Qara dəniz İqtisadi Əməkdaşlıq Təşkilatının üzvü olan dövlətlərin «beyin mərkəzləri»nin Bakıda keçirilən forumu başa çatmışdır

Bakıda Azərbaycan Respublikasının Prezidenti yanında Strateji Araşdırmalar Mərkəzinin (SAM) təşkilatçılığı ilə Qara dəniz İqtisadi Əməkdaşlıq Təşkilatının (QİƏT) üzvü olan dövlətlərin "beyin mərkəzləri"nin "Şərq-Qərb strateji körpüsü: QİƏT regionunda təhlükəsizlik, inkişaf və inteqrasiya" mövzusunda keçirilən forum mayın 18-də başa çatmışdır.

AzərTAc xəbər verir ki, forumun ikinci günü "QİƏT regionunda təhlükəsizlik gündəmi və münaqişələrin həlli" və "Avropa enerji təhlükəsizliyinin möhkəmləndirilməsində QİƏT regionunun rolu" mövzularında panel iclaslarla davam etmişdir.

Azərbaycan Diplomatik Akademiyasının (ADA) prorektoru Fariz İsmayılzadənin moderatorluğu ilə "QİƏT regionunda təhlükəsizlik gündəmi və münaqişələrin həlli" mövzusunda keçirilən panel iclasında Rumıniya Prezidentinin strateji məsələlər və beynəlxalq təhlükəsizlik üzrə müşaviri İulian Kifu "Dondurulmuş münaqişələrin unudulmuş münaqişələrə çevrilməsinin qarşısını necə almalı", Kolumbiya Beynəlxalq və İctimai Münasibətlər məktəbinin professoru David Cuthell "ABŞ və NATO-nun Qara dəniz siyasəti", Albaniya Beynəlxalq Araşdırmalar Mərkəzinin direktorunun müavini Alba Cela "Qərbi Balkanlarda Aİ-nin yeni inteqrasiya əlaqələrinə baxış: QİƏT regionunda digər namizədlər üçün fəsadları", Gürcüstanın Siyasi Tədqiqatlar İnstitutunun həmsədri George Tarkhan-Mouravi "Qara dəniz və identiklik siyasəti", Ukraynanın NİSS təşkilatının Qloballaşma və Strateji Təhlükəsizlik üzrə şöbə müdiri Konstantin Kononenko "Qara dəniz regionunda təhlükəsizlik sisteminin formalaşdırılması perspektivləri: Ukraynanın baxışı" mövzularında çıxış etmişlər.

Sonra SAM-ın direktoru Fərhad Məmmədovun moderatorluğu ilə "Avropa enerji təhlükəsizliyinin möhkəmləndirilməsində QİƏT regionunun rolu" mövzusunda sonuncu panel iclas keçirilmişdir.

İclasda SAM-ın aparıcı elmi işçisi Gülmira Rzayevanın "Cənub dəhlizi: balanslaşdırılmış beynəlxalq öhdəliklər və milli prioritetlər", Türkiyənin Qara dəniz Strateji Araşdırmalar Mərkəzinin əməkdaşı Yalçın Sarıkayanın "QİƏT regionunda baş verən siyasi proseslərin şaxələndirilməsinin xarakteristikası", Serbiyanın Beynəlxalq Siyasət və İqtisadiyyat İnstitutunun əməkdaşı Slobodan Yankoviçin "Azərbaycan qazı və böyük güc siyasəti", Yaxın Şərq üzrə Tədqiqat layihəsinin rəhbəri, Avropa və Xarici Siyasət üzrə Yunan Fondunun əməkdaşı Evangelos Venetisin "Qafqaz və Avropa müasir İpək Yolunda: TAP və təkamül dəhlizi", ADA-nın Xəzər Enerji və Ətraf Mühit Mərkəzinin direktoru Elnur Soltanovun "Azərbaycan enerji resurslarının müsbət xarici effektləri", SAM-ın aparıcı elmi işçisi Rəşad Kərimovun "Azərbaycan Qara dəniz və Şərqi Asiya arasında strateji körpü kimi" mövzularında məruzələri dinlənilmişdir.

Sonda mövzulara dair müzakirələr aparılmış, suallar cavablandırılmışdır.

Azərbaycan.-2013.- 19 may.- S.6.