Fransız mətbuatı Heydər Əliyev Fondunun Evianda keçirdiyi tədbiri və tarixi abidələrin bərpasına yardımını geniş işıqlandırmışdır

Heydər Əliyev Fondunun təşkilatçılığı və ölkəmizin Parisdəki səfirliyinin təşəbbüsü ilə Fransanın müxtəlif şəhərlərində keçirilən "Azərbaycan günləri" çərçivəsindəki tədbirlər və fondun bu ölkənin tarixi abidələrinin bərpasına yardımı son vaxtlar yerli mətbuatın səhifələrində müntəzəm işıqlandırılır. "Dofine" qəzetində çap olunan "Azərbaycan öz zənginliyini Evianın festivallar sarayında nümayiş etdirir" sərlövhəli məqalədə Heydər Əliyev Fondu tərəfindən çoxəsrlik tarixə malik Azərbaycanın mədəni dəyərlərindən ibarət sərginin açılışından bəhs olunmuşdur. Məqalədə ölkəmizin Fransadakı səfiri Elçin Əmirbəyovun, Evian şəhərinin meri Mark Fransinanın Azərbaycan barədə fikirlərinə geniş yer verilmişdir.

"Qafqazın mirvarisi, qədim və zəngin tarix" yarımsərlövhəsi altında verilmiş yazıda isə Qafqazın mirvarisi adlanan Azərbaycanın Avropa ilə Şərq arasında yerləşdiyi, yeraltı sərvətləri, zəngin mədəniyyəti, dövlət atributları, coğrafi mövqeyi barədə məlumatlar yer almışdır. Daş dövründən etibarən öz mədəniyyətini yaradan azərbaycanlılar fransız oxucularına inkişaf etmiş və zəngin mədəniyyətə malik bir xalq kimi təqdim olunmuşdur.

Azərbaycana xüsusi nömrə həsr edən və səhifələrində ölkəmiz haqqında çoxsaylı məqalələrin yer aldığı "Qərbi Fransa" qəzetinin 13 may tarixli nömrəsində dərc edilən "Kilsəni bərpa etmək üçün dünya öz daşını gətirdi" sərlövhəli məqalədə Fransanın mədəni və tarixi abidələrinin bərpasına yaxından kömək göstərən Heydər Əliyev Fondunun Orn departamentində bir neçə kilsənin bərpasına yardımından, Sen-Hiler kilsəsində bərpa işlərinin başa gəlməsi ilə əlaqədar mayın 11-də keçirilən təntənəli toplantıdan bəhs olunmuşdur. Toplantıda çıxış edən Sentiyi qəsəbəsinin meri, Orn departamentinin rəsmiləri Heydər Əliyev Fondunun yardımını yüksək qiymətləndirmiş, bu addımın iki xalq arasında dostluq əlaqələrinin daha da möhkəmlənməsinə xidmət etdiyini diqqətə çatdırmışlar.

Məqalədə səfir Elçin Əmirbəyovun "Mədəni irs yalnız bir xalqa deyil, dünyaya məxsusdur" fikri də yer almış, 9 milyon əhalisi olan Azərbaycanın dünyəvi və tolerant ölkə olduğu xüsusi vurğulanmışdır.

Əsgər ƏLİYEV,

AzərTAc-ın xüsusi müxbiri

Paris

Azərbaycan.-2013.- 16 may.- S.4.