Fərid MƏMMƏDOV: Azərbaycanı Eurovision mahnı müsabiqəsində təmsil etməkdən qürur duyuram

Azərbaycanı "Eurovision" mahnı müsabiqəsində təmsil etməkdən qürur duyuram. Ölkəmizin yenidən qalib olması üçün əlimdən gələni əsirgəməyəcəyəm. Azərbaycan ötən il bu müsabiqəyə uğurla ev sahibliyi etmiş, xarici qonaqları, sözün yaxşı mənasında, heyrətləndirməyi bacarmışdır.

Bu fikirləri ölkəmizi bu il "Eurovision-2013" mahnı müsabiqəsində təmsil edən Fərid Məmmədov AzərTAc-a müsahibəsində söyləmişdir. F.Məmmədov demişdir:

- Komandamız məşqləri ciddi səylə həyata keçirmişdir. Mən xalqımın verdiyi səs və münsiflər heyətinin birgə qərarı nəticəsində "Eurovision-2013" mahnı müsabiqəsində Azərbaycanı təmsil etmək hüququ qazanmışam. Bu, mənim üçün böyük məsuliyyətdir. Düşünürəm ki, özümü sübut etmək üçün bu müsabiqə mənim üçün bir şansdır.

Məşqlərimiz hər gün davam edir. Artıq yarımfinal mərhələsində çıxış etməyə tam hazıram.

- Bu möhtəşəm səhnədə Azərbaycanı təmsil edərkən hansı hissləri keçirirsiniz?

Hər bir müğənni öz üzərində ciddi çalışmalıdır. Bu möhtəşəm səhnədə olmaq unudulmaz hissdir. Səhnə çox gözəldir. Xoreoqrafiya bir-birini tamamlayır. Ölkəmizin nüfuzu bütün dünyada gündən-günə artır. Bu mənada bu il mənim üzərimə belə bir məsuliyyət düşdüyünə görə fəxr edirəm.

- "Eurovision" mahnı müsabiqəsi ilə bağlı bir məqam da bu şounun tarixi ənənəsi ilə bağlıdır. Ötən il müsabiqə Şərq ilə Qərbin qovuşduğu bir məkanda - Bakıda təşkil olunmuşdur. Sizcə, builki şou əvvəlkindən nə ilə fərqlənir?

- "Eurovision" mahnı müsabiqəsinin özəlliklərindən biri yarışmanın məhz qalib olan ölkədə keçirilməsidir. Bu mötəbər tədbirdə ölkənin mədəniyyəti, ab-havası, məişəti, xalqın milli mənəvi dəyərləri özünü göstərir. Ötən il ölkəmiz bu müsabiqəyə yüksək səviyyədə ev sahibliyi etmişdir. Bu mənada "Eurovision" müsabiqəsi özündən əvvəlkilərdən bir çox özəllikləri ilə seçildi. Bu özünü müsabiqənin açılışında göstərdi. Builki müsabiqə isə ənənəvi Avropa ölkəsində təşkil olunmuşdur.

- Ölkəmizin bu il finalda iştirakını necə qiymətləndirirsiniz?

- Jurnalistlərin və "Eurovision" fanatlarının səsverməsinə əsasən, ölkəmiz hazırda birinci yerdədir. Azərbaycanın final mərhələsinə çıxacağına tam əminəm. Hesab edirəm ki, özümü tamaşaçıya daha yaxşı təqdim edə bilsəm, uğur qazana biləcəyəm.

- Səhnədəki kölgə ilə müşayiət olunan performansınızdan razısınızmı?

- Kölgə mənim hisslərimi ifadə edir. Sevgidə baş verən dəyişikliklər səhnə performansındakı qapalı qutuda təcəssüm olunur.

Ölkəmizə bu il maraq daha çoxdur. Bu, həm Mətbuat Mərkəzində, həm , ümumiyyətlə, şəhərə gələn qonaqlar arasında hiss edilməkdədir.

- Proqnozlara əsasən, Azərbaycanın "Eurovision-2013" mahnı müsabiqəsində daha çox qələbə qazanmaq şansı vardır. Bu qələbəyə hazırsınızmı?

- Qalib gəlsəm, çox şad olardım. "Eurovision" mahnı müsabiqəsinin yenidən ölkəmizdə çox yüksək səviyyədə keçiriləcəyinə heç bir şübhəmiz yoxdur. Bu, təkcə bizim rəyimiz deyildir. Avropa Yayımları Birliyinin uzun illər "Eurovision" mahnı müsabiqəsinə rəhbərlik edən şəxsləri, eyni zamanda, qurumun Məşvərət Qrupu layihənin icrasının bütün mərhələlərində öz fikirlərini bildirmişlər.

- Yarımfinal ərəfəsində dünya azərbaycanlılarına demək istərdiniz?

- Bütün dünya azərbaycanlılarından dəstək gözləyirəm. Bilirəm ki, hər kəsin ürəyi mənimlədir. Özümə çox güvənirəm inanıram ki, biz yenidən qalib olacağıq.

 

Müsahibəni apardı: Anar RZAYEV,

AzərTAc-ın müxbir

Malmö

 

Azərbaycan.-2013.- 15 may.- S.11.