Xarici ölkələrdə ümummilli lider Heydər Əliyevin 90 illik yubileyi münasibətilə silsilə tədbirlər keçirilmişdir

Türkiyə

Azərbaycan Respublikasının Türkiyədəki səfirliyi ümummilli lider Heydər Əliyevin 90 illik yubileyi münasibətilə İstanbuldakı Çırağan Sarayında tədbir keçirmişdir.

Tədbirdə səfirliyin əməkdaşları, Türkiyənin dövlət və hökumət təmsilçiləri, deputatlar, elm adamları, ictimai xadimlər, incəsənət, diaspor və KİV nümayəndələri iştirak etmişlər.

Səfirlikdən AzərTAc-a bildirmişlər ki, mərasimdə Heydər Əliyev Fondunun Türkiyədəki nümayəndəsi Samir Cəfərov, səfir Faiq Bağırov və Türkiyə-Azərbaycan parlamentlərarası dostluq qrupunun rəhbəri Necdet Ünüvar çıxış etmişlər.

Səfir Faiq Bağırov ulu öndərin istər Sovet İttifaqı dövründə, istərsə də müstəqillik illərində xalqımız qarşısındakı misilsiz xidmətlərindən, dövlətçiliyimizin möhkəmlənməsində və beynəlxalq aləmdə Azərbaycanın layiqli yer tutmasındakı mühüm rolundan danışmışdır.

Türkiyə Respublikasının Prezidenti Abdullah Gülün və Türkiyənin 9-cu Prezidenti Süleyman Dəmirəlin təbrik məktubları oxunmuşdur.

Sonra Azərbaycan musiqisinin sədaları altında ziyafət verilmiş, iştirakçılara ulu öndərin həyatından və siyasi fəaliyyətindən bəhs edən kitab və "Diplo Atlas" jurnalı paylanmışdır.

Gürcüstan

Azərbaycan Respublikasının Gürcüstandakı səfirliyi və ARDNŞ-in Gürcüstan nümayəndəliyinin təşkilatçılığı ilə ulu öndərin 90 illik yubileyinə həsr olunmuş silsilə tədbirlər mayın 10-da Heydər Əliyevin Tbilisidəki büstünün ziyarəti ilə davam etdirilmişdir.

Azərbaycanın Gürcüstandakı səfirliyi, bu ölkədə fəaliyyət göstərən şirkətlərinin adından büstün önünə əklillər qoyulmuşdur.

Sonra iştirakçılar ümummilli liderin azərbaycanlıların yığcam yaşadıqları Kvemo Kartli-Borçalı bölgəsinin inzibati mərkəzi Rustavi şəhərindəki əzəmətli abidəsi önünə əklillər düzmüşlər.

Tədbir ARDNŞ-in dəstəyi ilə əsaslı təmir olunub bu günlərdə istifadəyə verilmiş M.F.Axundzadə adına Azərbaycanlıların Mədəniyyət Muzeyində davam etdirilmişdir.

İştirakçılar "Tbilisi inter-media" şirkəti tərəfindən lentə alınmış və ulu öndərin həyat və fəaliyyəti əks olunmuş "Dostluğa çağırış" filminə böyük maraqla tamaşa etmişlər.

Filmin müəlliflərindən biri, görkəmli rejissor Tengiz Txilava AzərTAc-a müsahibəsində demişdir ki, Heydər Əliyev böyük dövlət xadimi idi. Onun zəkasının məhsulu olan əsrin qlobal layihələri gerçəkləşdikdən sonra tərəddüdsüz demək olar ki, o, dünya şöhrətli liderə çevrildi. Bununla ulu öndər Cənubi Qafqazda geosiyasi vəziyyəti tam dəyişdi.

T.Txilava bildirmişdir ki, Heydər Əliyev gürcü xalqının böyük dostu idi. Onun Azərbaycanda hakimiyyətə qayıdışından sonra bu dostluğun daha da möhkəmləndirilməsi yönümündə böyük işlər görüldü. Ölkələrarası dostluq münasibətləri strateji tərəfdaşlıq səviyyəsinə yüksəldildi, Azərbaycan Gürcüstanda ən böyük investisiya yatıran ölkələrdən birinə çevrildi və hazırda bu əməkdaşlıq uğurla davam etdirilir. Bizim üçün çox xoşdur ki, ulu öndərin ideyaları Azərbaycan Prezidenti İlham Əliyev tərəfindən çox uğurla həyata keçirilir.

O qeyd etmişdir ki, şirkətimizin lentə aldığı "Dostluğa çağırış" filmində Heydər Əliyevin həyat və fəaliyyətinin bəzi məqamları öz əksini tapmışdır və bu yaradıcı heyətin dahi şəxsiyyətin xatirəsinə ehtiramıdır.

Kvemo Kartli-Borçalı bölgəsi qubernatorunun müavini Koba Kobiaşvili bildirmişdir ki, Heydər Əliyev Gürcüstanda sevilən, hörmətlə yad edilən şəxsiyyətdir. Onun Gürcüstana etdiyi xeyirxahlıqları heç bir siyasətçi edə bilməzdi.

Qubernator müavini vurğulamışdır ki, Heydər Əliyev öz həyatını təhlükədə qoyaraq əsrin qlobal layihələrinin Gürcüstandan keçməklə reallaşmasına imza atmışdır. Bu gün Azərbaycanın, eyni zamanda, Gürcüstanın inkişafı, çiçəklənməsi o müdrik insanın xidmətinin nəticəsidir. Mənim fikrimcə, Heydər Əliyev bu addımı atmasaydı, nəinki ölkələrimizin müstəqilliyini qoruyub saxlaya biləcəydik, əksinə, Avropa strukturlarına inteqrasiya hər iki dövlət üçün xəyal olaraq qalacaqdı.

K.Kobiaşvili demişdir ki, xatırlayıram, Gürcüstanın sabiq Prezidenti Eduard Şevardnadze demişdir: "Əgər Heydər Əliyev Gürcüstanda prezident seçkilərinə namizədliyini irəli sürərsə, xalqın böyük əksəriyyəti onu dəstəkləyər". Bu, gürcü xalqının ümummilli liderə ehtiramı idi və həmin ehtiram yenə də davam etməkdədir.

Qardabani rayon mərkəzində də mayın 10-da ulu öndərin yubileyi şərəfinə tədbir keçirilmişdir. İştirakçılar ümummilli lider Heydər Əliyevin Azərbaycan-Gürcüstan münasibətlərinin inkişafında, bölgədə sabitliyin təmin olunmasında, Azərbaycan dövlətçiliyinin möhkəmləndirilməsində, xaricdə yaşayan soydaşlara yeni yanaşmanın meydana gəlməsində əvəzsiz xidmətlərindən söhbət açmışlar.

Azərbaycan Respublikasının Gürcüstandakı səfiri Azər Hüseyn bu dost ölkədə ulu öndərin xatirəsini əziz tutanlara təşəkkür etmiş, silsilə tədbirlərdə Gürcüstanın Baş naziri Bidzina İvanişvilinin, hökumətin, parlamentin üzvlərinin, ictimaiyyətin nümayəndələrinin iştirak etdiklərini vurğulamışdır. Diplomat demişdir ki, ulu öndərin müəyyənləşdirdiyi siyasi kurs Azərbaycanın dövlət başçısı tərəfindən uğurla davam etdirilir. Məhz bunun nəticəsidir ki, Azərbaycanın dünyada nüfuzu artmaqdadır.

Latviya

Riqada Azərbaycan xalqının ümummilli lideri Heydər Əliyevin 90 illik yubileyinə həsr olunmuş təntənəli tədbir keçirilmişdir. Tədbirdə Latviya Seyminin üzvləri, Milli Məclisin deputatları Elton Məmmədov və Əli Məsimli, azərbaycanlı biznesmenlər, Latviyada fəaliyyət göstərən Azərbaycan diasporunun təmsilçiləri, səfirliyin əməkdaşları, KİV nümayəndələri iştirak etmişlər.

Əvvəlcə Azərbaycanın və Latviyanın dövlət himnləri səslənmişdir.

Tədbirdə Azərbaycan diasporunun ağsaqqalı Adıgözəl Məmmədov, "Azəri" cəmiyyətinin rəhbəri Ulduzxan Əhmədov, Latviyada çalışan azərbaycanlı sahibkar Rafiq Seyfullayev çıxış edərək bildirmişlər ki, mayın 10-u Azərbaycan xalqı üçün əlamətdar gündür. Azərbaycan və Heydər Əliyev məfhumlarının ayrılmazlığı vurğulanmışdır. Azərbaycan və xarici ölkə tarixçilərinin, filosoflarının Heydər Əliyev dühası haqqında hələ çox əsərlər yaradacaqlarına əminlik ifadə olunmuşdur. Natiqlər qeyd etmişlər ki, ölkəmizin hərtərəfli inkişafının əsası dahi lider Heydər Əliyev tərəfindən qoyulmuşdur.

Latviya Seyminin deputatı, yeni yaradılmış "Araz" təşkilatının rəhbəri Romans Naudinş Azərbaycanın müstəqilliyinin təşəkkülündə və möhkəmlənməsində, beynəlxalq arenada ölkənin nüfuzunun artmasında Heydər Əliyevin müstəsna rolunu qeyd etmişdir.

Milli Məclisin deputatı Elton Məmmədov tədbirə toplaşanları ümumxalq bayramı münasibətilə təbrik edərək bildirmişdir ki, xalqımız dahi şəxsiyyət, Azərbaycan dövlətinin memarı və xilaskarı Heydər Əliyevin tarixi xidmətlərini iftixarla xatırlayır. Qeyd olunmuşdur ki, ötən əsrin 60-cı illərindən başlayan və Azərbaycan tarixində vacib mərhələ olan bütöv bir dövr dahi rəhbər Heydər Əliyevin adı və fəaliyyəti ilə bağlıdır. Ümummilli lider hüquqi dövlət yaradılması kimi tarixi missiyanı uğurla yerinə yetirmişdir. E.Məmmədov diqqətə çatdırmışdır ki, ulu öndər ölkənin yeni, xalqın iradəsini ifadə edən və dünyəvi demokratik dövlət quruculuğunu, insan hüquqlarının müdafiəsini təmin edən yeni Konstitusiyaya ehtiyacını düzgün qiymətləndirmişdir. Deputat Azərbaycan həqiqətlərini, eləcə də Ermənistan-Azərbaycan, Dağlıq Qarabağ münaqişəsi ilə bağlı reallıqları dünya azərbaycanlılarına çatdıran diaspor təşkilatlarının yaranmasında və inkişafında ümummilli lider Heydər Əliyevin xidmətlərini xüsusi vurğulamışdır.

Azərbaycanın Latviyadakı səfiri Elman Zeynalov demişdir ki, ölkəmiz qısa vaxt ərzində nəinki regionda, eləcə də dünyada böyük nüfuza malik olan dövlətə çevrilmişdir. Dahi lider Azərbaycana milli təhlükəsizlik konsepsiyasını, milli dövlətçilik ideyasını, xalqı bu ideya uğrunda arxasınca apara bilən siyasi təşkilatı bəxş etmiş, ölkəyə yeni lider vermişdir. Hazırda ulu öndərin müəyyənləşdirdiyi inkişaf strategiyasını uğurla davam etdirən Prezident İlham Əliyevin yürütdüyü məqsədyönlü siyasət nəticəsində Azərbaycanın dünyada nüfuzu gündən-günə artır.

Tədbirdə dahi şəxsiyyət Heydər Əliyevin həyat və fəaliyyətinə həsr olunmuş sənədli film nümayiş etdirilmişdir.

Sonra ziyafət təşkil edilmişdir.

Fransa

Fransanın Aşağı Normandiya (Basse Normandie) regionunun Orn departamentindəki Leql şəhərində Azərbaycan xalqının ümummilli lideri Heydər Əliyevin 90 illiyinə həsr olunmuş konsert təşkil olunmuşdur.

Konsertdən əvvəl Azərbaycanın Fransadakı səfiri Elçin Əmirbəyov çıxış edərək dünyanın tanınmış siyasətçilərindən biri olan Heydər Əliyevin keçdiyi şərəfli həyat yolundan, çoxşaxəli fəaliyyətindən, Azərbaycanın dövlətçilik tarixindəki mühüm rolundan, xalqının parlaq gələcəyi naminə gördüyü işlərdən bəhs etmişdir.

Səfir ulu öndərin uzaqgörən siyasəti nəticəsində ölkəmizin beynəlxalq aləmdə böyük nüfuz sahibi olduğunu xüsusi vurğulamış, Azərbaycan ilə Fransa arasında bütün sahələrdə əməkdaşlığın inkişaf etdiyini bildirmiş, xalqlarımız arasında dostluq əlaqələrinin möhkəmləndiyini söyləmişdir. Azərbaycanın Naftalan və Fransanın Leql şəhərləri arasında qardaşlaşma barədə sənədin imzalanmasını Heydər Əliyevin uzaqgörən xarici siyasətinin nəticəsi kimi dəyərləndirmişdir.

Konsertdə Xəzər Universitetinin incəsənət və musiqi kafedrasının müdiri, gənc pianoçu Zülfiyyə Sadıqova Azərbaycan və Avropa bəstəkarlarının klassik musiqilərini səsləndirmişdir.

Fransız musiqisevərləri Z.Sadıqovanın çıxışlarını hərarətlə qarşılamışlar.

Cenevrə

Azərbaycan Respublikasının Cenevrə şəhərində BMT bölməsi və digər beynəlxalq təşkilatlar yanında daimi nümayəndəliyi xalqımızın ümummilli lideri Heydər Əliyevin anadan olmasının 90 illik yubileyi münasibətilə Cenevrədə rəsmi qəbul təşkil edilmişdir. Tədbirdə BMT-nin Cenevrə bölməsinin baş direktoru K.Tokayev, İnsan Hüquqları Şurasının prezidenti R.Henczel, Parlamentlərarası İttifaqın baş katibi A.Conson, Beynəlxalq Mülki Müdafiə Təşkilatının baş katibi N.Al-Sleybi, BMT katibliyinin, digər beynəlxalq təşkilatların rəhbər şəxsləri və əməkdaşları, diplomatik heyət üzvləri, Cenevrə Respublikası Kanton Şurasının yüksək vəzifəliləri, KİV təmsilçiləri, bu ölkədə təhsil alan azərbaycanlı tələbələr və diaspor nümayəndələri iştirak etmişlər.

Azərbaycan Respublikasının Cenevrə şəhərində BMT bölməsi və digər beynəlxalq təşkilatlar yanında daimi nümayəndəsi, səfir Murad Nəcəfbəyli çıxış edərək ümummilli lider Heydər Əliyevin həyatı və fəaliyyəti haqqında tədbir iştirakçılarına ətraflı məlumat vermiş, dahi şəxsiyyətin respublikamızın ali rəhbəri seçilməsindən sonra Sovet İttifaqının faktiki rəhbərlərindən birinə çevrildiyini diqqətə çatdırmışdır. Müstəqilliyin bərpasından sonra ölkədə yaranan hakimiyyət böhranının aradan qaldırılmasında ümummilli liderin Azərbaycan xalqı qarşısındakı əvəzsiz xidmətlərindən ətraflı bəhs edən səfir ölkəmizdə siyasi sistemin, dövlətçilik ənənələrinin möhkəmləndirilməsi sayəsində görülən işləri, Azərbaycanın uğurla inkişaf etdiyini qeyd etmişdir.

Ermənistanın Azərbaycana qarşı hərbi təcavüzü nəticəsində ərazilərimizin 20 faizinin işğal edilməsinə, Azərbaycanın Ermənistan ilə müharibə vəziyyətində olmasına baxmayaraq, ölkəmizin iqtisadi, siyasi, sosial və diplomatik sahələrdə əhəmiyyətli nailiyyətlər əldə etdiyini diqqətə çatdıran M.Nəcəfbəyli bu nailiyyətlərin birbaşa Heydər Əliyevin adı ilə bağlı olduğunu vurğulamışdır. Hazırda Prezident İlham Əliyev tərəfindən aparılan uğurlu islahatların ulu öndərin uzaqgörən siyasətinin məntiqi davamı olduğunu bildirmişdir.

Qeyd olunmuşdur ki, Azərbaycanın beynəlxalq aləmdə nüfuzu daha da artır, BMT ilə əlaqələri möhkəmlənir. Etibarlı tərəfdaş kimi 155 dövlətin dəstəyi ilə BMT Təhlükəsizlik Şurasının qeyri-daimi üzvü seçilən Azərbaycanın BMT sistemi çərçivəsində bütün sahələrdə əməkdaşlığı genişlənir.

Tədbirdə ümummilli lider Heydər Əliyevin həyat və fəaliyyətinə həsr olunmuş sənədli film nümayiş olunmuş, dahi şəxsiyyətin müxtəlif sahələrdəki fəaliyyətinə dair kitab və məlumatlar paylanmışdır.

Serbiya

Mayın 10-da Azərbaycan xalqının ümummilli lideri Heydər Əliyevin 90 illik yubileyi ilə əlaqədar Serbiyanın paytaxtı Belqrad şəhərində keçirilmiş silsilə tədbirlərin davamı olaraq ölkəmizin bu ölkədəki səfirliyində ulu öndərin xatirəsinə həsr olunmuş anma mərasimi keçirilmişdir.

Səfirlikdən AzərTAc-a bildirmişlər ki, tədbirdə Serbiyanın dövlət və hökumət rəsmiləri, millət vəkilləri, ölkə parlamentində fəaliyyət göstərən parlamentlərarası dostluq qrupunun üzvləri, şəhər meriyası və ictimaiyyət nümayəndələri, Serbiyanın müsəlman icmasının üzvləri, Belqrad şəhərindəki Azərbaycan Mədəniyyət Mərkəzi, Serbiya-Azərbaycan Dostluq Cəmiyyəti və Serbiya-Azərbaycan ticarət-iqtisadi palatasının rəhbərliyi və üzvləri, "Azvirt" şirkətinin rəhbərliyi, bu ölkədə çalışan, yaşayan və təhsil alan həmyerlilərimiz, KİV nümayəndələri iştirak etmişlər.

Tədbir iştirakçıları Azərbaycan dövləti və hökumətinin dəstəyi ilə Belqrad şəhərində abadlaşdırılmış və bərpa edilmiş "Taşmaydan parkı"na gələrək, ümummilli liderin burada ucaldılmış abidəsini ziyarət etmiş və abidə qarşısına əklil və gül-çiçək dəstələri düzmüşlər.

Azərbaycanın Serbiyadakı səfirliyində davam edən tədbirdə qonaqlar ulu öndərin həyat və fəaliyyətini əks etdirən fotosərgi ilə tanış olmuşlar.

Azərbaycanın Serbiyadakı səfiri Eldar Həsənov çıxış edərək tədbir iştirakçılarına səfirliyin və Belqrad şəhərində fəaliyyət göstərən Azərbaycan Mədəniyyət Mərkəzinin birgə təşkilatçılığı ilə bu şəhərdə keçirilmiş və xalqımızın ümummilli lideri Heydər Əliyevin 90 illik yubileyinə həsr olunmuş tədbirlərdən məlumat vermiş, bugünkü anma mərasiminin silsilə tədbirlərin tərkib hissəsi olduğunu qeyd etmişdir.

Səfir daha sonra ümummilli lider, görkəmli siyasi xadim Heydər Əliyevin həyatı və fəaliyyəti, onun Azərbaycanın müstəqilliyinin möhkəmləndirilməsində və ölkəmizdə sabitliyin bərqərar olunmasında əvəzsiz xidmətlərindən, demokratik, hüquqi, dünyəvi dövlət quruculuğu istiqamətində həyata keçirdiyi islahatlardan və xilaskar rolundan bəhs etmişdir. Diplomat ölkəmizdə azərbaycançılıq, milli birlik, sosial ədalət, sosial rifah, ərazi bütövlüyü kimi ideyalara söykənən müstəqil, tərəqqi edən və siyasi cəhətdən sabit ölkə modelinin əsasının məhz ulu öndər tərəfindən qoyulduğunu tədbir iştirakçılarının diqqətinə çatdırmışdır. Həmin siyasi kursun bu gün Azərbaycan Prezidenti İlham Əliyev tərəfindən uğurla davam etdirildiyini vurğulamış, xalqımızın ümummilli lideri Heydər Əliyevin əziz xatirəsinə göstərdikləri dərin hörmət və ehtirama görə qonaqlara minnətdarlığını bildirmişdir.

Sonra tədbir iştirakçıları ümummilli liderin həyat və fəaliyyətindən bəhs edən filmə baxmışlar.

Tədbirin sonunda iştirakçılara Azərbaycanın Serbiyadakı səfirliyi tərəfindən serb dilində nəşr edilmiş "Görkəmli şəxsiyyətlərin həyatı" silsiləsindən ulu öndərə həsr olunmuş kitab və ümummilli liderin 90 illik yubileyi ilə əlaqədar xüsusi olaraq hazırlanmış "Dünya liderləri Heydər Əliyev haqqında" kitabçası paylanmışdır.

İtaliya

Azərbaycan xalqının ümummilli lideri Heydər Əliyevin anadan olmasının 90 illik yubileyi münasibətilə respublikamızın İtaliyadakı səfirliyi tərəfindən Roma şəhərinin Brankaço sarayında konsert keçirilmişdir.

Səfirlikdən AzərTAc-a bildirmişlər ki, səfir Vaqif Sadıqov tədbirdə çıxış edərək, ötən əsrin 90-cı illərinin əvvəllərində Azərbaycan ərazilərinin Ermənistan tərəfindən işğal edilməsi, getdikcə gərginləşən siyasi vəziyyət, əhalinin günbəgün ağırlaşan sosial durumu ölkəni bu bəlalardan xilas edə biləcək, xalqı öz arxasınca aparmağa qadir rəhbərə ehtiyac olduğunu şərtləndirdiyini diqqətə çatdırmışdır. Vurğulanmışdır ki, ümummilli lider Heydər Əliyevin hakimiyyətə yenidən qayıdışından sonra ölkədə baş vermiş sosial-iqtisadi və siyasi inkişaf dövlətimizin möhkəmləndirilməsində, dünya ölkələri ilə sıx əlaqələr yaradılmasında və xalqımızın strateji mənafelərini təmin edən müasir cəmiyyətin qurulmasında həlledici rol oynamışdır.

Daha sonra İtaliya-Azərbaycan Assosiasiyasının sədri xanım Paola Kasaqrande çıxışında Heydər Əliyevin Azərbaycanın dünya arenasında tanınmasında və Azərbaycan-İtaliya əlaqələrinin inkişafında mühüm rol oynadığını demişdir. O, həmçinin İtaliya və Azərbaycanın coğrafi uzaqlıqda yerləşmələrinə baxmayaraq, ölkələrimizin mədəniyyətlərinin oxşar olduğunu və gündən-günə bütün sahələrdə ikitərəfli münasibətlərin inkişaf etdiyini bildirmişdir.

Konsertdə Üzeyir Hacıbəyli adına Bakı Musiqi Akademiyasının rektoru professor Fərhad Bədəlbəyli, gənc skripkaçı Elvin Qəniyev, pianoçu Nərminə Qəniyeva, tenor Yusif Eyvazov, eləcə də İtaliyanın məşhur Santa Çeçilia Musiqi Akademiyasının simli musiqi alətləri ansamblı Azərbaycan, İtaliya və digər Avropa musiqisindən inciləri ifa etmişlər.

Tədbirdə İtaliyanın dövlət orqanlarının, elm, təhsil və işgüzar dairələrinin, kütləvi informasiya vasitələrinin və bu ölkədəki diplomatik korpusun nümayəndələri iştirak etmişlər.

Azərbaycan.-2013.- 12 may.- S.4.