«YARAT!» Müasir İncəsənət Məkanı və Höte İnstitutunun birgə təşkilatçılığı ilə «David Chipperfield Architects» şirkətinin dizayn üzrə icraçı direktoru Bakıda mühazirə oxumuşdur

"ÜNS" Yaradıcılıq Səhnəsində "YARAT!" Müasir İncəsənət Məkanı və Almaniyanın Höte İnstitutunun birgə təşkilatçılığı ilə "David Chipperfield Architects" şirkətinin dizayn üzrə icraçı direktoru və tərəfdaşı Aleksandr Şvartsın mühazirəsi dinlənilmişdir.

"YARAT!" Müasir İncəsənət Məkanından AzərTAc-a bildirmişlər ki, mühazirə "Muzey dizaynının və muzey memarlığının gələcəyi" mövzusunu əhatə etmişdir.

Aleksandr Şvarts memarlıq sahəsində bir çox mükafatların sahibi və irimiqyaslı layihələrin, o cümlədən Berlindəki Muzey adasında yerləşən Ceyms Simon Muzeyinin, Marbaxda Ədəbiyyat Muzeyinin və Essen şəhərində Folkvanq Muzeyinin layihələrinin müəllifidir.

Uzun illərdir ki, Aleksandr Şvarts tədris fəaliyyəti ilə məşğuldur və Münster Memarlıq Məktəbinin dəvət olunmuş professoru kimi çalışır. O, "David Chipperfield Architects" şirkətinin London ofisi ilə əməkdaşlığa hələ 1996-cı ildə başlamış və 1998-ci ildə şirkətin Berlin ofisi ilə əməkdaşlıq əlaqələri qurmuşdur. Hazırda "David Chipperfield Architects" şirkətinin ofisləri London, Berlin, Milan və Şanxay şəhərlərində yerləşir.

Şirkət, eyni zamanda, mədəniyyət və kommersiya fəaliyyəti ilə məşğuldur. Onun həyata keçirdiyi layihələr həm özəl, həm də dövlət sektorunda icra olunmaqdadır.

Şirkətin bu günədək reallaşdırdığı layihələrin siyahısında muzeylər, kitabxanalar, mənzillər və evlər, hotellər, habelə ofis binaları və ticarət mərkəzləri yer almışdır. Şirkət mütəxəssisləri tərəfindən işlənib hazırlanan memarlıq layihələri əllidən artıq müsabiqədə qalib gəlmiş, RlBA, RF AC, AlA mükafatlarına, habelə 2007-ci ildə RlBA Stirling Prize mükafatı və müasir memarlıq sahəsində Avropa İttifaqının xüsusi mükafatına layiq görülmüşdür.

Azərbaycan.-2013.- 16 may.- S.7.