Azərbaycan qadını jurnalının yaz buraxılışı maraqlı mədəniyyət layihəsi ilə təqdim olunmuşdur

Mayın 11-də Beynəlxalq Muğam Mərkəzində "Azərbaycan qadını" jurnalının yaz buraxılışının təqdimat mərasimi keçirilmişdir.

AzərTAc xəbər verir ki, tədbirdə dövlət və hökumət nümayəndələri, Milli Məclisin deputatları və KİV təmsilçiləri iştirak etmişlər.

"Azərbaycan qadını" jurnalının hər sayının maraqlı mədəniyyət layihəsi ilə təqdimatı artıq bir ənənəyə çevrilmişdir. Bu dəfə iştirakçılara görkəmli oftalmoloq alim, akademik Zərifə Əliyevanın xatirəsinə həsr olunmuş "Elegiya" filmi və gənc vokalçıların ifasında xalq mahnıları, Azərbaycan bəstəkarlarının əsərləri təqdim olunmuşdur.

Tədbirdə çıxış edən Azərbaycan Respublikasının Prezidenti Administrasiyasının Humanitar siyasət məsələləri şöbəsinin müdiri, "Azərbaycan qadını" jurnalının baş redaktoru Fatma Abdullazadə bu gecənin Zərifə xanım Əliyevanın işıqlı xatirəsinə həsr olunduğunu bildirmişdir.

Ulu öndər Heydər Əliyevin və görkəmli oftalmoloq alim Zərifə xanım Əliyevanın şərəfli həyat yolundan danışan F.Abdullazadə qeyd etmişdir ki, jurnalı vərəqlədikcə bu böyük şəxsiyyətlərin bizə zəngin bir irs qoyub getdiklərini görəcəyik. Bəşəriyyətin bizə bəxş etdiyi bu nurlu insanların əziz xatirəsini daim yaşatmalıyıq. Bu gün Zərifə xanımın ruhu şaddır. Çünki bu zalda əyləşən hər bir xanım onun ənənələrini öz həyatında yaşadır. Təhsilə, elmə, mədəniyyətə müraciət edərək bu milli irsi qoruyub inkişaf etdirir. Bu irsi hər bir Azərbaycan qadını göz bəbəyi kimi qoruyub saxlamalı və bir ərməğan kimi bizdən sonra gələn nəsillərə ötürməlidir.

"Azərbaycan qadını"nın yaz buraxılışı iştirakçılar tərəfindən maraqla qarşılanmışdır.

Jurnalın yeni sayında oxuculara bir-birindən maraqlı bədii-publisistik yazılar, eləcə də ölkəmizin həyatında parlaq hadisəyə çevrilən mühüm beynəlxalq layihələri əks etdirən materiallar təqdim olunmuşdur.

Novruz bayramı ərəfəsində Azərbaycanda keçirilən "Muğam aləmi" III Beynəlxalq Muğam Festivalı bir sıra yeniliklərlə yadda qalmışdır. Festivalın təşkilatçıları oxuculara məhz bu yeniliklərdən söz açmışlar .

Ənənəvi olaraq İsveçrənin Davos şəhərində təşkil edilən Dünya İqtisadi Forumu bu ilin aprelində ilk dəfə Bakıda keçirilmişdir. Tanınmış iqtisadçıları, ekspertləri, jurnalistləri, dövlət və hökumət nümayəndələrini bir araya gətirən Dünya İqtisadi Forumu jurnalın səhifələrində geniş əksini tapmışdır.

Avropa Olimpiya Komitəsi 2015-ci ildə birinci Avropa Oyunlarının Bakıda keçirilməsi ilə bağlı qərar qəbul etmişdir. "Odlar yurdunda Olimpiya məşəli" yazısında bu mühüm layihəyə hazırlıqdan bəhs olunur.

Fəaliyyətinin prioritet istiqamətlərindən biri gənc nəslə hərtərəfli qayğının göstərilməsi olan Heydər Əliyev Fondu paytaxtın uşaq müəssisələrində müxtəlif tədbirlər keçirir. Fondun vitse-prezidenti Leyla Əliyevanın təşəbbüsü ilə Müasir İncəsənət Muzeyində Nizami rayonu 1 nömrəli uşaq evinin gənc rəssamlarının əsərlərinin təqdim edildiyi "Balaca əllərin böyük işləri" sərgisi açılmışdır. Oxucular jurnalda dərc edilmiş "Fırça tutan balaca əllər" yazısında bu istedadlı uşaqların yaradıcılıq dünyası ilə daha yaxından tanış ola biləcəklər.

Zərifə xanım Əliyevanın xatirəsinə həsr olunmuş "Elegiya"da görkəmli oftalmoloq alimin həyat və yaradıcılığından bəhs edilmişdir.

Heydər Əliyev Fondunun vitse-prezidenti, Rusiyanın Azərbaycanlı Gənclər Birliyinin sədri, "Baku" beynəlxalq jurnalının baş redaktoru Leyla Əliyevanın "Azərbaycan qadını" jurnalına səmimi müsahibəsi oxucular tərəfindən maraqla qarşılanacaqdır.

Jurnalın səhifələrində, həmçinin "Onların bir adı da işıqdı" layihəsi, "Ay kimi nurlu", "Qarağacın zərif budağı", "Bu gündən başlanan gələcək" və digər maraqlı materiallar yer almışdır.

 

 

Azərbaycan.-2013.- 12 may.- S.6.