İran İslam Respublikasında səfərdə olan Azərbaycan nümayəndə heyəti Prezident Mahmud Əhmədinejad ilə görüşmüşdür

Xəbər verdiyimiz kimi, Qafqaz Müsəlmanları İdarəsinin sədri Şeyxülislam Allahşükür Paşazadənin rəhbərliyi ilə Azərbaycan nümayəndə heyəti İranda səfərdədir. Azərbaycan-İran parlamentlərarası dostluq qrupu üzvlərinin də təmsil olunduğu nümayəndə heyətimiz Prezident Mahmud Əhmədinejad ilə görüşmüşdür.

Görüşdə Azərbaycan-İran münasibətlərinə dair səmərəli fikir mübadiləsi aparılmışdır. İran dövlətinin başçısına Prezident İlham Əliyevin səmimi salamlarını çatdıran A.Paşazadə mehriban qarşılanmaya və yüksək qonaqpərvərliyə görə minnətdarlığını bildirmişdir. Azərbaycanda bütün dinlərə ehtiram göstərildiyini qeyd edən Qafqaz Müsəlmanları İdarəsinin sədri demişdir ki, ölkəmizdə məscid, pir və ziyarətgahların abadlaşdırılmasına, təmir və bərpasına dövlət tərəfindən yardımlar edilir. Son illər bu sahədə görülən işlərdən bəhs edən A.Paşazadə məlumat vermişdir ki, bu günlərdə Şamaxı rayonundakı qədim Cümə məscid-kompleksi əsaslı bərpa və yenidənqurmadan sonra Prezident İlham Əliyevin iştirakı ilə dindarların istifadəsinə verilmişdir. Bundan əvvəl isə Qəbələ və Sumqayıt şəhərlərində yeni inşa edilmiş Cümə məscidlərinin açılışı olmuşdur.

İran Prezidenti Mahmud Əhmədinejad onun da hərarətli və səmimi salamlarını Azərbaycan dövlətinin başçısına çatdırmasını A.Paşazadədən xahiş etmişdir. M.Əhmədinejad bildirmişdir ki, dinamik inkişafda olan Azərbaycan-İran münasibətləri tarixi köklərə söykənir və ölkələrimiz bir-birinə qırılmaz tellərlə sıx bağlıdır. Xalqlarımız və ölkələrimiz arasındakı bu bağlılıq münasibətlərin inkişafı müstəvisində getdikcə möhkəmlənir.

Xalqımızın yüksək keyfiyyətlərindən danışan İran Prezidenti demişdir: "Azərbaycan xalqı mənim qəlbimdədir, heç bir qüvvə onu ürəyimdən çıxara bilməz".

Sabir ŞAHTAXTI,

AzərTAc-ın xüsusi müxbiri

Tehran

Azərbaycan.-2013.- 19 may.- S.5.