Azərbaycan jurnalistlərinin yeni nəsilləri Heydər Əliyev irsindən bəhrələnəcəklər

Bu fikir ulu öndərə həsr olunmuş "Ruhun şad olsun, Ustad!" kitabının təqdimat mərasimində səsləndi

Azərbaycan Mətbuat Şurasında ümummilli lider Heydər Əliyevə həsr olunmuş "Ruhun şad olsun, Ustad!" kitabının təqdimat mərasimi keçirildi. Müəllifi və tərtibçisi peşəkar jurnalist, əməkdar mədəniyyət işçisi, Ali Media Mükafatı laureatı Məzahir Süleymanzadə olan kitabda ulu öndər haqqında xatirələr, Heydər Əliyevin jurnalistika dərslərindən bəhrələnən tanınmış qələm sahiblərinin, mətbuat işçilərinin ürək sözləri toplanıb.

Təsadüfi deyil ki, ulu öndərin jurnalistlər, jurnalist sənəti haqqında söylədiyi yüksək fikirlər kitaba epiqraf kimi verilib: "Jurnalistika çətin sənətdir. Bunu etiraf etmək lazımdır, asan sənət deyildir. Başqa bir yerdə, başqa bir peşə sahibi gəlib öz işində oturub işləyir, müəyyən saat qurtarandan sonra evinə gedir... Amma jurnalistin iş yeri yoxdur. Qəzetin redaksiyası da jurnalistin iş yeri deyildir. Çünki o, redaksiyada otursa, elə ancaq yuxarıya baxsa, bir şey yaza bilməyəcək, fəaliyyət də göstərə bilməyəcək. Demək, jurnalist gərək daim cəmiyyətlə əlaqədə olsun, insanlarla əlaqədə olsun və müxtəlif yerlərlə təmasda olsun ki, istədiyi məlumatı ala bilsin və onların əsasında istədiyi sahədə öz məqalələrini, öz əsərlərini yaza bilsin. Bu, asan iş deyildir. Mən bunu bilirəm və öz fikrimi başqalarına da bildirmək istəyirəm. Ona görə də biz gərək jurnalistlərə kömək edək".

Kitabda məhz həmin bu köməkdən bəhrələnən jurnalistlərdən bir qisminin məqaləsi toplanıb. Belə ki, kitabda Bəxtiyar Sadıqovun, Aqşin Babayevin, Əhməd İsayevin, Elmira Axundovanın, Flora Xəlilzadənin, Knyaz Aslanın və başqalarının Azərbaycan jurnalistikasının inkişafında Heydər Əliyevin böyük rolu, eləcə də ulu öndərin qələm əhlinin böyük dostu olduğunu aydın göstərən, yaşanmış hadisələrə əsaslanan yazılarına yer verilib.

Yeni nəşrin təqdimat mərasimində çıxış edən Mətbuat Şurasının sədri Əflatun Amaşov ulu öndərin Azərbaycan jurnalistikasına və jurnalistlərinə qayğı və köməyindən, bu dəstəyin onun özünün həyatında oynadığı roldan ətraflı bəhs etdi.

Tədbirdə Prezident Administrasiyası İctimai-siyasi şöbəsinin müdiri, tarix elmləri doktoru, professor Əli Həsənovun kitaba giriş kimi verilmiş məqaləsindən bu sözlər bir daha xatırlandı: "1993-cü ildə görkəmli dövlət xadimi Heydər Əliyevin yenidən siyasi hakimiyyətə qayıdışı Azərbaycan dövlətinin və xalqının həyatında mühüm tarixi hadisəyə çevrildiyi kimi, milli mətbuatın inkişafında da yeni mərhələnin başlanğıcını qoydu... Ötən illər ərzində Azərbaycan mətbuatının keçdiyi yola nəzər saldıqda bu sahədə böyük uğurlar əldə edilməsi, öz işinə məsuliyyətlə yanaşan, zamanın nəbzini tutan mətbuat işçilərinin kontingentinin formalaşdığının şahidi oluruq".

Kitabın redaktoru, əməkdar jurnalist Yusif Kərimov qeyd etdi ki, ulu öndər Heydər Əliyev haqqında yazılan kitabların hər birinin özünəməxsus əhəmiyyəti var. Sözügedən kitabı fərqləndirən cəhət odur ki, o, canlı epizodlardan, qələm sahiblərinin şahidi olduğu və çoxlarının bilmədiyi faktlardan yaranıb. M.Süleymanzadənin bütün müəlliflərin yazılarını müəyyən mətnlərlə bir-birinə bağlayaraq xronoloji bir əsər yaratdığı kitabın məziyyətlərindən biri kimi qeyd olundu.

M.Süleymanzadə ümummilli lider Heydər Əliyevin jurnalistika dərslərinin onun və qələm yoldaşlarının həyatına necə böyük təsir göstərdiyini vurğuladı. O, eləcə də bir qrup həmkarı ilə 1992-ci ildə blokada şəraitində yaşayan Naxçıvanda işləyən, mübarizə edən ulu öndərin yanında olduqlarını, onunla söhbət etdiklərini bir daha xatırladı.

Tədbirdə çıxış edənlərin hər biri Heydər Əliyev irsinin tükənməz olduğunu vurğuladı. Azərbaycan jurnalistlərinin yeni-yeni nəsillərinin Heydər Əliyevin jurnalistika dərslərindən bəhrələnəcəyinə inam ifadə olundu.

Flora SADIQLI

Azərbaycan.-2013.- 9 may.- S.13.