Suraxanı Rayonu İcra Hakimiyyətinin nümayəndə heyəti Riqada səfərdədir

Bakı şəhərinin Suraxanı Rayonu İcra Hakimiyyətinin başçısı İlqar Abbasovun rəhbərlik etdiyi Azərbaycan nümayəndə heyəti Riqadadır. Riqa Dumasında nümayəndə heyətinin Şərq icra müdiriyyətinin icraçı direktoru Dmitri Pavlovla görüşü olmuşdur. Görüş nəticəsində Şərq icra müdiriyyəti ilə Bakı şəhərinin Suraxanı rayonunun administrasiyası arasında əməkdaşlıq haqqında saziş imzalanmışdır. Sazişdə mədəni mübadilə, rayonun sahibkarları ilə əlaqə imkanlarının öyrənilməsi nəzərdə tutulur.

Riqa Dumasının Mənzil və ətraf mühit departamentinin nümayəndələri ilə görüşdə də ətraf mühitin qorunması sahəsində iş təcrübəsinin, ekoloji təhlükəsizlik sahəsində fəaliyyətin inkişaf etdirilməsi və tədbirlərin həyata keçirilməsi barədə məlumat mübadiləsi olmuşdur. Öz növbəsində, Azərbaycan nümayəndə heyəti Riqada ətraf mühit sahəsindəki vəziyyətlə tanış olmuşdur.

Bu gün Suraxanı Rayonu İcra Hakimiyyətinin başçısı İlqar Abbasov məişət tullantılarının emalı ilə məşğul olan "Getlini EKO" kompleksində olmuşdur. "Getlini EKO" məişət tullantılarından qaz və elektrik enerjisinin əldə edilməsi üzrə texnologiya işləyib hazırlamışdır.

Qeyd edək ki, mayın 15-də sutəmizləmə stansiyasına - "Riqa suyu" MMC özünüidarə müəssisəsinə getmək planlaşdırılır.

Nigar CƏFƏRLİ,

AzərTAc-ın xüsusi müxbiri

Riqa

Azərbaycan.-2013.- 15 may.- S.8.