Qahirədə Azərbaycanın və Misirin XİN mətbuat xidməti rəhbərlərinin görüşü olmuşdur

Azərbaycan XİN-in mətbuat katibi Elman Abdullayev Qahirədə Misir Xarici İşlər Nazirliyinin İctimai diplomatiya və media departamentinin rəisi səfir Bahir Helmi ilə görüş keçirmişdir.

Görüşdə E.Abdullayev həmsöhbətinə Azərbaycanın xarici siyasəti, həyata keçirdiyi humanitar layihələr və ictimai diplomatiya siyasətinin əsas istiqamətləri barəsində məlumat vermişdir. O, Azərbaycan ilə Misirin tarixi dostluq əlaqələrini bölüşdüyünü qeyd edərək, bütün sahələrdə olduğu kimi, ictimai diplomatiya sahəsində də birgə maraq dairəsində olan istiqamətlər üzrə əməkdaşlığın mümkünlüyünü bildirmişdir. Bu xüsusda Fələstin məsələsinə toxunan E.Abdullayev Azərbaycanın ev sahibliyi ilə bu ilin iyun ayında Fələstin üzrə Bakıda keçiriləcək donor konfransı haqqında da bilgi vermişdir.

Ermənistan-Azərbaycan münaqişəsi və onun törətdiyi fəsadlar barəsində ətraflı danışan E.Abdullayev Qoşulmama Hərəkatının xarici işlər nazirlərinin Şarm əş-Şeyx toplantısında və İƏT-in Qahirə sammitində bu münaqişə ilə əlaqədar qəbul edilmiş qərarların siyasi əhəmiyyətindən danışmış və bu xüsusda Misirin tutduğu mövqeyin Azərbaycan tərəfindən yüksək qiymətləndirildiyini qeyd etmişdir.

Bahir Helmi Azərbaycan və Misir xalqlarının tarixi dostluq və qardaşlıq ənənələrindən danışaraq Misirin Azərbaycan ilə əlaqələrə daim mühüm əhəmiyyət verdiyini qeyd etmiş və digər sahələrdə olduğu kimi, ictimai diplomatiya sahəsində də iki ölkə arasında əməkdaşlıq və təcrübə mübadiləsi üçün münbit imkanların olduğunu diqqətə çatdırmışdır.

Azərbaycan.-2013.- 17 may.- S.3.