Azərbaycan Texniki Universiteti ilə Bolqarıstan universitetləri arasında əməkdaşlığa dair müqavilə imzalanmışdır

Mayın 15-də Azərbaycan Texniki Universitetində (AzTU) Bolqarıstanın Qabrovo Texniki Universitetinin rektoru, professor Rayço İlariyonov, Sofiya Texniki Universitetinin prorektoru, professor Marin Xristov və Burqas şəhərindəki Professor Assen Zlatarov Universitetinin rektoru, professor Petko Petkov ilə görüş keçirilmişdir.

AzərTAc xəbər verir ki, görüşdə universitetlər arasında elm və təhsil sahəsində əməkdaşlıq, tələbə və müəllim mübadiləsi, birgə layihələrin həyata keçirilməsi ilə bağlı məsələlər müzakirə edilmişdir.

AzTU-nun rektoru, professor Havar Məmmədov rəhbərlik etdiyi ali təhsil müəssisəsinin fəaliyyəti, strukturu, maddi-texniki bazası, professor-müəllim heyəti, tələbə kontingenti haqqında ətraflı məlumat vermişdir. AzTU-nun xarici ölkə universitetləri ilə əlaqələrindən, beynəlxalq layihələrdə iştirakından danışan rektor bu baxımdan Bolqarıstanın ali məktəbləri ilə əməkdaşlığın əhəmiyyətini qeyd etmişdir.

Respublikamızın təhsil sisteminin Avropa təhsil məkanına - Bolonya prosesinə qoşulduğunu diqqətə çatdıran H.Məmmədov Avropanın və dünyanın qabaqcıl ali məktəbləri ilə təcrübə mübadiləsinin, təhsil əlaqələrinin əhəmiyyətini vurğulamışdır. Bolqarıstanın hər üç ali məktəbini nüfuzlu universitetlər kimi dəyərləndirən H.Məmmədov bu elm ocaqları ilə əməkdaşlığın inkişaf istiqamətləri haqqında danışmışdır. Ölkələrimizin elm və təhsil əlaqələrinin inkişafından söz açan rektor bağlanacaq müqavilələrin iki ölkənin ali təhsil müəssisələri arasında əməkdaşlığın genişləndirilməsində və daha da möhkəmləndirilməsində mühüm rol oynayacağına əminliyini bildirmişdir.

Bolqarıstanlı professorlar R.İlariyonov, M.Xristov və P.Petkov təmsil etdikləri universitetlər haqqında məlumat vermiş, ali məktəblər arasında elm və təhsil əlaqələrinin əhəmiyyətindən danışmış, AzTU ilə əlaqələrə xüsusi əhəmiyyət verildiyini diqqətə çatdırmışlar.

Ölkələrimiz arasındakı dostluq münasibətlərini xüsusi qeyd edən qonaqlar xalqımıza xoş arzularını bildirmiş, Azərbaycan ilə elm, təhsil sahəsində tərəfdaşlıqda maraqlı olduqlarını vurğulamışlar.

Sonra AzTU ilə Bolqarıstanın üç ali təhsil müəssisəsi - Qabrovo Texniki, Sofiya Texniki və Professor Assen Zlatarov universitetləri arasında əməkdaşlığa dair müqavilələr imzalanmışdır.

Müqavilələri professor H.Məmmədov və bolqarıstanlı professorlar R.İlariyonov, M.Xristov, P.Petkov imzalamışlar.

Sənədlərdə birgə tədris, elmi-tədqiqatların aparılması, müəllim və tələbələr arasında təcrübə mübadiləsi və digər məsələlər nəzərdə tutulur. Tədbirdə müqavilədən irəli gələn bir sıra məsələlər müzakirə edilmişdir.

Qeyd olunmuşdur ki, imzalanan müqavilələr Azərbaycan və Bolqarıstanın ali təhsil ocaqları arasında əməkdaşlığı daha da inkişaf etdirəcək, tədris proqramlarının uyğunlaşdırılmasına, birgə elmi araşdırmaların aparılmasına, əlaqələrin genişləndirilməsinə və möhkəmləndirilməsinə kömək edəcəkdir.

Sonra qonaqlar AzTU-nun binasını gəzmiş, universitetin müasir avadanlıqla təchiz olunmuş laboratoriyaları, tədris mərkəzləri, fənn kabinələri ilə tanış olmuşlar.

Görüşdə Bolqarıstanın Azərbaycandakı səfiri xanım Maya Xristova iştirak etmişdir.

Azərbaycan.-2013.- 16 may.- S.2.