Milli mətbəximiz Özbəkistanda 11-ci xeyriyyə tədbirində

Təbii sərvətləri ilə zəngin olan Azərbaycan milli mənəvi və maddi mədəniyyət nümunələri ilə də diqqət çəkməkdədir. Dəfələrlə beynəlxalq festivallara qatılan milli mətbəximiz də zəngin sərvətlər sırasında qəbul edilməkdədir.

Özbəkistan Xarici İşlər Nazirliyinin diplomatik servis xidmətinin təşkilatçılığı ilə "Xalqların adət-ənənələri və milli yeməkləri" mövzusunda keçirilən 11-ci xeyriyyə festivalında Azərbaycan mətbəxi də iştirak edib. Adıçəkilən tədbirə səfirlər, beynəlxalq təşkilatlar və ictimaiyyətin nümayəndələri, həmçinin diasporumuzun bu ölkədəki üzvləri də qatılıblar.

Azərbaycan səfirliyi üçün ayrılmış guşə xüsusilə fərqlənib. Belə ki, burada dövlətimizin gerbi, bayrağı, qədim xalça nümunələri, milli musiqi alətlərimiz və xalqımıza məxsus məişət əşyaları nümayiş etdirilib. Qonaqlar həmçinin milli mətbəximizin xörəklərindən dadmaqla ağızlarını dada gətiriblər.

Festival dünya xalqlarının mahnı və rəqsləri ilə sona çatıb.

Azərbaycan.-2013.- 16 may.- S.8.