şəxsi mənafeyini güdən saxtakarlıqla açılmış işlərə yenidən baxıldı və onların əksəriyyəti bəraət aldı. Əgər həmin illərdə Azərbaycanın mütəfəkkir şəxsiyyətləri bəraət almasaydı, onların irsi də tədqiq və çap edilməyəcək, gələcək nəsillər, bütövlükdə millət bu dəyərli sərvətdən məhrum ediləcəkdi. Məhz buna görə də Azərbaycanın 1969-cu ildən sonrakı dövrü tariximizə Heydər Əliyev epoxası kimi daxil olmuşdur.

Erməni-daşnak məkrinə qarşı qətiyyətli mübarizə

Ümummilli lider Heydər Əliyev Dövlət Təhlükəsizlik Komitəsində işlədiyi uzun illər ərzində dəfələrlə ermənilərin Azərbaycan torpaqlarına sahib çıxmaq iddiaları ilə qarşılaşmış, lakin daim prinsipial və qəti mövqe tutaraq belə çirkin niyyət və səylərin qarşısının alınmasına nail olmuşdur. Qeyd etmək lazımdır ki, 1960-1970-ci illərdə Yerevandan gələn emissarlar və yerli erməni millətçiləri tərəfindən Dağlıq Qarabağın Ermənistana birləşdirilməsi barədə imzalar toplanır, təxribat-pozuculuq fəaliyyətinə cəhdlər göstərilirdi. 1967-ci ilin əvvəllərində erməni-daşnak dairələri və təxribatçıları tərəfindən əvvəlcədən hazırlanan plana əsasən, Dağlıq Qarabağda milliyyətcə erməni olan bir nəfər qətlə yetirilir. Xüsusi hazırlanmış təhrikçilərin rəhbərliyi ilə ermənilər həmin qətl hadisəsi ilə bağlı məhkəmə iclasının keçirildiyi kinoteatrın zalına girərək şübhəli şəxs kimi həmin prosesdə dindirilən 2 azərbaycanlını zorla mühafizəçilərin əlindən alıb xüsusi amansızlıqla öldürürlər. Təqsirləndirilən, lakin sonradan bəraət almış digər azərbaycanlı Zöhrab Məmmədov isə dustaq maşını ilə birlikdə yandırılır. Burada əsas məqsəd hadisələri qızışdırıb milli zəminə yönəltmək, nəticədə azərbaycanlıların bütün Qarabağ ərazisindən köçürülməsini və ərazinin Ermənistana birləşdirilməsinin təməlini qoymaq idi. Lakin Azərbaycan təhlükəsizlik orqanlarının çevik müdaxiləsi nəticəsində bu hadisələrin qarşısı qısa müddətdə alındı. Təxribat zamanı xüsusi fəallıq göstərən 20 nəfər milliyyətcə erməni olan şəxs həbs edildi. Onlardan 5 nəfərə ölüm hökmü kəsildi, 14 nəfər isə müxtəlif müddətlərə azadlıqdan məhrum edildi. İşin istintaqı şəxsən Heydər Əliyevin nəzarətində idi. O bu məqsədlə Xankəndiyə gedərək 15 gün orada qalmışdı. Araşdırmalar göstərmişdi ki, Dağlıq Qarabağda baş verən hadisələrin əksəriyyəti ermənilərin xarici daşnak havadarlarının təhriki ilə Ermənistandan gəlmiş emissarlar tərəfindən törədilir. Heydər Əliyevin təşəbbüsü ilə bu məsələ Azərbaycan KP MK-nın siyasi bürosuna çıxarılaraq ətraflı müzakirə edilmiş, vilayət rəhbərliyinin bu məsələyə laqeyd yanaşması, işlərindəki ciddi qüsur və nöqsanlar tənqid edilmiş, məsələ ilə bağlı gələcək adekvat tədbirlər müəyyənləşdirilmişdi.

Maraqlıdır ki, 1968-ci il avqustun 28-də Azərbaycan KP MK-nın plenumunda DTK sədri Heydər Əliyev xaricdəki daşnakların Azərbaycan əleyhinə necə işlədiklərini də açıq göstərirdi: "1967-1968-ci illərdə xaricdəki erməni millətçi təşkilatlarının, xüsusilə də "Daşnaksütyun" partiyasının respublikamızla əlaqədar münasibətdə fəaliyyətlərində bir canlanma müşahidə olunmuşdur. Xarici ölkələrin bir çoxundan yerli idarələrə, qəzet və jurnalların redaksiyalarının ünvanına millətçi xarakterli bəzi məqalə və müraciətlər göndərilmişdir".

Təsadüfi deyildir ki, hələ SSRİ dönəmində Ermənistan KP MK-nın keçmiş birinci katibi A.Koçinyan Dağlıq Qarabağın ermənilərin xeyrinə Azərbaycandan ayrılaraq ilhaq edilməsində ən böyük maneənin məhz Heydər Əliyev olduğunu xüsusilə vurğulayırdı: "Mənim rəhbərliyim dövründə Qarabağ məsələsi neçə dəfə qaldırılmış, lakin Heydər Əliyevin nüfuzu və mərkəzdə sözünün iti kəsəri bu məsələnin həllinə imkan verməmişdi".

Son illərdə Ermənistan dövri mətbuatında çap olunan yazılarda da 1960-1970-ci illərdə Qarabağ məsələsinin ermənilərin xeyrinə həll olunmasına başlıca maneçilik kimi Heydər Əliyev faktoru göstərilirdi. Siyasi Büronun üzvü və SSRİ Nazirlər Soveti sədrinin birinci müavini Heydər Əliyevin vəzifəsindən uzaqlaşdırılmasında əsas səbəblərdən biri də "böyük Ermənistan" xülyasına daim əngəl olması idi. Bütün bunlar göstərir ki, ümummilli lider Heydər Əliyev harada işləməsindən və yaşamasından asılı olmayaraq, xalqına və doğma Azərbaycana sədaqətlə xidmət etmiş, daim onun milli maraqlarını müdafiə etmişdir.

Ulu öndər Azərbaycanın suverenliyinin, ərazi bütövlüyünün qorunub saxlanılması, təhlükəsizliyinin təmin olunmasında milli təhlükəsizlik orqanlarının qarşısında mühüm vəzifələr qoyurdu və eyni zamanda, bu istiqamətdə həmin strukturun çətin və şərəfli fəaliyyətinə xüsusi önəm verirdi: "Əsas vəzifə xalqa, millətə, müstəqil Azərbaycan dövlətinə sədaqətdir... Vətənə, millətə, dövlətə sədaqət sizin işinizin əsas devizidir. Arzu edərdim ki, müstəqil Azərbaycan Respublikasının Milli Təhlükəsizlik Nazirliyinin müasir nəsli və gələcək nəsli Azərbaycanın müstəqilliyini qoruyub yaşatmaq, Azərbaycanı bu ağır, böhranlı vəziyyətdən - erməni təcavüzündən çıxarmaq və bütün çətin proseslərdən çıxarmaq üçün Vətənə, millətə, xalqa sədaqət hissləri ilə yaşasın. Arzu edərdim ki, siz öz fəaliyyətinizi daim gücləndirəsiniz və Azərbaycan xalqının, dövlətinin qarşısında duran böyük, taleyüklü vəzifələrin həyata keçirilməsinin fəal iştirakçısı olasınız".

O da qeyd olunmalıdır ki, möhtəşəm siyasi xadim Heydər Əliyevin ömür yolu öz xalqına, bölgədə və dünyada sülhə və sabitliyə xidmətin nümunəsidir. Qurub-yaratdığı müstəqil Azərbaycan dövlətinin tərəqqisi yolunda Heydər Əliyevin həyat prinsipləri həmişə ədalət, sülh, əmin-amanlıq və xalqın rifahı, dövlətin qüdrətinin və təhlükəsizliyinin möhkəmləndirilməsi olmuşdur. O səbəbdən Heydər Əliyev əzəməti, böyüklüyü, qüdrəti və fədakarlığı xalqımız tərəfindən hər zaman uca tutulur, xatirəsi daim ehtiramla yad edilir.

Xilaskarlıq missiyasının yeni dövrü

Dahi siyasətçi Heydər Əliyev xalqın təkidli və israrlı tələbi ilə ikinci dəfə hakimiyyətə gələndə onun qoyub getdiyi Azərbaycan həmin ölkə deyildi. Respublikada hərc-mərclik, anarxiya, separatçılıq baş alıb gedirdi. Daxili və xarici siyasətin düzgün qurulmaması nəticəsində Azərbaycan vətəndaş müharibəsi ərəfəsində idi. Ulu öndər Heydər Əliyevin həyata keçirdiyi təxirəsalınmaz qətiyyətli tədbirlər sayəsində Milli Ordumuz formalaşdırıldı. Cinayətkarlıqla mübarizə ciddi və məqsədyönlü xarakter aldı. Bu yönümdə zəruri qərarlar qəbul olundu və müvafiq tədbirlər həyata keçirildi. Azərbaycanın milli mənafelərini qorumağa qadir nizami Silahlı Qüvvələrin yaradılması, torpaqlarımızın müdafiə olunması ilə bağlı mühüm addımlar atıldı, atəşkəsə nail olundu. Eyni zamanda, ulu öndər dünyanın ən yüksək kürsülərindən dəfələrlə bəyan etdi ki, Azərbaycanın torpaqlarından bir qarış da olsa erməni separatçılarına verilməyəcək, ərazi bütövlüyümüz təmin ediləcəkdir.

Azərbaycanda sabitlik yaradan və ölkənin təhlükəsizliyini təmin edən ümummilli lider Heydər Əliyev beynəlxalq aləmin diqqətini respublikamıza yönəltdi. Az bir müddətdə iflic vəziyyətinə düşən iqtisadiyyatı dirçəltdi. Məhz onun çoxgedişli və məharətli diplomatiyası nəticəsində bir çox dövlətlərlə Azərbaycan arasında siyasi-iqtisadi əlaqələr yaradıldı, daim genişləndirildi. Ölkəmizə xarici investisiya qoyuluşu özünün müsbət həllini tapdı. "Əsrin müqaviləsi" imzalandı. Strateji əhəmiyyətli Bakı-Tbilisi-Ceyhan neft kəmərinin əsası qoyuldu. Tarixi "İpək yolu" bərpa olundu.

Heydər Əliyevin fenomenal siyasi zəkası sayəsində Azərbaycan beynəlxalq hüququn bərabərhüquqlu nüfuzlu üzvlərindən birinə çevrildi və müxtəlif beynəlxalq təşkilatlarda təmsil olundu. Ölkəmizdə müstəqil dövlət təsisatlarının yaranması və dövlət quruculuğu prosesinin böyük vüsət alması 1995-ci ildə Azərbaycanın Konstitusiyası qəbul edildikdən sonra daha da gücləndi. Azərbaycanda dövlətçiliyin möhkəmləndirilməsi və demokratik prinsiplərin bərqərar olması, demokratik, hüquqi, dünyəvi və unitar dövlət quruculuğu prosesi uğurla aparıldı. Heydər Əliyev dünya azərbaycanlılarının həmrəyliyinə, Azərbaycan diasporunun formalaşmasına nail oldu.

Ümummilli lider Heydər Əliyevin 1997-ci il 23 mart tarixli sərəncamı ilə Azərbaycanın təhlükəsizlik orqanlarının peşə bayramı gününün Azərbaycan Xalq Cümhuriyyəti dövründə ilk xüsusi xidmət orqanının yaradıldığı gündən - 1919-cu il 28 mart tarixindən götürülməsi də onun tarixi irsə hörmət və sədaqətinin ifadəsi idi.

Ulu öndər milli təhlükəsizlik orqanlarının müasir tələblərə və çağırışlara uyğun formalaşması, ölkədə təhlükəsizliyin etibarlı təmin edilməsində layiqli yer tutması məsələlərini daim diqqət mərkəzində saxlayırdı. İlk növbədə, yenidən formalaşdırılan Milli Təhlükəsizlik Nazirliyinin fəaliyyətini tənzimləyən qanunvericilik aktları qəbul edildi.

Məlumdur ki, ümummilli lider Heydər Əliyev Azərbaycanın Milli Təhlükəsizlik orqanlarının əməkdaşları qarşısında çox mühüm vəzifələr qoymuşdur. Ulu öndər Heydər Əliyev deyirdi: "Öz peşəkarlıq səviyyənizi yüksəltmək sizin vəzifəniz olmalıdır. Bu, hər bir ölkənin təhlükəsizlik orqanı üçün vacib olan amildir. Dövlətin təhlükəsizlik, yaxud kəşfiyyat orqanı o vaxt qalib gəlir, öz vəzifəsini layiqincə yerinə yetirir ki, orada peşəkar əhval-ruhiyyə olsun, peşəkar kadrlar və iş üslubu olsun. Ona görə də siz daim öz peşəkarlığınızın təkmilləşdirilməsi üzərində işləməlisiniz, oxumalı, öyrənməlisiniz, çox savadlı, bilikli insanlar olmalısınız". Ümummilli lider təhlükəsizlik orqanlarının elm və intellektual potensialını artırmaq üçün də lazımi addımlar atdı və Milli Təhlükəsizlik Nazirliyinin Akademiyasını yaratdı ki, bu il həmin ali təhsil ocağı özünün 15 illik yubileyini qeyd edəcəkdir. Yeri gəlmişkən onu da qeyd etməliyəm ki, bu il Azərbaycanın milli maraqları və təhlükəsizliyi əleyhinə yönəlmiş təhdidlərin qarşısının alınmasında qəhrəmanlıq və şücaət nümunələri göstərmiş, şəhidlər vermiş MTN-in "Qartal" Xüsusi Təyinatlı Dəstəsinin yaradılmasının 20 illik yubileyi də qeyd olunacaqdır.

Milli Təhlükəsizlik Nazirliyinə etimadın daha da artması baxımından 2004-cü il Azərbaycan xüsusi xidmət orqanlarının tarixində yeni bir mərhələnin başlanğıcı oldu. Milli təhlükəsizlik orqanlarının fəaliyyətini tənzimləyən qanunçuluq bazası möhkəmləndirildi, yeni qanunlar və bir qədər sonra isə "Azərbaycan Respublikasının milli təhlükəsizlik konsepsiyası" qəbul olundu.

Azərbaycanın əleyhinə yönələn kəşfiyyat-pozuculuq fəaliyyətinə qarşı, terrorçuluqla, transmilli mütəşəkkil cinayətkarlıqla mübarizədə və ümumən, milli maraqların etibarlı təmin olunmasında Milli Təhlükəsizlik Nazirliyinin əldə etdiyi konkret nəticələr son illərin ən böyük uğurlarındandır. Bunun əsas səbəbi aparılmış zəruri islahatlar, normativ-hüquqi bazanın təkmilləşdirilməsi, maddi-texniki potensialın ən müasir tələblər səviyyəsində gücləndirilməsi, hüquq-mühafizə orqanları arasında işgüzar münasibətlərin, habelə beynəlxalq əməkdaşlıq əlaqələrinin genişləndirilməsi və daha səmərəli xarakter alması, günün reallıqlarına uyğun yeni fəaliyyət istiqamətlərinin və vəzifələrin müəyyən edilməsi, peşəkar kadr özəyinin möhkəmləndirilməsi, hər bir əməkdaşın fəaliyyətinə obyektiv qiymət verilməsi və şəxsi heyətin sosial müdafiəsinə dövlət səviyyəsində diqqət və qayğının artırılmasıdır.

Heydər Əliyev amallarından qaynaqlanaraq və onun müəyyən etdiyi siyasət xəttinə söykənərək müstəqilliyini əzmlə möhkəmləndirən, demokratik, sivil, hüquqi dövlət quruculuğu yolunda inamlı addımlar atan Azərbaycan Respublikası möhtərəm Prezident İlham Əliyevin rəhbərliyi ilə öz dövlətçilik ənənələrini daha da inkişaf etdirərək etibarlı gələcəyi üçün sarsılmaz təməl yaradır.

Heydər Əliyevin peşəkarlıq, idarəçilik və dövlətçilik irsinin layiqli davamçısı, müasir dünyagörüşə, geniş biliklərə, ensiklopedik məlumatlara və dərin zəkaya malik möhtərəm Prezident İlham Əliyev dövlət başçısı, siyasi rəhbər və Silahlı Qüvvələrin Ali Baş Komandanı kimi bütün dövlət strukturlarına, o cümlədən milli təhlükəsizlik orqanlarına daim diqqət göstərir, onların problemlərinin vaxtında həlli üçün zəruri təşkilati-əməli tədbirlər həyata keçirir. Hələ gənc vaxtlarından onun üçün doğma olan təhlükəsizlik orqanlarına xüsusi qayğısı bizim üçün çox önəmlidir, böyük etimaddır və üzərimizə ikiqat məsuliyyət qoyur.

Bu gün əsası və fəaliyyət prinsipləri ulu öndər Heydər Əliyev tərəfindən qoyulmuş, Prezident İlham Əliyevin müasir dövrün reallıqlarına uyğun istiqamətləri müəyyənləşdirilmiş milli təhlükəsizlik siyasətinin həyata keçirilməsinə Azərbaycanın milli təhlükəsizlik orqanları öz layiqli töhfələrini verməyə çalışırlar.

Ümummilli lider Heydər Əliyevin peşəkarlıq irsinə, müstəqillik və dövlətçilik amallarına sonsuz sədaqət, onun tövsiyələrini rəhbər tutmaq, möhtərəm Prezident İlham Əliyevin ətrafında sıx birləşərək Azərbaycanın qüdrətlənməsi naminə bütün qüvvə və imkanları səfərbər etmək, təhlükəsizlik, sabitlik və tərəqqi kursunun dönməzliyini qoruyub saxlamaq üçün əlverişli şərait yaratmaq milli maraqlara xidmət etmək deməkdir.

Eldar MAHMUDOV,

Azərbaycan Respublikasının milli

təhlükəsizlik naziri, general-leytenant

Azərbaycan.-2013.- 7 may.- S.5.