RAGB fəalları Rusiya və MDB ölkələri xalqları milli mədəniyyət festivalında iştirak etmişlər

Moskva Polad və Ərintilər İnstitutunun Mədəniyyət evində Böyük Vətən müharibəsində Qələbənin 68-ci ildönümünə həsr edilmiş milli mədəniyyətlərin "Rusiya və MDB ölkələri xalqları" adlı bahar festivalı keçirilmişdir.

Rusiya Azərbaycanlı Gənclər Birliyi (RAGB) idarə heyətinin üzvü Emin Hacıyev AzərTAc-a bildirmişdir ki, festivalda RAGB fəalları iştirak etmişlər.

Tədbirin təşkilatçıları Tələbə Cəmiyyətləri İttifaqı və Ümumrusiya Millətlərarası Gənclər İttifaqının Təşkilat Komitəsidir. Festivalın başlıca məqsədi tələbə mühitində ənənəvi xalq mədəniyyətinin qorunub saxlanmasına və inkişaf etdirilməsinə kömək göstərmək, gənclər arasında tolerantlığın səviyyəsini yüksəltməkdir. Bundan əlavə, festivalın başlıca məqsədlərindən biri həm də Böyük Vətən müharibəsində sovet xalqlarının qəhrəmanlığını və faşizm üzərində Qələbənin ümumdünya əhəmiyyətini bədii vasitələrlə təbliğ etmək olmuşdur.

Festival çərçivəsində "Rusiya və MDB ölkələrinin müxtəlif xalqlarının nümayəndələrinin Böyük Qələbəyə töhfəsi" mövzusunda "dəyirmi masa" keçirilmiş, milli mədəniyyət nümunələrindən ibarət sərgi təşkil edilmişdir. RAGB fəalları Azərbaycanın zəngin mədəniyyətini, tarixini və müasir nailiyyətlərini nümayiş etdirmiş, faşizm üzərində qələbədə Bakı neftinin həlledici əhəmiyyətindən danışmışlar. Qonaqlara RAGB-nin jurnalları paylanmışdır.

Festivala bayram konserti ilə yekun vurulmuşdur. Konsertdə Azərbaycan tələbələri Mahnur Səfiyeva "Zəriflik" mahnısını ifa etmiş, Murad Abbasov balaban sədaları altında "Bu qoşunların keçdiyi şəhərlər danışır" şeirini söyləmiş, Rövşən Elçiyev isə nağarada "Müasir Azərbaycan ritmləri"nin virtuoz ifası ilə bütün zalda canlanma yaratmışdır.

Qeyd edək ki, "Rusiya MDB ölkələri xalqları" festivalı Moskvada hər il keçirilir.

 

Fəridə ABDULLAYEVA,

AzərTAc-ın xüsusi müxbiri

Moskva

 

Azərbaycan.-2013.- 16 may.- S.7.