Qazax bəstəkarının
operasının Bakı səhnəsində uğurla tamaşaya qoyulması
böyük hadisədir
TÜRKSOY-un
baş katibi Düsen Kaseinov Azərbaycana səfəri çərçivəsində
mayın 6-da Mədəniyyət və Turizm Nazirliyində
olmuşdur.
Mədəniyyət
və Turizm Nazirliyinin mətbuat xidmətindən AzərTAc-a
bildirmişlər ki, nazir Əbülfəs Qarayev ilə
görüşdə əməkdaşlığın
perspektivləri müzakirə edilmişdir.
Əbülfəs
Qarayev ölkəmizin TÜRKSOY ilə əməkdaşlığının
hazırkı səviyyəsindən məmnunluğunu ifadə
etmiş, türkdilli ölkələrlə qarşılıqlı
əlaqələrin önəmini vurğulamışdır.
Azərbaycan
opera sənətinin şah əsəri olan
"Koroğlu" operasının türkdilli ölkələrdə
səhnəyə qoyulmasının əhəmiyyətini qeyd
edən nazir, dahi Üzeyir Hacıbəylinin bu ölməz əsərinin
İtaliya səhnəsində də oynanılması
üçün təşəbbüs göstərildiyini
diqqətə çatdırmışdır.
Nazir
bütün bu əlaqələrin Azərbaycan Prezidenti
İlham Əliyev tərəfindən dəstəkləndiyini
bildirərək türkdilli ölkələr arasında mədəni
layihələrin uğurla həyata keçirilməsi ilə
yanaşı, turizm əlaqələrini də inkişaf etdirməyin
vacibliyini qeyd etmişdir.
May
ayının sonunda Bakıda keçiriləcək İkinci
Ümumdünya Mədəniyyətlərarası Dialoq Forumu
haqqında qonağa məlumat verən Əbülfəs
Qarayev onu tədbirdə iştiraka dəvət etmişdir.
TÜRKSOY-un
baş katibi Düsen Kaseinov mayın 5-də Azərbaycan
Dövlət Akademik Opera və Balet Teatrında qazax bəstəkarı,
Qazaxıstanın Dövlət mükafatı laureatı,
professor Erkeqali Raxmadiyevin "Alpamıs" operasının
premyerası münasibətilə paytaxtımıza gəldiyini
bildirmişdir. Qeyd edilmişdir ki, opera Azərbaycan
paytaxtında türkdilli ölkə bəstəkarlarının
ən yaxşı opera tamaşaları ilə bağlı
TÜRKSOY-un xüsusi layihəsi çərçivəsində
təqdim olunmuşdur.
Qonaq
qazax bəstəkarının operasının Bakı
premyerasının uğurla gerçəkləşməsindən
məmnunluğunu ifadə edərək demişdir:
"Operanın premyerasının Bakıda keçirilməsi
böyük bir hadisədir. Təəssüf ki, əsərin
müəllifi bu yaxınlarda dünyasını dəyişdi
və belə beynəlxalq səviyyəyə layiq təşkil
olunan tamaşanı görməyə ömrü vəfa etmədi.
Premyeranın uğurla keçirilməsinə görə Azərbaycan
Respublikasının Prezidentinə, Mədəniyyət və
Turizm Nazirliyinə, Opera və Balet Teatrının rəhbərliyinə
Qazaxıstan rəhbərliyinin və TÜRKSOY-un adından dərin
minnətdarlığımı bildirirəm. Belə layihələr
xalqlarımızı yaxınlaşdırır və bizləri
bir-birimizin mədəniyyəti, musiqisi ilə yaxından
tanış edir".
TÜRKSOY-un
baş katibi ümidvar olduğunu bildirmişdir ki, bu yöndə əlaqələrimiz
daha da inkişaf edəcək və türkdilli ölkələrin
mədəniyyəti qardaş ölkələrdə daim təmsil
olunacaqdır.
Azərbaycan.-2013.- 7 may.- S.13.